រាជធានីភ្នំពេញ ៖ ការសាងសង់ទីក្រុងនាសតវត្សរ៍ទី២១នេះកាន់តែមានការគិតគូរខ្លាំងឡើងពីនិរន្តរភាពបរិស្ថាន ការកាត់បន្ថយការបំពុលខ្យល់ និងសំឡេងយានយន្ត ដើម្បីធ្វើឲ្យការរស់នៅរបស់ប្រជាពលរដ្ឋកាន់តែមានភាពសុខដុម ។
នៅក្នុងអំឡុងពេលកិច្ចប្រជុំកំពូលអាស៊ានលើកទី៣២ ដែលបានប្រារព្ធធ្វើឡើងនៅប្រទេសសិង្ហបុរីកាលពីខែមេសាកន្លងទៅ ទីក្រុងរបស់កម្ពុជាចំនួន៣រួមមាន រាជធានីភ្នំពេញ សៀមរាប និងខេត្តបាត់ដំបងត្រូវបានជ្រើសរើសជាបណ្តាញទីក្រុងឆ្លាតអាស៊ាន(Smart City) បន្ទាប់ពីមេដឹកនាំទាំងអស់នៃប្រទេសជាសមាជិកបានឯកភាពលើគំនិតផ្តួចផ្តើមឲ្យមានទីក្រុងឆ្លាតវៃ ដែលស្នើឡើងដោយនាយករដ្ឋមន្ត្រីសិង្ហបុរី លោក Lee Hsien Loong ។
ទោះបីជាយ៉ាងណា ការអភិវឌ្ឍទីក្រុងឆ្លាតវៃ ទៅបាន តម្រូវឲ្យកម្ពុជាមានផែនការមេច្បាស់លាស់ និងពឹងផ្អែកលើកត្តាជាច្រើនទៀត ។ អគ្គលេខាធិការរងនៃគណៈស្ថាបត្យករកម្ពុជា និងជាស្ថាបត្យករអាស៊ាន លោកទួស សាភឿន បានលើកឡើងថា ទីក្រុងឆ្លាតវៃតម្រូវឲ្យមានផែនការធំទូលាយសម្រាប់ទីក្រុងទាំងមូល មិនមែនត្រឹមទីក្រុងរណបនោះទេ ។
លោកមានប្រសាសន៍ថា ៖« ទីក្រុងឆ្លាតវៃអាចកើតឡើងបាន លុះត្រាតែមានមេដឹកនាំពូកែដែលធ្វើការលើផែនការមេ (Master Plan)ដ៏ទូលំទូលាយក្នុងការអភិវឌ្ឍទីក្រុង ពោលគឺមានផែនការមេតាមផ្លូវច្បាប់ច្បាស់លាស់ដែលគ្រប់គ្រងលើការប្រើប្រាស់ដីសំណុំបែបបទ ការរចនា ឬការប៉ុនប៉ងគ្រប់គ្រងលើការអភិវឌ្ឍទីក្រុង »។
លោកបន្តថា ៖« តំបន់នីមួយៗត្រូវតែកំណត់ឲ្យបានច្បាស់ថាជាតំបន់លំនៅឋាន ពាណិជ្ជកម្ម ឬឧស្សាហកម្ម ដែលនឹងអាចពង្រីកឱកាសនៅក្នុងការអភិវឌ្ឍទីក្រុង និងដែលអាចជួយដល់ការរស់នៅរបស់ប្រជាជននៅក្នុងទីក្រុងកាន់តែប្រសើរឡើង »។
តាមការព្យាកររបស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា គិតត្រឹមឆ្នាំ២០៣០ខាងមុខ ប្រជាជនជិត៨លាននាក់ត្រូវគេរំពឹងថានឹងរស់នៅក្នុងទីក្រុង ហើយភាគច្រើននៃពួកគេ នឹងមករស់នៅក្នុងទីក្រុងភ្នំពេញ ។
លោកសាស្ត្រាចារ្យ ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែងថា ការសាងសង់អគារធំៗ និងការគិតគូរពីបញ្ហាបរិស្ថានជាការងាររបស់យើងដែលត្រូវផ្តោតយកចិត្តទុកដាក់លើអ្វីដែលគេឲ្យឈ្មោះថា Smart City ព្រោះទីក្រុងបែបឆ្លាតវៃនេះ ទាមទារការគិតគូរច្រើនណាស់ ដើម្បីសម្រេចបាននូវស្តង់ដាទីក្រុងមួយ ដែលមានភាពទាក់ទាញ និងផ្តល់ភាពសុខសាន្តដល់ប្រជាពលរដ្ឋ ។
លោកបន្តថា ៖« ការសាងសង់អគារត្រូវតែធ្វើឡើងដោយមានទីធ្លាបៃតង កន្លែងលេងកម្សាន្ដ ការទាញយកពន្លឺព្រះអាទិត្យមកប្រើជំនួសឬកាត់បន្ថយការប្រើប្រាស់ថាមពលអគ្គិសនី ការដាំដើមឈើក្នុងអគារ និងប្រព័ន្ធចម្រោះទឹកកខ្វក់ជាដើម ដែលសុទ្ធតែជារឿងចាំបាច់ ដើម្បីធានានិន្តរភាពនៃការអភិវឌ្ឍ ដោយត្រូវគោរពនូវពាក្យស្លោក ការអភិវឌ្ឍត្រូវដើរទន្ទឹមគ្នានឹងការអភិរក្ស »។
លោកសាស្ត្រាចារ្យមានប្រសាសន៍ថា ៖« បច្ចុប្បន្ននេះ កម្ពុជាកំពុងអភិវឌ្ឍន៍ទៅរកទីក្រុងឆ្លាតវៃបណ្ដើរៗដោយមិនដឹងខ្លួនហើយ។ ជាក់ស្ដែងនៅតាមភ្លើងស្តុបនីមួយៗនៅក្នុងរាជធានីភ្នំពេញ បានបំពេញកាមេរ៉ាសុវត្ថិភាពបណ្ដើរ ហើយការបំពាក់កាមេរ៉ាសុវត្ថិភាពនេះ គឺជាចំណែកមួយនៃទីក្រុងឆ្លាតវៃ ដែលមានប្រទេសជាច្រើនលើពិភពលោកក៏កំពុងតែធ្វើផងដែរ។ម្យ៉ាងទៀត ការកសាងដែលផ្ដោតលើបរិស្ថាន ការមិនបំពុលបរិស្ថាន និងស្រូបយកនូវធាតុពុលក្នុងបរិស្ថានក៏គេហៅថា ទីក្រុងឆ្លាតវៃដែរ »។
លោកបន្តថា ការកសាងទីក្រុងឆ្លាតវៃ ត្រូវពឹងលើកត្តាបួនសំខាន់ៗគឺទី១ បច្ចេកវិទ្យា ទី២ធនធានមនុស្សដែលតម្រូវឲ្យមនុស្សមានការគិតគូរឲ្យបានខ្ពស់ និងត្រូវដឹងពីការរួមចំណែកក្នុងការកសាងទីក្រុងឆ្លាតវៃ ។ ទី៣ តាមស្ថាប័ន ដោយតម្រូវឲ្យស្ថាប័នដែលជាអ្នកប្រើប្រាស់នូវប្រភពថាមពល ត្រូវចេះសន្សំសំចៃ និងទី៤ ការការពារបរិស្ថានដែលនៅជុំវិញខ្លួនរស់នៅ។ ទាំងបួននេះ បើសិនជាយើងអាចធ្វើបាន គឺជាការរួមចំណែកយ៉ាងធំក្នុងការកសាងទីក្រុងឆ្លាតវៃ ប្រកបដោយប្រសិទ្ធភាពខ្ពស់ ។
លោកបន្ថែមថា សម្រាប់គោលនយោបាយរបស់រាជរដ្ឋាភិបាល ដើម្បីឲ្យការកសាងទីក្រុងឆ្លាតវៃប្រកបដោយប្រសិទ្ធភាព គឺទាមទារឲ្យមានការសហការ និងធ្វើការជាមួយគ្នារវាងវិស័យរដ្ឋ និងឯកជន ។ ជាក់ស្ដែងវិស័យឯកជនត្រូវរិះរក និងនាំចូលនូវសម្ភារសាងសង់បែបទំនើប ដើម្បីបង្ហាញដល់អ្នកអភិវឌ្ឍន៍ផ្សេងទៀតក្នុងប្រទេសសម្រាប់យកទៅអភិវឌ្ឍន៍ជាទីក្រុងឆ្លាត ។
លោក ទូច សំណាង អគ្គនាយករងក្រុមហ៊ុនOCIC ដែលកំពុងវិនិយោគទីក្រុងរណបជ្រោយចង្វាបានថ្លែងឲ្យដឹងកាលពីពេលថ្មីៗនេះថា ទីក្រុងនេះនឹងរៀបចំឡើងតាមបែប Smart City ដោយប្រព័ន្ធហេដ្ឋារចនាសម្ព័ន្ធត្រូវបានរៀបចំជាពិសេស ដោយខ្សែភ្លើងនឹងត្រូវកប់ក្រោមដីទាំងអស់ អំពូលភ្លើងនឹងប្រើប្រាស់ប្រភេទអំពូលLED ដែលមានការបំពាក់កាមេរ៉ានិងទឹកកខ្វក់ទាំងអស់ចេញពីទីក្រុងនេះ នឹងត្រូវឆ្លងកាត់ការចម្រោះទាំងអស់មុននឹងបង្ហូរចេញ ។
លោកបន្តថា ៖« ការវិនិយោគទីក្រុងបែបស្មាតស៊ីធី ត្រូវចំណាយប្រាក់ច្រើន ប៉ុន្តែដើម្បីនិរន្តរភាពបរិស្ថាន និងភាពសុខសាន្ត ក៏ដូចជាផាសុកភាពដល់ប្រជាពលរដ្ឋ ពិតជាអ្វីដែលយើងត្រូវផ្តោត »៕
ចែករំលែកព័តមាននេះ