ខេត្តព្រះសីហនុ ៖ ជនសង្ស័យចំនួន២នាក់ក្នុងចំណោម៣នាក់ពាក់ព័ន្ឋនឹងករណីអំពើលួចមានស្ថានទម្ងន់ទោស (ឆក់កាបូបស្ត្រីជនជាតិចិនម្នាក់បណ្តាលឲ្យដួលរងរបួស) កាលពីថ្ងៃទី ២៣ ខែកញ្ញា ឆ្នាំ២០១៨នៅចំណុចចំណោទអន្លង់ក្រពើ ស្ថិតនៅភូមិ២ សង្កាត់៣ ក្រុងខេត្ត ព្រះសីហនុ នារសៀលថ្ងៃទី២៥ កញ្ញានេះត្រូវបានសមត្ថកិច្ចបញ្ជូនខ្លួនទៅសាលាដំបូងខេត្តហើយ។
ជនសង្ស័យ៣នាក់ខាងលើរួមមាន ១-ឈ្មោះ លី ជាសាង ភេទប្រុស អាយុ១៨ឆ្នាំ មុខរបរ ធ្វើការក្នុងម៉ាត មានទីលំនៅភូមិ៥ សង្កាត់៤ ក្រុង-ខេត្តព្រះសីហនុ (អ្នកបើកម៉ូតូ) ២-ឈ្មោះ យន់ ភារៈ ភេទប្រុស អាយុ ១៨ឆ្នាំ មុខរបរ មិនពិតប្រាកដ មានទីលំនៅ ស្រុកកំពង់ត្រាច ខេត្តកំពត ( ជិះក្រោយជាអ្នកធ្វើសកម្មភាពឆក់ ) និង៣-ឈ្មោះ កុយ ជង់ហួរ ភេទប្រុស អាយុ ១៨ឆ្នាំ មុខរបរមិនពិតប្រាកដ មានទីលំនៅភូមិ២ សង្កាត់១ ក្រុងព្រះសីហនុ ខេត្តព្រះសីហនុ (រត់គេចខ្លួន)។ ចំណែកវត្ថុតាងដកហូតបានរួមមាន កាបូបស្ពាយចំហៀង១ ទូរស័ព្ទដៃ១គ្រឿង ម៉ាក SAMSUNG ម៉ូតូ១គ្រឿង ម៉ាកនិច ពណ៌ស គ្មានស្លាកលេខ ( ជាមធ្យោបាយធ្វើសកម្មភាព។
យោងតាមប្រភពពីលោកវរសេនីយ៍ឯក ស៊ុត សំអុន នាយការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តបានអោយដឹងថា ជនសង្ស័យ៣នាក់ មិនស្គាល់អត្តសញ្ញាណ បានជិះម៉ូតូ១គ្រឿង ពណ៌ស បានធ្វើសកម្មភាព ឆក់កាបូបរបស់ស្ត្រីម្នាក់ជាជនរងគ្រោះ ខណៈពេលដែលជនរងគ្រោះកំពុងជិះម៉ូតូឌុបជាមួយមិត្តប្រុស តាមផ្លូវឆ្ពោះទៅកន្លែងស្នាក់នៅចំណោទរ៉ា ភូមិ៣ សង្កាត់៣ ក្រុងព្រះសីហនុ ខេត្តព្រះសីហនុ ក្នុងពេលដែលជនសង្ស័យលូកដៃឆក់យកកាបូប ក៏ទាក់ដៃចង្កូតម៉ូតូគ្នា បណ្តាលឲ្យដួលម៉ូតូ ពេលនោះជនសង្ស័យបានគេចខ្លួន ដោយបន្សល់ទុកម៉ូតូធ្វើសកម្មភាព នៅកន្លែងកើតហេតុ។
ក្រោយពីទទួលបានព័តមានខាងលើភ្លាម មានការបញ្ជាពីលោកឧត្តមសេនីយ៍ទោ ជួន ណារិន ស្នងការនគរបាលខេត្ត ឲ្យកម្លាំងជំនាញផែននគរបាលព្រហ្មទណ្ឌបានចុះទៅដល់កន្លែងកើតហេតុ ធ្វើការស្រាវជ្រាវស៊ើបអង្កេត រហូតឃាត់ខ្លួនបានជនសង្ស័យចំនួន ២នាក់ ជាបន្តបន្ទាប់ រីឯជនសង្ស័យ ០១នាក់ទៀត រត់គេចខ្លួន កម្លាំងសមត្ថកិច្ចកំពុងបន្តស្វែងរកចាប់ខ្លួន ។
បច្ចុប្បន្នជនសង្ស័យ២នាក់ខាងលើការិយាល័យនគរបាលព្រហ្មទណ្ឌកម្រិតស្រាលកំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុនារសៀលថ្ងៃទី២៥ កញ្ញា ឆ្នាំ២០១៨ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ