ខេត្តប៉ៃលិន ៖ កន្លែងចិញ្ចឹមមាន់លក្ខណៈធម្មជាតិមួយកន្លែងក្នុងក្រុងប៉ៃលិនរបស់កសិករម្នាក់កំពុងទទួលបានផលសម្រាប់ជីវភាពរស់នៅប្រចាំថ្ងៃដោយសារ មានពូជមាន់ល្អៗ មិនសូវកើតមានជំងឺផ្សេងៗ ជាពិសេសក្នុងមួយវគ្គៗអាចរកបានប្រាក់ចំណូលចាប់ពី២ទៅ៣លានរៀល ។ បុរសម្នាក់ឈ្មោះ ស៊ិម បូរ៉ា…
ខេត្តប៉ៃលិន ៖ កន្លែងចិញ្ចឹមមាន់លក្ខណៈធម្មជាតិមួយកន្លែងក្នុងក្រុងប៉ៃលិនរបស់កសិករម្នាក់កំពុងទទួលបានផលសម្រាប់ជីវភាពរស់នៅប្រចាំថ្ងៃដោយសារ មានពូជមាន់ល្អៗ មិនសូវកើតមានជំងឺផ្សេងៗ ជាពិសេសក្នុងមួយវគ្គៗអាចរកបានប្រាក់ចំណូលចាប់ពី២ទៅ៣លានរៀល ។
បុរសម្នាក់ឈ្មោះ ស៊ិម បូរ៉ា អាយុ៣៧ឆ្នាំ ជាអ្នកចិញ្ចឹមមាន់ស្រែជាលក្ខណៈធម្មជាតិ រស់នៅភូមិកូនភ្នំ សង្កាត់អូរតាវ៉ៅ ក្រុងប៉ៃលិន បានឱ្យដឹងថា បច្ចុប្បន្នលោកបានធ្វើកសិដ្ឋានចិញ្ចឹមមាន់ស្រែ ដោយប្រពន្ធជាអ្នកលក់ដូរនៅក្នុងផ្សារសាមគ្គីហៅ ប៉ាហ៊ី ។ ប្រភពបន្តទៀតថា គាត់ចិញ្ចឹមមាន់ស្រែចំនួន៧០០ក្បាល ដោយក្នុងនោះមានមាន់ម្យ៉ាង គេហៅ ហ្គិច ដែលជាប្រភេទមាន់បរទេស ។
ការចិញ្ចឹមមាន់ស្រែនេះគាត់រៀនតាមប្រព័ន្ធអ៊ិនធើណែត (You tube) រហូតដល់ដឹងពីរបៀបចិញ្ចឹមទើបបន្ទាប់មកក៏បើកកន្លែងចិញ្ចឹមមាន់ខ្លូនឯងតែម្តងរួចទៅរៀនបន្តនៅកសិដ្ឋានមួយកន្លែង ក្នុងខេត្តកំពង់ចាម ។ ការចិញ្ចឹមមាន់ស្រែទាំងនេះដំបូងគាត់ត្រូវរកទីតាំងសាងសង់រោងព្រមទាំងរកពូជមាន់ល្អៗមកដាក់ចិញ្ចឹមជាបន្តបន្ទាប់ ដើម្បីឲ្យបានកូនល្អមិនសូវមានជំងឺអ្វីកើតឡើង ជាពិសេសត្រូវការអនាម័យទ្រង់ជាញឹកញាប់បំផុត បើមិនឧស្សាហ៍ទេ នោះមាន់នឹងកើតជំងឺច្រើន ហើយក៏ឈឺងាប់ផងដែរ ។
គាត់បញ្ជាក់ថា ការប្រកបរបរចិញ្ចឹមមាន់ស្រែពិតជាធ្វើឲ្យជីវភាពគ្រួសាររបស់លោកកាន់តែប្រសើរឡើងជាងមុន ព្រោះលក់បានថ្លៃដោយកាលពីអំឡុងពេលសែនក្បាលទឹក លោកលក់មាន់បាន១គីឡូក្រាម តម្លៃ១៨០០០រៀល ។ ប្រសិនជាបោចរោមរួចលក់បានតម្លៃ២៥០០០រៀលឯណោះ ។ លើសពីនេះក្នុងមួយវគ្គៗមានរយៈពេលចំនួន៣ខែលក់បានថវិកាចំនួន២លានទៅ៣លានរៀលដែរ ។ ហើយគាត់រំពឹងទុកថា នៅថ្ងៃបុណ្យភ្ជុំបិណ្ឌខាងមុខនេះ អាចនឹងរកចំណូលពីការចិញ្ចឹមមាន់ស្រែច្រើនដែរ ។ តែគាត់មិនលក់ចេញទាំងអស់នោះទេ ដោយសារមានម៉ូយចូលទៅទិញពូជមាន់យកចិញ្ចឹមបន្ត នៅតាមផ្ទះមួយចំនួនទៀត តែបើលក់ទាំងអស់អាចបានច្រើនបន្ថែមទៀត ។
គាត់បញ្ជាក់ថា របៀបចិញ្ចឹមមាន់នេះដំបូងគាត់យកពងមាន់ទៅភ្ញាស់ក្នុងទូម៉ាស៊ីនដែលមានរយៈពេលពីរថ្ងៃទើបញាស់ បន្ទាប់មកយកទៅចាក់វ៉ាក់សាំងការពារជំងឺ រួចយកទៅដាក់ក្នុងទូកំដៅជំនួសមេមាន់ ព្រមទាំងឲ្យចំណីស៊ី ដោយដាក់តាមអាយុកាលរបស់កូនមាន់ទៅតាមទូនីមួយៗ ។ សម្រាប់កូនមាន់តូចៗដាច់ចំណីឱ្យស៊ី រយៈពេលមួយខែ គឺឲ្យចំណីដូចមាន់ធំដែរ ដោយចំណីមាន់ទាំងនោះមានដូចជា គ្រាប់ពោត ម្ហូបអាហាផ្ទះបាយលាយឲ្យស៊ីបន្តិចម្តងៗ ហើយអាចចាប់លក់បានក្នុងរយៈពេល៣ខែកន្លះ ដោយមាន់មួយក្បាលមានទម្ងន់ចាប់ពីមួយគីឡូកន្លះឡើងទៅ ។
ជាមួយគ្នានេះដែរមានបញ្ហាប្រឈមមួយចំនួនពាក់ព័ន្ធទៅនឹងអាកាសធាតុអាចឲ្យមាន់មានជំងឺផ្សេងៗ ។ ប៉ុន្តែអាចធ្វើការពិនិត្យឲ្យដិតដល់ព្រមទាំងការចាក់ថ្នាំវ៉ាក់សាំង គឺវាមិនមានបញ្ហាអ្វីនោះទេ តែដោយសារគាត់មើលថែដិតដល់អត់មានបញ្ហាអ្វីធ្ងន់ធ្ងរនោះទេ ៕
ចែករំលែកព័តមាននេះ