ខេត្តបាត់ដំបង ៖ ទំនាស់ដីធ្លីរវាងប្រជាពលរដ្ឋចំនួន៣គ្រួសារ ជាមួយនឹងមន្ត្រីយោធាម្នាក់ ស្ថិតនៅភូមិបួររុន ឃុំត្រែង ស្រុករតនមណ្ឌល ខេត្តបាត់ដំបង ឈានរកដំណោះស្រាយនៅព្រឹកថ្ងៃទី២០ ខែកញ្ញា ឆ្នាំ២០១៨ ដោយមានការសម្របសម្រួលពីមន្ត្រីថ្នាក់ស្រុកជាច្រើនរូប ដែលដឹកនាំដោយលោក ហ៊ិន ហូ អភិបាលរងស្រុករតនមណ្ឌល ។
តែមិនទាន់ទទួលបានលទ្ធផល ឬការព្រមព្រៀងរវាងភាគីទាំងសងខាងនៅឡើយនោះទេ ព្រោះម្នាក់ៗអះអាងថា មានប័ណ្ណកម្មសិទ្ធិតែរៀងៗខ្លួន ។
ប្រភពព័ត៌មានពីលោក អឹម ប៊ុនធឿន ហៅយក្ស អតីតយោធាកាន់ផ្នែករថក្រោះ បានឱ្យដឹងថា គាត់បានទិញដីចំនួន៥ហិកតាពីឈ្មោះ ឈុន ស៊ីណាត ភេទប្រុស រស់នៅឃុំរស្មីសង្ហា ស្រុករតនមណ្ឌល ខេត្តបាត់ដំបង កាលពីចុងឆ្នាំ២០១២ និងបានធ្វើបង្កាន់ដៃចេញពីភូមិ និងឃុំ ហើយក៏ជួលគេឱ្យដោះគ្រាប់មីន និងជួលគ្រឿងចក្រ ដើម្បីឈូសឆាយព្រៃ ដោយចំណាយថវិកាអស់ជាច្រើន ។
លុះរហូតមកដល់ឆ្នាំ២០១៧ ទើបលេចចេញបុរសម្នាក់ឈ្មោះ ច្រិក ណារ៉េត ហៅឆ្លូញ ជាមន្ត្រីយោធា មានបុណ្យស័ក្តិធំ នៅភូមិភាគ៥ បានមកអះអាងថា ដីរបស់គាត់មួយចំហៀងនេះ ដែលទទឹង១៣០ម៉ែត្រ និងបណ្តោយ១០០០ម៉ែត្រ គឺជាកម្មសិទ្ធិរបស់គេ រួចគេយកបង្កាន់ដៃដែលចេញដោយអភិបាលស្រុកមកបង្ហាញ ។
លោកបញ្ជាក់ថា ការដោះស្រាយមានជាបន្តបន្ទាប់ ដែលមានការសម្របសម្រួលពីថ្នាក់ឃុំ និងថ្នាក់ស្រុក ដោយគេបែរជាចោទថា គាត់ទៅកាប់ទន្ទ្រានយកដីគេទៅវិញ ខណៈដីនេះគាត់បានអាស្រ័យផលអស់រយៈពេលជាច្រើនឆ្នាំមកហើយ ។ លោកមិនអាចប្រគល់ឱ្យទៅខាងមន្ត្រីយោធានោះបានទេ តែសុខចិត្តបរិច្ចាគដីឱ្យប្រវែងទទឹង៣០ម៉ែត្រក្នុងដីទំនាស់ប្រវែង១៣០ម៉ែត្រនោះ ។
លោកបានសំណូពរឱ្យថ្នាក់ខេត្ត ជួយរកយុត្តិធម៌ជូនប្រជាពលរដ្ឋក្រីក្រ ដែលខ្វះដីប្រកបមុខ របរចិញ្ចឹមជីវិត ព្រោះគាត់រស់នៅរាល់ថ្ងៃ ដោយសារដីចម្ការនៅចំណុចខាងលើនោះ។
តែយ៉ាងណាក៏ដោយ ការដោះស្រាយនេះមិនបានជោគជ័យទេ ដោយសារភាគីទាំងសងខាងនៅតែសំអាងថា មានប័ណ្ណកម្មសិទ្ធិរៀងៗខ្លួន ដោយឈរលើបរិច្ចាគ៣០ម៉ែត្រ ទល់១០០ម៉ែត្រ ហើយខាងស្រុកនឹងបញ្ជូនសំណុំរឿងទៅថ្នាក់ខេត្ត ដើម្បីដោះស្រាយបន្ត ៕
ចែករំលែកព័តមាននេះ