ខេត្តប៉ៃលិន ៖ បុរសម្នាក់ រងរបួសបែកក្បាលស្លាប់ភ្លាមៗនៅនឹងកន្លែង ខណ:ជិះម៉ូតូក្នុងល្បឿនលឿន ត្រង់ចំណុចផ្លូវកោង លុះបួងចង្កូតមិនទាន់ក៏ជ្រុលទៅបុកបង្គោលចរាចរណ៍នៅក្បែរចិញ្ចើមផ្លូវខ្ទេចទាំងម៉ូតូ និងស្លាប់តែម្តង ។ ហេតុការណ៍នេះ…
ខេត្តប៉ៃលិន ៖ បុរសម្នាក់ រងរបួសបែកក្បាលស្លាប់ភ្លាមៗនៅនឹងកន្លែង ខណ:ជិះម៉ូតូក្នុងល្បឿនលឿន ត្រង់ចំណុចផ្លូវកោង លុះបួងចង្កូតមិនទាន់ក៏ជ្រុលទៅបុកបង្គោលចរាចរណ៍នៅក្បែរចិញ្ចើមផ្លូវខ្ទេចទាំងម៉ូតូ និងស្លាប់តែម្តង ។
ហេតុការណ៍នេះ បានកើតឡើងកាលពីវេលាម៉ោង៩យប់ថ្ងៃទី២៥ ខែកញ្ញា ឆ្នាំ២០១៨ ស្ថិតនៅចំណុចជាប់នឹងរបងផ្ទះសំណាក់គ្រូ ទល់មុខអនុវិទ្យាល័យបរយ៉ាខា ក្នុងភូមិរោងចក្រ សង្កាត់បរយ៉ាខា ក្រុងប៉ៃលិន ខេត្តប៉ៃលិន ។
ប្រភពព័ត៌មានពីមន្ត្រីនគរបាលប៉ុស្តិ៍បរយ៉ាខា បានឱ្យដឹងថា ជនរងគ្រោះដែលស្លាប់ឈ្មោះ ម៉ន ប៊ុនណាត ភេទប្រុស អាយុ៣០ឆ្នាំ មានទីលំនៅក្នុងភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន ជាអ្នកបើកបរម៉ូតូម៉ាក ហុងដាឌ្រីម ពណ៌ក្រហមលាយខ្មៅ ស៊េរីឆ្នាំ២០០២ ពាក់ស្លាកលេខ បាត់ដំបង ១I-៧៩១៦ ។
ប្រភពបន្តទៀតថា មុនពេលកើតហេតុ គេឃើញជនរងគ្រោះបានជិះម៉ូតូម្នាក់ឯង ក្នុងទិសដៅពីត្បូងទៅជើងក្នុងល្បឿនលឿន បំរុងទៅក្រុងប៉ៃលិន ដោយអត់មានពាក់មួកសុវត្ថិភាព លុះដល់ត្រង់ចំណុចផ្លូវកោងខាងលើ មិនព្រមបន្ថយល្បឿន ហើយបួងចង្កូតមិនទាន់ក៏ជ្រុលទៅបុកបង្គោលស្លាកចរាចរណ៍ពេញទំហឹង បណ្តាលឱ្យដួលបោកបែកក្បាលស្លាប់ភ្លាមៗ នៅនឹងកន្លែងតែម្តង ។ រីឯម៉ូតូបានទទួលរងការខូចខាតទាំងស្រុង ត្រូវបានគេអូសយកទៅផ្ទះ ដើម្បីធ្វើការជួសជុលឡើងវិញ ។
បច្ចុប្បន្នសពជនរងគ្រោះត្រូវបានក្រុមគ្រួសារដឹកយកទៅផ្ទះ ដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ