រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា (គ.ជ.ប) គ្រោងលុបឈ្មោះអ្នកបោះឆ្នោតដែលបានទទួលមរណៈភាព និងអ្នកត្រូវបានដកសិទ្ធិបោះឆ្នោតបណ្តោះអាសន្ន មានចំនួន៩៥០០០នាក់ ។
ខណៈបច្ចុប្បន្នភាពធ្វើបញ្ជីឈ្មោះអ្នកបោះឆ្នោតថ្មីមានជិតជិត៤៩ម៉ឺននាក់ ។ ការលើកឡើងនេះនៅក្នុងកិច្ចប្រជុំស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨ នាទីស្តីពីការ គ.ជ.ប នៅព្រឹកថ្ងៃទី១៨ ខែកញ្ញានេះ លោកស៊ិក ប៊ុនហុក ប្រធាន គ.ជ.ប មានប្រសាសន៍ថា ចំនួនប្រជាពលរដ្ឋខ្មែរដែលត្រូវចុះឈ្មោះថ្មីនេះ គឺមានអ្នកទើបគ្រប់អាយុ១៨ឆ្នាំ គិតត្រឹមថ្ងៃទី៣១ ខែធ្នូ ឆ្នាំ២០១៨ និងមិនទាន់បានចុះឈ្មោះបោះឆ្នោតពីមុនមក ។
លោកប្រធាន គ.ជ.ប បានបញ្ជាក់ថា គ.ជ.ប នឹងធ្វើការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០១៨ ចាប់ពីថ្ងៃទី១ដល់ខែ១៨ ខែសីហាខាងមុខនេះ នៅតាមសាលាឃុំសង្កាត់ និងនៅតាមភូមិមួយចំនួនដូចជា ការស្រង់ និងលុបឈ្មោះចំពោះអ្នកមរណៈភាពអ្នកត្រូវបានដកសិទ្ធិបោះឆ្នោតបណ្តោះអាសន្ន អ្នកផ្លាស់ប្តូរលំនៅឋាន ការកែតម្រូវឈ្មោះ ឬទិន្នន័យអ្នកបោះឆ្នោត ។
លោក សោម សូរីដា អគ្គលេខាធិការរង គ.ជ.ប បានពន្យល់បន្ថែមថា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០១៨ នាពេលខាងមុខនេះ គឺសំដៅឱ្យបញ្ជីបោះឆ្នោតសម្រាប់អាណត្តិក្រោយមានភាពពេញលេញត្រឹមត្រូវ និងមានបច្ចុប្បន្នភាពប្រកបដោយសុវត្ថិភាព ។
ចំណែកលោកឡាង ហុង តំណាងអង្គការជនពិការកម្ពុជាបានស្នើឱ្យ គ.ជ.ប សម្រួលការងារ និងនីតិវិធី ដើម្បីឱ្យជនពិការទទួលបានឱកាសទៅចុះឈ្មោះបោះឆ្នោតបានគ្រប់ៗគ្នា ។ ជាមួយគ្នានេះដែរ លោកតុល ប្រាសាទ អគ្គលេខាធិការរងគណបក្សឆន្ទៈខ្មែរក៏បានសុំឱ្យ គ.ជ.ប និងអាជ្ញាធរគ្រប់លំដាប់ថ្នាក់ផ្តល់លទ្ធភាពគ្រប់គ្រាន់ដល់ប្រជាពលរដ្ឋខ្មែរដែលត្រូវគ្រប់អាយុចុះឈ្មោះបោះឆ្នោតនាពេលខាងមុខនេះ ពិសេសការផ្តល់អត្តសញ្ញាណបណ្ណសញ្ជាតិខ្មែរ ដើម្បីឱ្យពួកគេងាយទទួលបានការចុះឈ្មោះបោះឆ្នោត ។
គួរបញ្ជាក់ថា បញ្ជីបោះឆ្នោត និងបញ្ជីឈ្មោះអ្នកបោះឆ្នោត កាលឆ្នាំ២០១៧នេះ ដែលត្រូវបានប្រើប្រាស់សម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ កាលពីចុងខែកក្កដា ឆ្នាំ២០១៨ កន្លងទៅនេះ មានប្រជាពលរដ្ឋជាង៨,៣៨លានម៉ឺននាក់ ស្មើនឹង៨៣,០២ភាគរយ នៃចំនួនប្រជាពលរដ្ឋសរុប ៕
ចែករំលែកព័តមាននេះ