រាជធានីភ្នំពេញ ៖ បម្រាម និងការព្រមានរបស់ក្រសួងវប្បធម៌ និងវិចិត្រសិល្បៈចំពោះអ្នកសិល្បៈ៥ដួងធ្វើឲ្យមានការចាប់អារម្មណ៍ជាទូទៅ និងមានទស្សនៈ ផ្សេងៗគ្នា ។ ក្រសួងវប្បធម៌ និងវិចិត្រសិល្បៈបានចេញលិខិតបម្រាម…
រាជធានីភ្នំពេញ ៖ បម្រាម និងការព្រមានរបស់ក្រសួងវប្បធម៌ និងវិចិត្រសិល្បៈចំពោះអ្នកសិល្បៈ៥ដួងធ្វើឲ្យមានការចាប់អារម្មណ៍ជាទូទៅ និងមានទស្សនៈ ផ្សេងៗគ្នា ។ ក្រសួងវប្បធម៌ និងវិចិត្រសិល្បៈបានចេញលិខិតបម្រាម និងព្រមានដល់តារា៥ដួង គឺលោកអ៊ែន ឌី អ្នកនាងស្រីម៉ុច កញ្ញាពេជ្រ អាវីហ្សា កញ្ញារតនៈ ពិសី និងកញ្ញាសេង សូណា ។
ក្នុងចំណោមតារាទាំង៥ដួងនោះមានតែ សេង សូណា មួយគត់ដែលរងការពិន័យធ្ងន់ជាងគេ គឺត្រូវក្រសួងវប្បធម៌ហាមឃាត់មិនឲ្យបន្តប្រឡូកក្នុងអាជីពសិល្បៈរយៈពេលមួយឆ្នាំ ខណៈពេលដែលតារាផ្សេងទៀតត្រឹមតែព្រមានប៉ុណ្ណោះ ។
ការចេញបម្រាម និងព្រមានពីក្រសួងវប្បធម៌នេះនាំឲ្យមានទស្សនៈផ្សេងគ្នាបានលើកឡើងទាំងអ្នកធ្វើការក្នុងវិស័យសិល្បៈ និងអ្នកសិល្បៈ ជាពិសេសភាគីដែលជាសាមីខ្លួន។ អ្នកដឹកនាំរឿងលោកមុត ថារី បានលើកឡើងថា បម្រាមរបស់ក្រសួងនាពេលនេះគឺចេញឡើង ដោយមានតារាមួយចំនួនគឺមិនបានប្រឡូកក្នុងសិល្បៈទៀតទេ ហើយតារាខ្លះទៀតគឺកំពុងតែប្រឡូកក្នុងសិល្បៈ។
លោកបញ្ជាក់ថា «ការបញ្ចេញនូវភាពសិចស៊ីរបស់ពួកគេនោះគឺតាមរយៈអ្វី ហើយពួកគាត់បង្ហាញតាមរយៈការសម្តែង នោះគឺជារឿងសោកស្តាយ ។ ប្រសិនករណីរឿងដែលគាត់កំពុងសម្តែង ហើយរឿងមិនទាន់បានចាក់ផ្សាយហើយបម្រាមបានចេញហាមចំពោះរូបគាត់ នោះវាមានបញ្ហាសម្រាប់អ្នកដែលធ្វើការនៅក្នុងវិស័យភាពយន្ត ។
ការចេញបម្រាមពីក្រសួងវប្បធម៌នេះក៏ជាការល្អមួយដែរ ព្រោះជាការដាស់តឿនទៅដល់សិល្បករដទៅទៀតកុំប្រព្រឹត្តដូចគ្នានោះ ប៉ុន្តែយើងក៏គួរឈ្វេងយល់ពីការបញ្ចេញនូវភាពសិចស៊ីរបស់ពួកគេតាមរយៈអ្វី ។ ប្រសិនបើពួកគេបង្ហាញតាមរយៈហ្វេសប៊ុកនោះដូចជាមិនខុសទេ ព្រោះវាជាសិទិ្ធរបស់គេ កុំឲ្យតែគាត់បង្ហាញក្នុងខ្សែភាពយន្តដែលគាត់បានសម្តែង ឬក៏គាត់ឡើងឆាកស្លៀកពាក់សិចស៊ីនោះជារឿងមួយផ្សេង ។
ការបង្ហាញនូវភាពសិចស៊ីនៅក្នុងការសម្តែងនោះវាពិតជាធ្វើប៉ះពាល់យ៉ាងខ្លាំងដល់វិស័យសិល្បៈ ហើយប្រសិនបើមានសកម្មភាពសម្តែងបែបសិចស៊ីនៅក្នុងរឿងនោះក្រសួងគួរព្រមានទៅលើផលិតករ ប៉ុន្តែបើគាត់ឡើងឆាកមានបំណងបញ្ចេញនូវភាពសិចស៊ីគឺជារឿងត្រូវព្រមានគាត់ ឬក៏អ្នកដឹកនាំកម្មវិធី ព្រោះយើងអាចហាមឃាត់បានបើសិនជាមើលឃើញពីភាពមិនត្រឹមត្រូវណាមួយនោះ »។
តារាចម្រៀង និងជាអតីតប្រធានសមាគមសិល្បករខ្មែរលោកសុះ ម៉ាច បានលើកឡើងថា បម្រាមនេះគឺជាការត្រឹមត្រូវព្រោះក្រសួងបានគិតគូរពីផលប៉ះពាល់នានាដែលបានជះឥទ្ធិពលមកលើតម្លៃនៃសិល្បៈ វប្បធម៌ខ្មែរយើង។ លោកបញ្ជាក់ថា «អ្នកសិល្បៈគឺជាបុគ្គលសាធារណៈ ដូចនេះនៅពេលដែលសម្តែងចេញទៅគឺត្រូវធ្វើជាគំរូល្អសម្រាប់ជាប្រយោជន៍ និងការអប់រំដល់អ្នកទស្សនា ។
ករណីនាពេលនេះហាក់មានភាពចម្លែកបន្តិចដោយសារតែក្រសួងមិនបានកោះហៅតារាទាំងនោះឲ្យចូលខ្លួនណែនាំ ដូចជាករណីរបស់នាងដេននី ក្វាន់ នាពេលកន្លងទៅ។ ក្នុងករណីនេះខ្ញុំយល់ថា គឺជាកំហុសមួយ ក្នុងនាមជាក្រសួងអាណាព្យាបាល ប្រសិនបើឃើញកូនខុសគួរហៅកូនមកណែនាំ ហើយប្រសិនបើយើងបានណែនាំហើយ កូននៅតែមិនស្តាប់ទៀតនោះ យើងពិន័យទៅវាមិនខុសទេ ។
បើមិនទាន់ណែនាំគ្នាផង ហើយដាក់ពិន័យនោះ គឺគ្នាមិនអាចទទួលយកបានឡើយ ព្រោះមនុស្សណាដែលមិនចេះខុស ហើយបើឃើញខុសហើយមិនណែនាំទៀត នោះជារឿងមួយផ្សេង »។
បើតាមលោកសុះ ម៉ាច ក្នុងករណីនេះក្រសួងគួរហៅតារាដែលធ្លាប់បង្ហាញភាពសិចស៊ីទាំងអស់ទៅណែនាំ ដើម្បីឲ្យមានភាពយុត្តិធម៌ ចៀសវាងនូវការរិះគន់ និងការមិនអាចទទួលយកបានពីសាមីខ្លួន ។
ជាសំណូមពររបស់លោកសុះ ម៉ាច គឺសុំឲ្យស្ថាប័នពាក់ព័ន្ធមុននឹងឈានដល់ការពិន័យចំពោះតារាណាម្នាក់ដែលបានប្រព្រឹត្តខុសឆ្គងនោះគួរតែមានការស៊ើបអង្កេតឲ្យបានជាក់លាក់ជាមុន ព្រោះពេលខ្លះរូបភាព និងសកម្មភាពទាំងនោះវាបានកើតឡើងជាយូរឆ្នាំមកហើយ ហើយមកដាក់ទោសនាពេលនេះគឺមិនត្រឹមត្រូវឡើយ ។
ក្នុងនាមជាអ្នកសិល្បៈម្នាក់ដែរលោកសុះ ម៉ាច ស្នើឲ្យអ្នកសិល្បៈគ្រប់រូបគួរធ្វើយ៉ាងណានាំគ្នាលើកស្ទួយវិស័យសិល្បៈឲ្យបានរុងរឿង មិនត្រូវធ្វើអ្វីដែលនាំឲ្យប៉ះពាល់ និងអាប់ឱនដល់សិល្បៈខ្មែរដ៏ថ្លៃថ្លានោះទេ ។
ចំពោះមហាជនវិញ អ្នកខ្លះគាំទ្រចំណាត់ការរបស់ក្រសួងវប្បធម៌ និងវិចិត្រសិល្បៈ ដោយថាធ្វើបែបនេះដើម្បីកុំឲ្យអ្នកសិល្បៈធ្វើឲ្យខូចតម្លៃប្រពៃណី វប្បធម៌ជាតិ ។
ចំណែកអ្នកខ្លះទៀតថាជាការចង្អៀតចង្អល់ចំពោះអ្នកសិល្បៈគ្រាន់តែការស្លៀកពាក់សិចស៊ី ដែលសម័យកាលនេះវាស្ទើរតែជារឿងធម្មតាទៅហើយ ។ ដោយឡែកអ្នកខ្លះទៀតថាក្រសួងត្រឹមតែហៅពួកគេទៅណែនាំបានហើយ មិនគួរបង្អាក់អាជីពពួកគេទេ ព្រោះពួកគេបានប្រាក់ចិញ្ចឹមជីវិតដោយអាជីពនេះ បើបង្អាក់អាជីពតើរស់ដូចម្តេចទៅ ។
តារាសម្តែងកញ្ញាពេជ្រ អាវីហ្សា ដែលជាតារាម្នាក់ក្នុងចំណោមតារា៤ដួងដែលត្រូវទទួលរងការពិន័យនោះធ្លាប់បានអះអាងថា ចាប់តាំងពីនាងបានឃើញព័ត៌មានពាក់ព័ន្ធនូវបញ្ហានេះនាងក៏បានបញ្ឈប់ភាពសិចស៊ីរបស់នាងទៀតដែរ។ បច្ចុប្បន្នរូបនាងមិនសូវបានចូលរួមនៅក្នុងកម្មវិធីសិល្បៈ ក៏ដូជាការសម្តែង ផ្សេងៗទៀតទេ ដោយសារតែនាងជាប់រវល់រកស៊ី ហើយបន្ទាប់ពីនាងបានថតបទជាមួយលោកអ៊ែន ឌី នោះមកនាងក៏មិនបានបញ្ចេញភាពសិចស៊ីអ្វីទៀតដែរ។
តារាសម្តែងលោកអ៊ែន ឌី ធ្លាប់បានអះអាងដែរថា បើទោះបីជាមានការព្រមានពីក្រសួងលោកនឹងនៅតែបន្តថតដូចមុនទៀត នៅពេលដែលមានបទថ្មី តែក៏មិនធ្វើឱ្យហួសហេតុ ប៉ះពាល់ដល់ប្រពៃណីខ្មែរឡើយ គឺសម្តែងក្នុងលក្ខណៈជាសិល្បៈនៃការថត MV ប៉ុណ្ណោះ ។
អតីតារាសម្តែងអ្នកនាងស្រីម៉ុច ធ្លាប់បានអះអាងចំពោះក្រសួងវប្បធម៌ដែលគ្រោងកោះហៅនាងព្រមានថា ជាការមិនសមហេតុផល ហើយវាប៉ះពាល់ដល់សិទ្ធបុគ្គលនាងយ៉ាងខ្លាំង ។ នាងបញ្ជាក់ថា«ខ្ញុំមិនមែនជាតារាទេ សូមជួយធ្វើអ្វីម្យ៉ាងឲ្យពួកយើងបានស្ងប់ផង ថាពួកយើងច្រួលច្របល់យ៉ាងណាអំពីរឿងនេះ ។ រឿងវិសយ័សិល្បៈគេវិញមិនបាច់និយាយ ឯងវិញ នេះក៏មិនបាន នោះក៏មិនបាន ហត់ចិត្ត ! គេវិញបើថាសិចស៊ីសឹងថាស្រាត មើលរឿងកុនពួកគេមើល »។
ចំណែកនាងរតនៈ ពិសី បានបង្ហោះសារដោយខ្លីតាមហ្វេសប៊ុកថា «ហួសចិត្ដខ្លាំង …! ចង់វិលទៅកើតនៅសម័យលង្វែកវិញ ពាក់អាវអត់ដៃអត់ខ្សែបានគ្រប់គ្នា » ។
ចំពោះកញ្ញាសេង សូណា ដែលរងការពិន័យធ្ងន់ជាងគេវិញបានកើតទុក្ខមិនសុខចិត្ត និងបានស្នើឲ្យក្រសួងវប្បធម៌សើរើឡើងវិញចំពោះតារាណាដែលធ្លាប់ថតសិចស៊ី ហើយហៅទៅណែនាំ៕
ចែករំលែកព័តមាននេះ