រាជធានីភ្នំពេញ ៖ ខណៈពេលដែលប្រតិភូធុរជនអាមេរិកប្រមាណ១៦ក្រុមហ៊ុនកំពុងបំពេញទស្សនកិច្ច និងស្វែងរកឱកាសវិនិយោគនៅកម្ពុជា មន្ត្រីជាន់ខ្ពស់ក្រសួងពាណិជ្ជកម្ម បានបង្ហាញពីកាលានុវត្តភាពវិនិយោគលើវិស័យកសិកម្មរបស់កម្ពុជាដល់ពួកគេ ដើម្បីជំរុញការនាំចេញកសិ-ផលិតផលទៅកាន់ទីផ្សារអន្តរជាតិ និងការប្តេជ្ញាចិត្តរបស់ក្រសួងពាណិជ្ជកម្ម ក្នុងការសម្របសម្រួលការអភិវឌ្ឍវិស័យឯកជន តាមរយៈការលើកកម្ពស់បរិយាសកាសធុរកិច្ច, វិនិយោគ និងការជំរុញកិច្ចសម្រួលពាណិជ្ជកម្ម ។
ការបង្ហាញនេះធ្វើឡើងនៅក្នុងកិច្ចប្រជុំ ស្តីពីកាលានុវត្តភាពធុរកិច្ចលើវិស័យកសិកម្មរបស់កម្ពុជា ដែលរៀបចំដោយស្ថានទូតសហរដ្ឋអាមេរិក សហការជាមួយសភាពាណិជ្ជកម្មអាមេរិកនៅកម្ពុជា កាលពីព្រឹកថ្ងៃទី២៦ ខែកញ្ញា ឆ្នាំ២០១៨ កន្លងមក ។
លោកជំទាវ ចម និម្មល រដ្ឋលេខាធិការក្រសួងពាណិជ្ជកម្ម បានបង្ហាញដល់គណៈប្រតិភូធុរជនអាមេរិក ដោយសង្កត់ធ្ងន់អំពីសារសំខាន់នៃវិស័យកសិកម្ម និងការរួមចំណែករបស់វិស័យនេះទៅក្នុងផលិតផលក្នុងស្រុកសរុបប្រចាំឆ្នាំ (GDP) ព្រមទាំងបានជម្រាបគណៈប្រតិភូអំពីការយកចិត្តទុកដាក់របស់រាជរដ្ឋាភិបាលកម្ពុជា ក្នុងការអភិវឌ្ឍវិស័យកសិកម្ម សំដៅធ្វើពិពិធកម្ម (ពង្រីក) មូលដ្ឋាននៃកំណើនសេដ្ឋកិច្ច និងកាត់បន្ថយភាពក្រីក្រ ដូចបានកំណត់នៅក្នុងសសរស្តមទី៤នៃយុទ្ធសាស្ត្រចតុកោណដំណាក់កាលទី៤ ។
លោកជំទាវរដ្ឋលេខាធិការ បានលើកឡើងពីវឌ្ឍនភាពនៃពាណិជ្ជកម្មទ្វេភាគីរវាងកម្ពុជា-អាមេរិក និងបញ្ហាប្រឈមមួយចំនួន ដែលប្រជាកសិករ និងពាណិជ្ជករកម្ពុជាភាគច្រើន បានកំពុងជួបប្រទះ ព្រមទាំងបានស្នើដល់គណៈប្រតិភូធុរជនអាមេរិក ពិចារណាវិនិយោគលើបច្ចេកវិទ្យាថ្មីៗ ដើម្បីធ្វើទំនើបកម្មវិស័យកសិកម្ម ក៏ដូចជាការពង្រឹងសមត្ថភាពវិស័យឯកជននៅក្នុងប្រទេសកម្ពុជា ។លោកជំទាវ ចម និម្មល បានគូសបញ្ជាក់ថា ៖« យើងមានទំនុកចិត្តថា ការវិនិយោគផ្នែកសាធារណៈ និងឯកជន នៅក្នុងសង្វាក់តម្លៃ និងប្រព័ន្ធសុវត្ថិភាពស្បៀង គឺជាធាតុដ៏សំខាន់ ដើម្បីសម្រេចគោលដៅអភិវឌ្ឍន៍និរន្តរភាពទី២ ស្តីពី លុបបំបាត់ការអត់ឃ្លាន និងគោលដៅទី៨ ស្តីពី អនុលោមការងារ និងកំណើនសេដ្ឋកិច្ច »។
ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានឱ្យដឹងថា ក្រុមហ៊ុនមេរិកដែលមកទស្សនកិច្ចនៅកម្ពុជានាពេលនេះ សុទ្ធតែជាក្រុមហ៊ុនប្រើប្រាស់បច្ចេកទេស ក៏ដូចជាបច្ចេកវិទ្យាខ្ពស់ៗ ដែលនឹងអាចជួយកម្ពុជាធ្វើការប្រកួតប្រជែងនៅលើទីផ្សារ និងអាចនាំចេញផលិតផលទៅសហរដ្ឋអាមេរិកបាន ។ ថ្លែងប្រាប់ក្រុមអ្នកសារព័ត៌មានក្នុងវេទិកានាថ្ងៃដដែលនោះ លោក William Heidt ឯកអគ្គរដ្ឋទូតសហរដ្ឋអាមេរិកប្រចាំកម្ពុជា មានប្រសាសន៍ថា នៅក្នុងតំបន់នេះគឺមានការប្រកួតប្រជែងគ្នាច្រើន ហើយក្រុមហ៊ុនអាមេរិកមានជំនាញបច្ចេកទេស ក៏ដូចជាបច្ចេកវិទ្យាខ្ពស់ៗល្អ។ ដូច្នេះក្រុមហ៊ុនអាមេរិក នឹងជួយប្រទេសកម្ពុជា ក៏ដូចជាក្រមហ៊ុនកម្ពុជាក្នុងការប្រកួតប្រជែងនៅលើទីផ្សារ ។
លោកបញ្ជាក់ថា ៖« ខ្ញុំអាចនិយាយបានថាក្រុមហ៊ុនអាមេរិកមានបច្ចេកវិទ្យាខ្ពស់ៗ ហើយអាចជួយដល់ក្រុមហ៊ុនកម្ពុជា ព្រោះការនាំចេញទំនិញកសិកម្មគឺជាមុខជំនួញដែលមានភាពស្មុគស្មាញ ហើយកម្រិតបទដ្ឋានសុវត្ថិភាព ស្បៀងរបស់សហរដ្ឋអាមេរិកគឺខ្ពស់ ។ ដូចនេះសម្រាប់ការនាំចេញទំនិញពីកម្ពុជា អាចមានលក្ខណៈពិបាកបំពេញបានទៅតាមតម្រូវការទាមទាររបស់គេ ។ ទោះជាបែបនេះក្តី យើងចង់ជួយផលិតផលកម្ពុជាអាចនាំចូលទៅទីផ្សារសហរដ្ឋអាមេរិក ដោយធ្វើយ៉ាងម៉េចកែលម្អដើម្បីឈានចូលទៅទីផ្សាររបស់អាមេរិកបាន »។
អនុប្រធានសហព័ន្ធស្រូវអង្ករកម្ពុជា លោក ឧកញ៉ា ហ៊ុន ឡាក់ មានប្រសាសន៍ថា ៖« ក្នុងកិច្ចពិភាក្សាថ្ងៃនេះ យើងបានជជែកគ្នាពាក់ព័ន្ធនឹងការផលិត និងលក្ខខណ្ឌនៃតម្រូវការរបស់ទីផ្សាររបស់ភាគីបញ្ជាទិញ ។ ដូច្នេះខ្ញុំគិតថា កម្ពុជាត្រូវតែរៀបចំខ្លួនចាប់ពីឥឡូវនេះទៅ ព្រោះផលិតផលកសិផលរបស់យើង នឹងចាប់ផ្ដើមមានកម្រិតស្តង់ដា ដើម្បឆ្លើយតបនឹងតម្រូវការដែលគេចង់បាន »។
លោកឧកញ៉ា សុង សារ៉ន នាយកក្រុមហ៊ុនអេមរុ រាយស៍ មានប្រសាសន៍ដែរថា ទីផ្សារសហរដ្ឋអាមេរិក ជាទីផ្សារថ្មីមួយ ហើយកម្ពុជាបាននាំចូលទៅនៅមានកម្រិតមួយទាបបំផុតនៅឡើយ ។ លោកបន្ដថា ៖« ទីផ្សារអាមេរិកធំណាស់ មួយឆ្នាំ គេត្រូវការអង្ករក្រអូបប្រហែលកន្លះលានតោន ដូច្នេះយើងគួរបានចំណែកទីផ្សារ មិនចាំបាច់បរិមាណអង្ករដល់ខ្ទង់សែនតោនទេ ត្រឹមខ្ទង់៥ម៉ឺនតោន វាក៏ធំសម្រាប់យើងដែរ។ ដូច្នេះ យើងធ្វើយ៉ាងម៉េចជំរុញការនាំចូលទៅអាមេរិកឲ្យបាន៤ឬ៥ម៉ឺនតោន ហើយអាចឈរជើងពង្រីកបានរាល់ឆ្នាំ វាក៏ល្អសម្រាប់កម្ពុជា »។
តាមឯកអគ្គរដ្ឋទូតសហរដ្ឋអាមេរិក មកដល់បច្ចុប្បន្ននេះ ក្រុមហ៊ុនកម្ពុជាមានលក្ខណៈគ្រប់គ្រាន់ក្នុងការធ្វើជាដៃគូរបស់ក្រុមហ៊ុនអាមេរិក ដើម្បីឱ្យប្រទេសទាំងពីរទទួលបានអត្ថប្រយោជន៍រៀងខ្លួន ។
គួរបញ្ជាក់ថា កាលពីឆ្នាំ២០១៧ ទំហំពាណិជ្ជកម្មទ្វេភាគីរវាងកម្ពុជា-អាមេរិក សម្រេចបាន៣,៥ប៊ីលានដុល្លារអាមេរិក ក្នុងនោះការនាំចេញរបស់កម្ពុជាទៅអាមេរិក មានទំហំ៣,១ប៊ីលានដុល្លារអាមេរិក និងនាំចូលពីអាមេរិក មានទំហំ៤០០លានដុល្លារអាមេរិក គឺបានកើនឡើង ១១% ធៀបនឹងឆ្នាំ២០១៦ ។ ទន្ទឹមគ្នានេះ ទំហំទឹកប្រាក់វិនិយោគពីបរទេសរបស់អាមេរិកមកកម្ពុជា មានចំនួន១៥១លានដុល្លារអាមេរិក គឺបានកើនឡើង១១,៩% ធៀបនឹងឆ្នាំ២០១៦ ៕
ចែករំលែកព័តមាននេះ