ខេត្តឧត្តរមានជ័យ ៖ ប៉ូលិសសង្កាត់កូនគ្រៀលបានធ្វើការឃាត់ខ្លួនមនុស្សប្រុសស្រី៣នាក់ដោយជាប់ពាក់ព័ន្ធប្រើប្រាស់ និងចែកចាយនូវសារធាតុញៀនកាលពីវេលាម៉ោង១រសៀលថ្ងៃទី២៦ កញ្ញា២០១៨ ។ ហេតុការណ៍នេះបានកើតឡើងនៅក្នុងភូមិដងទង់ សង្កាត់កូនគ្រៀល ក្រុងសំរោង ខេត្តឧត្តរមានជ័យ។
ជនសង្ស័យទាំង៣នាក់ដែលជាប់ពាក់ព័ន្ធគ្រឿងញៀនខាងលើឈ្មោះយន់ ម៉ង ភេទប្រុស អាយុ៣៦ឆ្នាំ ជាប្តី ឈ្មោះសេង ចាន់ធូ ភេទស្រី អាយុ៣៥ឆ្នាំ ជាប្រពន្ធ និងនារីម្នាក់ទៀតឈ្មោះធី លីម អាយុ១៦ឆ្នាំ ជនសង្ស័យទាំង៣នាក់រស់នៅក្នុងភូមិកើតហេតុខាងលើ។
មេប៉ុស្គិ៍រដ្ឋបាលសង្កាត់កូនគ្រៀលបានឱ្យដឹងថា មុនពេលធ្វើការឃាត់ខ្លួនជនសង្ស័យទាំង៣នាក់នេះ គឺយោងទៅលើព័តមានរាយការណ៍ពីបណ្តាញ ទើបឈានទៅធ្វើការឃាត់ខ្លួនបុរសនិងស្ត្រីជាប្តីប្រពន្ធទាំង២នាក់ ហើយសមត្តកិច្ចបានធ្វើការឆែកឆេរកឃើញថ្នាំញៀនប្រភេទម៉ាទឹកកក ICE ចំនួន១កញ្ចប់ធំ ២កញ្ចប់តូច ក្រោយមកឈានទៅធ្វើការឃាត់ខ្លួននារីវ័យក្មេងម្នាក់ទៀតឆែកឆេរកឃើញថ្នាំយ៉ាម៉ា ប្រភេទមេតំហ្វេតាមីន WY ចំនួន៦គ្រាប់ ហើយសមត្ថកិច្ចបានដកហូតរួមទាំងម៉ូតូ១គ្រឿង ស៊េរីឆ្នាំ២០១៨ ពាក់ស្លាកលេខ ឧត្តមានជ័យ ១D-៤១៥៨ និងលុយចំនួន១សែន១ម៉ឺន២ពាន់រៀលផងដែរ។
លោកមេប៉ុស្តិ៍បានបន្តថា បន្ទាប់ពីបានឃាត់ខ្លួនជនសង្ស័យទាំង៣នាក់ខាងលើនេះ សមត្ថកិច្ចបាននាំខ្លួនមកប៉ុស្តិ៍រដ្ឋបាលសង្កាត់កូនគ្រៀលធ្វើការសាកសួរជនសង្ស័យបានឆ្លើយសារភាពថា ខ្លួនពិតជាបានប្រើប្រាស់ និងចែកចាយពិតប្រាកដមែន ដោយយោងទៅលើចម្លើយ និងយោងទៅលើវត្ថុតាងសមត្ថកិច្ចបានកសាងសំណុំរឿងទៅអធិការក្រុងសំរោងចាត់ការបន្តទៅតាមនីតិវិធី ៕
ចែករំលែកព័តមាននេះ