ខេត្តសៀមរាប ៖ ភ្ញៀវទេសចរជាតិ និងអន្តរជាតិរាប់ពាន់នាក់មកមើលថ្ងៃរះចំកំពូលកណ្តាល ប្រាសាទអង្គរវត្តនាព្រលឹមស្រាងៗ នៅថ្ងៃទី២៣ ខែកញ្ញា ឆ្នាំ២០១៨ នៅក្នុងខេត្តសៀមរាប ដើម្បីនាំគ្នាថតផ្តិតយករូបភាពរបស់ថ្ងៃរះមួយនេះជាមួយប្រាសាទអង្គរវត្តដ៏ស្អាតអស្ចារ្យមិនធ្លាប់មាននៅលើសកលលោក ។
គួរបញ្ជាក់ផងដែរថា តាមការសិក្សារបស់អ្នកស្រាវជ្រាវរបស់មជ្ឈមណ្ឌលស្រាវជ្រាវ និងតម្កល់ឯកសារអង្គរនៃអាជ្ញាធរជាតិអប្សរាបានបញ្ជាក់ថា សមរាត្រីនារដូវវស្សាឆ្នាំ២០១៨នេះនឹងត្រូវ រះចំកំពូលកណ្តាលនៃអង្គរវត្ត នាព្រឹកព្រលឹមស្រាងៗត្រូវនឹងថ្ងៃអាទិត្យ ថ្ងៃទី២៣ ខែកញ្ញា ឆ្នាំ២០១៨ បានមកដល់ហើយ ព្រមទាំងមានភ្ញៀវជាតិ និងអន្តរជាតិរាប់ពាន់នាក់ បើប្រៀបធៀប ឆ្នាំ២០១៧ ច្រើនជាងមុន ។
បញ្ជាក់ផងដែរថា ជារៀងរាល់ឆ្នាំសមរាត្រី (Equinox) តែងតែកើតមាន២ដង គឺនៅរដូវប្រាំង (Vernal Equinox) កើតទ្បើងនៅខែមីនា និងសមរាត្រីរដូវវស្សា (Autumnal Equinox) កើតទ្បើងនៅខែកញ្ញា ។ សមរាត្រីជាវេលាមួយដែលថ្ងៃនិងយប់មានរយៈពេលស្ទើរតែស្មើៗគ្នា ។ ក្រៅពីនេះខែខ្លះថ្ងៃមានរយៈពេលវែងជាងយប់ ហើយខ្លះទៀតយប់មានរយៈពេលវែងជាងថ្ងៃវិញ ។
ករណីពិសេសនៅអង្គរវត្តវេលាថ្ងៃ និងយប់មានរយៈពេលស្មើគ្នានេះព្រះអាទិត្យតែងតែរះទ្បើងចំកំពូលកណ្តាលនៃអង្គរវត្តនាព្រឹកព្រលឹមស្រាងៗ ។ ចំពោះសមរាត្រីរដូវវស្សានៅថ្ងៃទី២៣ ខែកញ្ញានេះ ព្រះអាទិត្យនឹងរះទ្បើងចំកំពូលកណ្តាលដែលយើងអាចមើលឃើញពីក្លោងទ្វារកណ្តាលនៃគុកតារាជ (ក្លោងទ្វារធំខាងលិច) ចាប់ម៉ោង៥និង៥០នាទីដល់ម៉ោងប្រហែល៧ព្រឹក ថ្ងៃដដែល ។
សបញ្ជាក់ឱ្យឃើញថា ថ្ងៃរះនារដូវវស្សាឆ្នាំ២០១៨ នេះពិតជាមានភ្ញៀវជាតិ និងអន្តរជាតិចូលរួមច្រើនកុះករជាងមុនដែលនាំគ្នាមកផ្តិតយករូបភាពរបស់ថ្ងៃរះចំកំពូលកណ្តាលប្រាសាទអង្គរវត្ត ដ៏ស្អាតអស្ចារ្យធ្វើឱ្យពួកគាត់មានការសប្បាយរីករាយសម្រាប់ការថតផ្តិតយករូបភាពថ្ងៃរះនេះ ៕
ចែករំលែកព័តមាននេះ