ខេត្តកណ្តាល ៖ នគរបាលស្រុកពញាឮបានចាប់ខ្លួនបុរសម្នាក់ តាមពាក្យបណ្ដឹងរបស់នារីម្នាក់ដែលចោទថា បានចាប់ឱបនាងប៉ងរំលោភ គ្រាដែលនាងកំពុងចោមពុងងូតទឹក កាលពីវេលាម៉ោង១០ព្រឹកថ្ងៃទី១៧ ខែកញ្ញា នៅភូមិស្រះពោធិ៍ ឃុំភ្នំបាត…
ខេត្តកណ្តាល ៖ នគរបាលស្រុកពញាឮបានចាប់ខ្លួនបុរសម្នាក់ តាមពាក្យបណ្ដឹងរបស់នារីម្នាក់ដែលចោទថា បានចាប់ឱបនាងប៉ងរំលោភ គ្រាដែលនាងកំពុងចោមពុងងូតទឹក កាលពីវេលាម៉ោង១០ព្រឹកថ្ងៃទី១៧ ខែកញ្ញា នៅភូមិស្រះពោធិ៍ ឃុំភ្នំបាត ស្រុកពញាឮ ។
មន្ត្រីនគរបាលស្រុកបានឱ្យដឹងថា បុរសដែលត្រូវបានចាប់ខ្លួននេះ ឈ្មោះ ភាព សុភ័ក្ត្រ អាយុ២៧ឆ្នាំ ជាកម្មករសំណង់ មានទីលំនៅក្នុងភូមិផ្សារដែកលើ ឃុំផ្សារដែក ស្រុកពញាឮ ។ ចំណែកនារីជាដើមបណ្តឹងឈ្មោះ សុខណា អាយុ៣១ឆ្នាំ មុខរបរបោកខោអាវ មានទីលំនៅក្នុងភូមិ ឃុំខាងលើ ។
ប្រភពដដែលឲ្យដឹងទៀតថា ព្រឹកថ្ងៃទី១៧ ខែកញ្ញា វេលាម៉ោងប្រហែល១០ បុរសរូបនេះបានទៅអង្គុយផឹកស្រានៅក្រោមផ្ទះរបស់នាង ។ ក្រោយមក ជននេះដើរចេញទៅក្រៅមួយសន្ទុះ ក៏ដើរចូលមកក្រោមផ្ទះនាងវិញ ជួនពេលនោះឃើញនាងកំពុងចោមពុងសារុងងូតទឹកនៅក្នុងបន្ទប់ទឹកតែម្នាក់ឯង ក៏ចូលទៅចាប់ឱបនាងយ៉ាងស្អិត ។
ប្រភពដដែលបន្តថា ពេលនោះកូនប្រុសនាងដែលមានអាយុប្រហែល៣ឆ្នាំឃើញស្រែកយំ ទើបជននេះលែងនាង រួចដើរចេញមកក្រៅផ្ទះវិញ ។ លុះនៅព្រឹកថ្ងៃទី១៨ ខែកញ្ញា វេលាម៉ោង៩ព្រឹក ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលភ្នំបាត ទើបមានការឃាត់ខ្លួនជនសង្ស័យបញ្ជូនទៅកាន់អធិការដ្ឋាននគរបាលស្រុកពញាឮដើម្បីសាកសួរ ។ ជនសង្ស័យសារភាពថា ខ្លួនពិតជាបានប្រព្រឹត្តដូចការចោទប្រកាន់មែន ដោយសារតែផឹកស្រាស្រវឹងនិងស្រឡាញ់នាងខ្លាំងពេក ៕
ចែករំលែកព័តមាននេះ