ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់សាលាខេត្តកំពង់ឆ្នាំង ក៏ដូចជាយោងតាមស្មារតីអង្គប្រជុំកាលពីថ្ងៃ ទី២៤ ខែកញ្ញា ឆ្នាំ២០១៨ ស្តីពីការផ្លាស់ទីអ្នករស់នៅលើផ្ទះបណ្ដែតទឹក ទូទាំងខេត្តកំពង់ឆ្នាំង ឲ្យទៅរស់នៅលើដីគោក…
ខេត្តកំពង់ឆ្នាំង ៖ យោងតាមសេចក្តីជូនដំណឹងរបស់សាលាខេត្តកំពង់ឆ្នាំង ក៏ដូចជាយោងតាមស្មារតីអង្គប្រជុំកាលពីថ្ងៃ ទី២៤ ខែកញ្ញា ឆ្នាំ២០១៨ ស្តីពីការផ្លាស់ទីអ្នករស់នៅលើផ្ទះបណ្ដែតទឹក ទូទាំងខេត្តកំពង់ឆ្នាំង ឲ្យទៅរស់នៅលើដីគោក ដែលកំណត់ទុកដោយអាជ្ញាធរខេត្ត ដែលនឹងប្រព្រឹត្តទៅចាប់ពីថ្ងៃទី១ ខែតុលា ឆ្នាំ២០១៨ នេះតទៅ ដើម្បីក្នុងទន្លេមាន បរិស្ថានល្អ គ្មានអ្នករស់នៅលើទឹកទៀតនោះទេ។ ទាក់ទងនឹងបញ្ហានេះ លោក ស៊ុន សុវណ្ណរិទ្ធ អភិបាលរងខេត្ត កំពង់ឆ្នាំង កាលពីល្ងាចថ្ងៃទី២៥ ខែកញ្ញានេះ បានមានប្រសាសន៍ថា៖
អាជ្ញាធរខេត្តនឹងផ្សព្វផ្សាយសេចក្តីជូនដំណឹង ពីផែនការខាងលើនេះដល់ប្រជាពលរដ្ឋដែលកំពុងរស់នៅលើផ្ទះបណ្តែតទឹកក្នុងទន្លេទូទាំងខេត្ត ដើម្បីចូលរួមអនុវត្ត ផែនការ៥ឆ្នាំរបស់ខេត្តគឺពីឆ្នាំ២០១៥ ដល់២០១៩ ឲ្យទទួលបានជោគជ័យ។ ក្នុងនោះអ្នករស់នៅលើផ្ទះបណ្តែតទឹក ទាំងអស់ រួមមានចំណុចចុងកោះ ក្នុងក្រុងកំពង់ឆ្នាំង ,ឃុំឆ្នុកទ្រូ ក្នុងស្រុកបរិបូរណ៍, ឃុំកោះថ្កូវ និងឃុំពាមឆ្កោក ស្រុកជលគីរី, ឃុំសែប និងឃុំតាជេស ក្នុងស្រុកកំពង់ត្រឡាច និងស្រុកកំពង់លែងផងដែរ។
អ្នករស់នៅទាំងនោះ ត្រូវបន្លាស់ទីទៅរស់នៅលើទីតាំងមួយកន្លែង ស្ថិតក្នុងឃុំស្វាយជ្រុំ ស្រុករលាប្អៀរ។ យ៉ាងនេះក្តី លោកអភិបាលរងខេត្ត បានមានប្រសាសន៍ថា ការអនុវត្តនឹងចាប់ផ្តើមជាជំហានៗ ដោយចាប់ពីក្រុងកំពង់ឆ្នាំងមុនគេ និងបន្ទាប់ឃុំកោះថ្កូវ ឃុំពាមឆ្កោក ដែលអាចអូសតាមបណ្តោយទឹកទន្លេ ហើយជំហានបន្ទាប់ ឃុំឆ្នុកទ្រូជាដើម។ តាមផែនការរបស់សាលាខេត្ត ការបន្លាស់ទីផ្ទះបណ្តែតទឹកនេះ គឺធ្វើក្នុងឆ្នាំ២០១៩នោះទេ បន្តែដោយសារស្ថានភាពអំណោយផល ទឹកទន្លេឆ្នាំនេះឡើងខ្ពស់ យើងអាចអូសផ្ទះបណ្តែតទឹកទាំងនោះមកនៅទីតាំងដែលបានរៀបចំទុក ហើយនៅពេលទឹកស្រកពួកគាត់រស់នៅទីនោះតែម្តង។
សូមបញ្ជាក់ដែរថា សម្រាប់ប្រជាពលរដ្ឋ រស់នៅលើផ្ទះបណ្តែតទឹកទូទាំងខេត្តកំពង់ឆ្នាំង មានប្រមាណជាង៣ពាន់គ្រួសារ ក្នុងនោះនៅក្រុងកំពង់ឆ្នាំង មានជាង១ពាន់គ្រួសារ និងនៅស្រុកបរិបូរណ៍ ស្រុកកំពង់ត្រឡាច ស្រុកជលគីរី រួមនឹងកំពង់លែង មានប្រមានជាង២ពាន់គ្រួសារ។ ប្រជាពលរដ្ឋទាំងនោះ នឹងត្រូវឲ្យមករស់នៅក្នុងឃុំស្វាយជ្រុំ ស្រុករលាប្អៀរ ដែលអាជ្ញាធរខេត្តនឹងស្នើសុំកាត់ដីអនុប្រយោគ ដីព្រៃលិចទឹក ពីរាជរដ្ឋាភិបាល មានទំហំប្រមាណជាង៤០ហិកតា។
គណៈកម្មការរៀបចំអូសផ្ទះបណ្តែតទឹក ក្នុងផែនការនេះមានចំនួន៦ក្រុម ក្នុង១ក្រុមដឹកនាំដោយ លោក ស៊ុន សុវណ្ណារិទ្ធ អភិបាលរងខេត្ត និងគណៈកម្មការ៥ក្រុមទៀត គឺដឹកនាំដោយលោកស្នងការនគបារលខេត្ត ជាប្រធាន និងអភិបាលស្រុកពាក់ពន្ធ័ជាអនុប្រធាន នៅក្នុងការផ្លាស់ទីផ្ទះបណ្តែតទឹកទាំងអស់នេះ៕
ចែករំលែកព័តមាននេះ