ខេត្តបន្ទាយមានជ័យ ៖ គ្រោះថ្នាក់ចរាចរណ៍លើផ្លូវរថភ្លើងបានកើតមានផ្ទួនៗ២ដងក្នុងចំណុចភូមិតែមួយ ដែល កាលពីព្រឹកថ្ងៃ២២ ខែកញ្ញា រថភ្លើងបានកៀរបុរសរើសអេតចាយម្នាក់រងរបួស និងនៅរសៀលថ្ងៃ២៣ ខែកញ្ញា រថភ្លើងក៏បុករថយន្តស្ទូច ។ ហេតុការណ៍ខាងលើ កើតឡើងនៅភូមិអូរជ្រៅ សង្កាត់ប៉ោយ
ប៉ែត ក្រុងប៉ោយប៉ែតមុខបុរីធីធី និងមុខបុរីហ៊ុយឡេង ។
តាមប្រភពព័ត៌មានថា កាលពីព្រឹកថ្ងៃ២២ ខែកញ្ញា ហេតុការណ៍គ្រោះថ្នាក់បានកើតឡើងនៅវេលាម៉ោង ជាង១១ព្រឹក ខណៈបុរសចំណាស់ម្នាក់អាយុ៧២ឆ្នាំ កំពុងដើររើសអេតចាយក្បែរផ្លូវរថភ្លើង ក៏ត្រូវរថភ្លើងដែលបើកបរមកពីខាងកើត កៀរដួលរងរបួសក្បាលនៅមុខបុរីធីធី។ ការពិតអ្នកខុសមិនមែនរថភ្លើងទេ តែអ្នកដើរក្បែរផ្លូវដែកដែលខុស ។
ជនរងគ្រោះឈ្មោះ ឈួន រស់នៅភូមិបាលិលេយ្យ២ សង្កាត់ប៉ោយប៉ែត ជាមនុស្សថ្លង់ទើបមិនឮស្នូររថភ្លើងឬសំឡេងស៊ីផ្លេពីចម្ងាយ ។ដោយឡែក នៅរសៀលថ្ងៃទី២៣ ខែកញ្ញា រថភ្លើងបានបុករថយន្តស្ទូច១គ្រឿងដែលកំពុងបើកឆ្លងកាត់ផ្លូវដែកពីទិសខាងជើងទៅទិសខាងត្បូង ។ ករណីទី២នេះត្រូវបាននគរបាលចរា ចរណ៍ក្រុងប៉ោយប៉ែតអះអាងថា ពុំមានអ្នករងរបួសទេ ដោយសាររថភ្លើងបើកយឺត ហើយរថយន្តស្ទូចបានត្រឹមតែផ្អៀងបន្តិចប៉ុណ្ណោះ ព្រោះឆ្លងជិតផុតទៅហើយ ។
ដើម្បីបញ្ចៀសគ្រោះថ្នាក់ កុំឲ្យកើតមានដដែលៗតទៅទៀត ពេលនេះអាជ្ញាធរបានអំពាវនាវដល់ម្ចាស់បុរីនីមួយៗ ត្រូវដាក់សន្តិសុខយាមតាមចំណុចផ្លូវចូលដែលឆ្លងកាត់ផ្លូវដែកដើម្បីធ្វើចរាចរណ៍ ឬហាមឃាត់អ្នកធ្វើដំណើពេលមានរថភ្លើងឆ្លងកាត់ ៕
ចែករំលែកព័តមាននេះ