រាជធានីភ្នំពេញ ៖ ក្រសួងទេសចរណ៍បានចាត់ទុករមណីយដ្ឋានជាផលិតផលទេសចរណ៍ដ៏មានសារសំខាន់មួយក្នុងចំណោមផលិតផលទេសចរណ៍នានា និងមានភាពប្រទាក់ក្រឡាគ្នាជាមួយផលិតផលទេសចរណ៍ផ្សេងៗ ដែលស្ថិតក្រោមទម្រង់នានាដូចជា សណ្ឋាគារបែបរមណីយដ្ឋាន(Hotel Resort), រមណីយដ្ឋាន បែបឧទ្យានជាតិដែលមានវិសាលភាពធំ, រមណីយដ្ឋានវប្បធម៌ប្រវត្តិសាស្ត្រដែលបង្កប់តម្លៃមិនអាចកាត់ថ្លៃបាន, រមណីយដ្ឋានវិនិយោគ ខ្នាតធំ និងរមណីយដ្ឋានកែច្នៃឯកជនបែបគ្រួសារជាដើម ដែលទាមទារនូវយន្តការគ្រប់គ្រង និងការអភិវឌ្ឍផ្សេងៗគ្នា ។
គួរកត់សម្គាល់ថា បច្ចុប្បន្ន កម្ពុជាមានរមណីយដ្ឋានទេសចរណ៍សរុបជិត៤០០កន្លែងដែលបានចុះបញ្ជីជាផ្លូវការដោយមន្ទីរទេសចរណ៍រាជធានី-ខេត្ត ព្រមជាមួយនឹងកន្លែងមានសក្តានុពលទាក់ទាញទេសចរណ៍ជាច្រើនផ្សេងទៀត ដែលបាននិងកំពុងរៀបចំទទួលភ្ញៀវទេសចរជាតិ និងអន្តរជាតិ ។ ទទ្ទឹមនឹងការកើនឡើងជាបរិមាណនេះ ក្រសួងក៏សង្កេតឃើញពីការរីកចម្រើនជាលក្ខណៈគុណភាព ដែលទាក់ទងនឹងការរៀបចំរមណីយដ្ឋាន និងគោលដៅទេសចរណ៍នានាមានការរីកចម្រើនកាន់តែប្រសើរផងដែរ ។
ផ្តើមពីនោះក្រសួងបានកត់សម្គាល់ឃើញថា ដោយមានការគាំទ្រពីរាជរដ្ឋាភិបាល ផ្លូវចូលទៅកាន់រមណីយដ្ឋានទេសចរណ៍ភាគច្រើន ត្រូវបានស្ថាបនា ជួសជុល និងកែលម្អ ។ តាមរយៈការដាក់ចេញនូវយន្តការជាបន្តបន្ទាប់ កម្ពុជាអាចទប់ស្កាត់ការដំឡើងថ្លៃហួសហេតុលើម្អូបអាហារ និងសេវាកម្មទេសចរណ៍ ដោយមានការបិទតម្លៃជម្រាបជូនភ្ញៀវជាមុនឲ្យបានត្រឹមត្រូវ ។ ទន្ទឹមនោះ បញ្ហាបរិស្ថានអនាម័យមានភាពល្អប្រសើរដោយភ្ញៀវទេសចរ និងប្រជាពលរដ្ឋមានការយល់ ដឹងកាន់តែប្រសើរផងដែរ ។
ចំណែកបញ្ហាសន្តិសុខសុវត្ថិភាពក៏មានភាពល្អប្រសើរ ដោយមន្ទីរទេសចរណ៍បានសហការយ៉ាងជិតស្និទ្ធជាមួយកម្លាំងមានសមត្ថកិច្ច ចាត់តាំងក្រុមការងារប្រចាំការនៅតាមគោលដៅ ទេសចរណ៍សំខាន់ៗ និងមានការលើកស្លាកសញ្ញាគ្រោះថ្នាក់នៅតាមតំបន់ងាយគ្រោះថ្នាក់ ។ ទោះយ៉ាងនេះក្ដី ក្រសួងក៏បានកត់សម្គាល់ឃើញថា ការគ្រប់គ្រងរមណីយដ្ឋានទេសចរណ៍នៅតែជួបប្រទះនឹងបញ្ហាប្រឈមមួយចំនួន ជាពិសេសការគ្រប់គ្រងសំរាមនៅតែជាបញ្ហាស្មុគស្មាញនៅតាមរមណីយដ្ឋានទេសចរណ៍មួយចំនួន ខណៈដែលរមណីយដ្ឋានទេសចរណ៍ភាគច្រើនស្ថិតនៅក្រោមការគ្រប់គ្រងរបស់រដ្ឋ ដែលការអភិវឌ្ឍមានលក្ខណៈយឺតយ៉ាវ ហើយរមណីយដ្ឋាន ទេសចរណ៍មួយចំនួនទៀតពុំទាន់មានការវិនិយោគឱ្យបានពេញលេញនៅឡើយ ។
យ៉ាងណាក៏ដោយ ក្រសួងទេសចរណ៍ បានដាក់ចេញនូវចលនាប្រឡង ប្រណាំងរមណីយដ្ឋានទេសចរណ៍គំរូកាលពីឆ្នាំ២០១៧ និងបានកំណត់គោលដៅយកឆ្នាំ២០១៩ ជាឆ្នាំធ្វើឱ្យរមណីយដ្ឋានទេសចរណ៍ទូទាំងប្រទេសក្លាយជារមណីយដ្ឋានស្អាត ស្របតាមស្តង់ដារបស់ក្រសួងទេសចរណ៍ ។
យោងតាមការណែនាំរបស់ក្រសួងទេសចរណ៍ដើម្បីក្លាយជារមណីយដ្ឋានស្អាត រមណីយដ្ឋានគំរូ គ្រប់រមណីយដ្ឋានទាំងអស់ ត្រូវតែមានផែនការមេ (Master Plan) មានអ្នកគ្រប់គ្រងច្បាស់លាស់ (Site Manager) និងមានការចាត់តាំងនូវរចនាសម្ព័ន្ធគ្រប់គ្រងច្បាស់លាស់(DMO-Destination Management Organization) ជាពិសេសសម្រាប់រមណីយដ្ឋានទេសចរណ៍ដែលគ្រប់គ្រងដោយរដ្ឋ និងសហគមន៍ ។ ទន្ទឹមនោះ រាល់សម្បទានទ្រទ្រង់ក្នុងរមណីយដ្ឋានរាប់តាំងពីក្យុស ឬតូបអង្គុយលេង ភោជនីយដ្ឋាន អាហារដ្ឋាន កន្លែងទទួលភ្ញៀវ បន្ទប់ទឹក ត្រូវតែរចនាឡើងឱ្យបាន ត្រឹមត្រូវតាមបទដ្ឋានបច្ចេកទេស ។
ចំពោះបរិស្ថាន អនាម័យ រាល់គម្រោងវិនិយោគជារមណីយដ្ឋានទេសចរណ៍ទាំងអស់ ត្រូវបញ្ចូលនូវការគិតគូអំពីទស្សនទានបៃតង និងស្អាត ការរក្សាសោភ័ណភាពក្នុងរមណីយដ្ឋាន ដូចជាការដាំផ្កា និងដើមឈើ និងត្រូវខិតខំរក្សាឱ្យបាននូវបរិស្ថានស្អាត អនាម័យល្អ ជាពិសេសបញ្ឈប់ការបោះសំរាមផ្តេសផ្តាសក្នុងរមណីយដ្ឋាន ។ ក្នុងន័យនេះ ម្ចាស់គ្រប់គ្រងរមណីយដ្ឋានទាំងអស់ ត្រូវតែសរសេរពាក្យអប់រំមិនឱ្យបោះសំរាមចោលផ្តេសផ្តាសខុសធុងសំរាម និងអប់រំភ្ញៀវទេសចរ ដែលចូលទៅលេងកម្សាន្តឱ្យបានច្បាស់លាស់ជាមុន ។
ទាក់ទងនឹងបញ្ហាសន្តិសុខ-សុវត្ថិភាព គ្រប់រមណីយដ្ឋានទេសចរណ៍ទាំងអស់ ត្រូវដាក់ស្លាកសញ្ញាឱ្យបានគ្រប់គ្រាន់ ទាំងស្លាកបង្ហាញព័ត៌មាន (Information) និងស្លាកសញ្ញាបង្ហាញទីតាំងនានា (Communication) ជាពិសេសស្លាកសញ្ញាបង្ហាញទីតាំងហាមឃាត់ និងតំបន់គ្រោះថ្នាក់ជាដើមឱ្យសមស្របទៅតាមស្តង់ដាអប្បបរមារមណីយដ្ឋាន ទេសចរណ៍របស់ក្រសួងទេសចរណ៍ ហើយត្រូវសហការឱ្យបានជិតស្និទ្ធជាមួយអាជ្ញាធរ និងសមត្ថកិច្ចក្នុងតំបន់ធ្វើការគ្រប់គ្រងលំហូរភ្ញៀវទេសចរ (Tourism Management Flow)ឱ្យបានច្បាស់លាស់ ។
ទទ្ទឹមនឹងនេះ រមណីយដ្ឋានទេសចរណ៍ទាំងអស់ត្រូវរៀបចំមណ្ឌលព័ត៌មានទេសចរណ៍ (Tourist Information Center) ទៅតាមទំហំជាក់ស្តែងដើម្បីផ្តល់ព័ត៌មាន ក៏ដូចជាអប់រំភ្ញៀវទេសចរណ៍ មុនពេលចូលទៅលេងកម្សាន្ដក្នុងរមណីយដ្ឋានរបស់ខ្លួន ហើយមន្ទីរទេសចរណ៍ត្រូវពង្រឹងមណ្ឌលព័ត៌មានទេសចរណ៍ក្នុងខេត្តរបស់ខ្លួន ដើម្បីជាកន្លែងប្រមូលផ្តុំ និងផ្តល់ព័ត៌មានគ្រប់ជ្រុងជ្រោយពីគោលដៅទេសចរណ៍ក្នុងខេត្តរបស់ខ្លួនទៅដល់ភ្ញៀវទេសចរ ។
គួរបញ្ជាក់ថា សម្រាប់ការប្រឡងប្រណាំងរមណីយដ្ឋានគំរូលើកទី២ ឆ្នាំ២០១៨នេះ មានបេក្ខភាពជារមណីយដ្ឋានស្អាតប្រចាំរាជធានី-ខេត្តចំនួន៧៨ ត្រូវបានសម្រឹតសម្រាំងយកមក ចូលរួម ហើយចំនួននេះមានការកើនឡើងលើសទ្វេដង បើធៀបនឹងលើកទី១ ឆ្នាំ២០១៧ ដែលមានរមណីយដ្ឋានបេក្ខភាពចូលរួមចំនួន៣៣ប៉ុណ្ណោះ ៕
ចែករំលែកព័តមាននេះ