រាជធានីភ្នំពេញ ៖ យោងតាមក្រសួងពាណិជ្ជកម្មបង្ហាញថា ទឹកប្រាក់វិនិយោគពីប្រទេសចិនមកកម្ពុជាបានកើនឡើងពី៩០០លានដុល្លារអាមេរិកនៅក្នុងឆ្នាំ២០១៦ ដល់១,៦ប៊ីលានដុល្លារនៅក្នុងឆ្នាំ២០១៧ ហើយនៅក្នុងរយៈពេល៧ខែដើមឆ្នាំ២០១៨នេះបានកើនឡើងដល់២,៨ប៊ីលានដុល្លារ ។ កំណើននៃការវិនិយោគមកពីចិនជាបន្ដបន្ទាប់នេះ បើតាមមន្ត្រីអ្នកនាំពាក្យក្រសួងពាណិជ្ជកម្ម លោក…
រាជធានីភ្នំពេញ ៖ យោងតាមក្រសួងពាណិជ្ជកម្មបង្ហាញថា ទឹកប្រាក់វិនិយោគពីប្រទេសចិនមកកម្ពុជាបានកើនឡើងពី៩០០លានដុល្លារអាមេរិកនៅក្នុងឆ្នាំ២០១៦ ដល់១,៦ប៊ីលានដុល្លារនៅក្នុងឆ្នាំ២០១៧ ហើយនៅក្នុងរយៈពេល៧ខែដើមឆ្នាំ២០១៨នេះបានកើនឡើងដល់២,៨ប៊ីលានដុល្លារ ។
កំណើននៃការវិនិយោគមកពីចិនជាបន្ដបន្ទាប់នេះ បើតាមមន្ត្រីអ្នកនាំពាក្យក្រសួងពាណិជ្ជកម្ម លោក ស៊ាង ថៃ បានឲ្យដឹងថា ដោយសារកម្ពុជាកំពុងមានសន្ដិភាព និងកំណើនសេដ្ឋកិច្ចរឹងមាំ ព្រមទាំងលក្ខខណ្ឌនៃច្បាប់វិនិយោគអំណោយផល ដែលជាកត្តាទាក់ទាញវិនិយោគិនបរទេស ។ លោកថ្លែងថា ៖« ដោយសារតែប្រទេសយើងមានសន្តិសុខ, ស្ថិរភាពនយោបាយ, សុវត្ថិភាពល្អ, និងគោលនយោបាយវិនិយោគមានលក្ខណៈបើកទូលាយជាងគេក្នុងតំបន់ ព្រមទាំងអត្រាប្ដូរប្រាក់មានលំនឹងល្អ គឺជាកត្តាទាក់ទាញវិនិយោគិនចិនមកបណ្ដាក់ទុនមានកំណើនឡើងជាបន្ដបន្តាប់ »។
សេដ្ឋវិទូសេដ្ឋកិច្ចកម្ពុជា បណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ
បានមានប្រសាសន៍ថា កត្តានយោបាយ, ទំនាក់ទំនងអន្តរជាតិ, ភូមិសាស្ត្រនយោបាយ, កត្តាសេដ្ឋកិច្ច និងប្រទេសជាតិមានស្ថិរភាពល្អ កំពុងធ្វើឲ្យវិនិយោគិនបរទេសមកបណ្ដាក់ទុននៅក្នុងប្រទេស កើនឡើងជាបន្ដបន្ទាប់ ។ លោកបណ្ឌិតលើកឡើង ៖« យើងស្វាគមន៍ការមកដល់នៃវិនិយោគិនបរទេស ហើយវិនិយោគិនចិនគឺល្អសម្រាប់ប្រទេសយើង ប៉ុន្តែនៅមួយរយៈចុងក្រោយនេះហាក់មានបញ្ហាមួយចំនួន ដែលយើងត្រូវមានការប្រុងប្រយ័ត្ន ធ្វើយ៉ាងណាកុំឱ្យមានបញ្ហានោះកើតឡើងទៀត ដែលធ្វើឱ្យប៉ះពាល់ដល់មុខមាត់ប្រទេសជាតិ »។ លោកបញ្ជាក់ថា ៖« ខ្ញុំមិនជ័យយោៗទាំងអស់នោះទេ គឺថា ជ័យយោៗ ត្រូវមានការប្រយ័ត្នប្រយែង និងធ្វើការគ្រប់គ្រងឱ្យបានត្រឹមត្រូវ »។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិត ហុង វណ្ណៈ បានមានប្រសាសន៍ថា ការវិនិយោគរបស់ចិននៅកម្ពុជា មិនមែនកើតឡើងដោយចៃដន្យនោះទេ ។ លោកថ្លែងថា ៖« វាបានកើតឡើងដោយសារហេតុផលមួយចំនួនដូចជា ទី១ គោលនយោបាយផ្លូវសូត្រ ឬ ខ្សែក្រវាត់មួយ ផ្លូវមួយ របស់ចិន ដែលឆ្ពោះមកកាន់តំបន់អាស៊ី ហើយកម្ពុជាយើងជាប្រទេសដែលបានទទួលផលច្រើនជាងគេ ដោយសារទំនាក់ទំនងដ៏ល្អជាប្រវត្តិសាស្ត្រ និងរវាងប្រមុខរដ្ឋាភិបាលនៃប្រទេសទាំងពីរ និងទី២ ដោយសារកត្តាផ្ទៃក្នុងកម្ពុជា ដែលសម្រេចបាននូវសន្តិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ »។
ប្រទេសចិនជាដៃគូយុទ្ធសាស្ត្រគ្រប់ជ្រុងជ្រោយដែលមិនអាចខ្វះបានក្នុងការរួមចំណែកអភិវឌ្ឍន៍ប្រទេសកម្ពុជា ។ បច្ចុប្បន្នមិនត្រឹមតែទំហំទឹកប្រាក់វិនិយោគ និងទំហំពាណិជ្ជកម្មប៉ុណ្ណោះទេដែលឈានមុខគេ ក្នុងនោះទេសចរចិនមកទស្សនានៅកម្ពុជាក៏ស្ថិតក្នុងចំណាត់ថ្នាក់លេខ១ផងដែរ ។
យោងតាមរបាយការណ៍ក្រសួងទេសចរណ៍ ក្នុងរយៈពេល៧ខែដើមឆ្នាំ២០១៨នេះ កម្ពុជាទទួលបានភ្ញៀវទេសចរណ៍អន្តរជាតិប្រមាណជាង៣,៥លាននាក់ ក្នុងអត្រាកំណើនជាង១១% បើប្រៀបធៀបនឹងឆ្នាំមុន ក្នុងនោះភ្ញៀវចិនប្រមាណជាង១លាននាក់ ឈរនៅលំដាប់លេខរៀងទី១ ក្នុងចំណោមទីផ្សារគោលដៅទេសចរណ៍ទាំង១០ប្រទេស ៕
ចែករំលែកព័តមាននេះ