ខេត្តបន្ទាយមានជ័យ ៖ កាលពីរសៀលថ្ងៃទី២២ កញ្ញា ២០១៨ ជនសង្ស័យប្រុសស្រី៧នាក់ ដែលពាក់ព័ន្ធជួញដូរចែកចាយ និងប្រើប្រាស់គ្រឿងញៀន ត្រូវបានបង្ហាញមុខជាសាធារណៈនៅ អធិការដ្ឋាននគរបាលស្រុកថ្មពួកក្រោយការបង្ក្រាបរួមទាំងវត្ថុតាងថ្នាំញៀនជាច្រើនផងដែរ។ ជនសង្ស័យទាំង៧នាក់ រួមមាន៖ ១.ឈ្មោះ ឃឿន ស្រីមិន ភេទស្រី អាយុ៣៧ឆ្នាំ មានទីលំនៅភូមិប្រាសាទត្បែង ឃុំបន្ទាយឆ្មារ ស្រុកថ្មពួក(ជួញដូរ), ២.ឈ្មោះ គៀត ប៊ុត ភេទប្រុស អាយុ៣៧ឆ្នាំ ស្នាក់នៅភូមិសាមគ្គី ឃុំគោករមៀត ស្រុកថ្មពួក(ចែកចាយ), ៣.ឈ្មោះ រ៉ាក់ ណាវី ភេទស្រី អាយុ២៩ឆ្នាំ (ស្រីស្នេហ៍របស់ជនសង្ស័យ គៀត ប៊ុត), ៤.ឈ្មោះ ឃឹម ចាន់ ភេទប្រុស អាយុ៤៦ឆ្នាំ រស់នៅក្នុងភូមិសាមគ្គី ឃុំគោករមៀត ស្រុកថ្មពួក(ប្រើប្រាស់), ៥.ឈ្មោះ សុខ សៃ ភេទប្រុស អាយុ៣៩ឆ្នាំ ៦.ឈ្មោះ ហ៊ាំង សុភ័ក្រ ភេទប្រុស អាយុ២៨ឆ្នាំ និង៧.ឈ្មោះ សូត្រ តឿ ភេទប្រុស អាយុ១៨ឆ្នាំ ទាំង៣នាក់ចុងក្រោយនេះរស់នៅភូមិដងរ៉ែក ឃុំបន្ទាយឆ្មារ ស្រុកថ្មពួក(ចែកចាយ)។
នគរបាលស្រុកថ្មពួកប្រាប់ថា ករណីបង្ក្រាបនេះធ្វើឡើងជាបន្តបន្ទាប់តាំងពីរសៀលថ្ងៃទី២១ រហូតដល់រសៀលថ្ងៃទី២២ កញ្ញា ២០១៨ ដោយមានការចូលរួមសហការពីអាជ្ញាធរមូលដ្ឋាន នគរបាលការពារព្រំដែនគោកលេខ៨០៧ ក្រោយអនុវត្តតាមបទបញ្ជាពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត និងមានការអនុលោមពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត ធ្វើឡើង៣កន្លែងផ្សេងគ្នា ក្នុងឃុំគោលរមៀត និងឃុំបន្ទាយឆ្មារ។ សមត្ថកិច្ចប្រាប់ថា ដំបូងឃាត់ខ្លួនជនសង្ស័យប្រើប្រាស់ថ្នាំញៀនចំនួន៣នាក់ (ជនសង្ស័យទី៥,៦,៧) នៅក្នុងភូមិសាស្ត្រឃុំបន្ទាយឆ្មារ លុះសាកសួរបានចម្លើយក៏ឈានទៅពួនស្ទាក់ចាប់បានជនសង្ស័យ ដែលចែកចាយថ្នាំញៀន និងស្រីស្នេហ៍លើដងផ្លូវជាតិលេខ៥៨ ក្នុងភូមិអូរកំបុត ឃុំគោករមៀត គឺឈ្មោះ គៀត ប៊ុត និង រ៉ាក់ ណាវី។
ក្នុងនោះរកឃើញម្សៅក្រាមពណ៌សថ្លា សង្ស័យមានសារធាតុញៀន ចំនួន៥កញ្ចប់តូច និងថ្នាំញៀនមេតំហ្វេតាមីន ពណ៌ផ្កាឈូក (WY)10គ្រាប់ រុំក្នុងក្រដាស់ជូតមាត់ បោះចោលលើដងផ្លូវក្បែរកន្លែងកើតហេតុ។ លុះឆែកឆេរទីតាំងស្នាក់នៅរបស់ជនសង្ស័យ (គៀត ប៊ុត) រកឃើញថ្នាំញៀមេតំហ្វេតាមីនពណ៌ផ្កាឈូក(WY) ចំនួន៨គ្រាប់ លាក់ទុកក្រោមកន្ទេលដេក និងម្សៅក្រាមពណ៌សថ្លា សង្ស័យមានសារធាតុញៀន៣កូនថង់តូច ទុកក្នុងស្រោមដៃ លាក់នៅនឹងជញ្ជាំង ដបកែច្នៃជក់ថ្នាំញៀន១ ហើយឃាត់ខ្លួនជនសង្ស័យប្រើប្រាស់ម្នាក់ឈ្មោះ ឃឹម ចាន់។
លុះព្រឹកថ្ងៃទី២២ កញ្ញា ២០១៨ សមត្ថកិច្ចឈានទៅឃាត់ខ្លួនស្ត្រីមុខសញ្ញាជួញដូរឈ្មោះ ឃឿន ស្រីមិន នៅភូមិប្រាសាទត្បែង ឃុំបន្ទាយឆ្មារ ពេលឆែកឆេរលំនៅដ្ឋានរកឃើញថ្នាំញៀនមេតំហ្វេតាមីន ពណ៌ផ្កាឈូក (WY) ៣ថង់ស្មើនឹង៦០០គ្រាប់ (ខៀវ៧គ្រាប់) ម្សៅក្រាមពណ៌សថ្លា សង្ស័យមានសារធាតុញៀន៦កញ្ចប់តូច លាក់ទុកក្នុងធាងត្នោត ថ្នាំញៀនមេតំហ្វេតាមីន ពណ៌ផ្កាឈូក (W) ១ថង់ទៀត ចំនួន១១គ្រាប់ និងកន្លះគ្រាប់ច្រកក្នុងបំពង់បឺត២កំណាត់ និងម្សៅក្រាមពណ៌សថ្លាច្រកក្នុងបំពង់បឺត១២កំណាត់ រួមទាំងប្រាក់បាត ប្រាក់រៀលមួយចំនួន និងទូរស័ព្ទចំនួន១៩គ្រឿង លាក់ទុកនៅចង្ក្រានបាយ។ លោកវរសេនីយ៍ សៅ សារឿន អធិការនគរបាលស្រុកថ្មពួកប្រាប់ថា ជនសង្ស័យ និងវត្ថុតាងក្រោយសាកសួរបានកសាងសំណុំរឿង បញ្ជុនទៅការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ