រាជធានីភ្នំពេញ ៖ មនុស្ស៣នាក់រងរបួសស្រាល និងម៉ូតូចំនួន៣គ្រឿង ព្រមទាំងរថយន្តមួយគ្រឿងបាន រងការខូចខាត ខណៈពេលដែលនគរបាលការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញបានដេញបង្ក្រាបក្រុមចោរឆក់ ដែលបានព្យាយាមបើករថយន្តម៉ាកកាមរីបាឡែន ពណ៌ស្ករ ពាក់ផ្លាកលេខភ្នំពេញ២S-១៤៧៦រត់គេច…
រាជធានីភ្នំពេញ ៖ មនុស្ស៣នាក់រងរបួសស្រាល និងម៉ូតូចំនួន៣គ្រឿង ព្រមទាំងរថយន្តមួយគ្រឿងបាន
រងការខូចខាត ខណៈពេលដែលនគរបាលការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញបានដេញបង្ក្រាបក្រុមចោរឆក់ ដែលបានព្យាយាមបើករថយន្តម៉ាកកាមរីបាឡែន ពណ៌ស្ករ ពាក់ផ្លាកលេខភ្នំពេញ២S-១៤៧៦រត់គេច ប៉ុន្តែដោយការភ័យស្លន់ស្លោរ បានជ្រុលទៅបុករះជាបន្តបន្ទាប់តាមដងផ្លូវ ។
ហេតុការណ៍បង្កឱ្យមានការភ្ញាក់ផ្អើលកាលពីវេលាម៉ោងប្រមាណ១១ថ្ងៃទី១៧ កញ្ញា តាំងពីចំណុចផ្ទះជួលក្នុងភូមិចំការឪឡឹក២ សង្កាត់កាកាប១ ខណ្ឌពោធិ៍សែនជ័យ ហើយឃាត់ខ្លួនបាន២នាក់ នៅតាមផ្លូវភ្នំពេញហាណូយមុខវត្តឃ្លួញ ភូមិបន្លាស្អិត សង្កាត់ឃ្មួញ ខណ្ឌសែនសុខ ។
ជនសង្ស័យដែលត្រូវឃាត់ខ្លួនម្នាក់ឈ្មោះ សុខ សម្បត្តិ ភេទប្រុស អាយុ១៧ឆ្នាំ មានលំនៅភូមិដីថ្មី សង្កាត់ដង្កោ ខណ្ឌដង្កោ និងម្នាក់ទៀតឈ្មោះ សុខ សី ហៅអាវ៉ាន់ ភេទប្រុស អាយុ១៨ឆ្នាំ មានទីលំនៅម្តុំផ្សារឈូកមាស ក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។ ចំណែកអ្នករងរបួសដែលបង្កឡើងដោយក្រុមចោរឆក់នោះ ពុំត្រូវបានស្គាល់ឈ្មោះឡើយ គឺគ្រាន់តែរងរបួសរលាត់ដៃជើងស្រាលប៉ុណ្ណោះ ។
តាមព័ត៌មានឱ្យដឹងថា ដោយមានការស្រាវជ្រាវ ពីនគរបាលការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលក៏បានប្រទះឃើញជនសង្ស័យ២នាក់ ដែលជាមុខសញ្ញាឆក់យ៉ាងសកម្មនៅក្នុងរាជធានីភ្នំពេញ នៅក្នុងភូមិសាស្ត្រសង្កាត់កាកាប ។តាមព័ត៌មានឱ្យដឹងទៀតថា ខណៈជនសង្ស័យដឹងខ្លួនថា ប៉ូលិសតាមប្រមាញ់ក៏បានឡើងជិះរថយន្តម៉ាកកាមរីបាឡែនមួយគ្រឿងព្យាយាមបើកគេចខ្លួន ទើបមានការបុករះម៉ូតូជាបន្តបន្ទាប់ចំនួន៣គ្រឿង និងរថយន្តដឹកសិស្សសាលាឯកជនមួយគ្រឿងទៀត បណ្តាលឱ្យរងការខូចខាតធ្ងន់ធ្ងរ ។ ចំណែកអ្នកបើកបររងរបួស៣នាក់ ។
តាមព័ត៌មានឱ្យដឹងទៀតថា ទោះបីមានគ្រោះថ្នាក់ជាបន្តបន្ទាប់តាមផ្លូវ ជនសង្ស័យក៏បានព្យាយាមបើករថយន្តគេចខ្លួន រហូតមកដល់ផ្លូវភ្នំពេញហាណូយក្នុងសង្កាត់ឃ្មួញ ខណ្ឌសែនសុខ ក៏ត្រូវសមត្ថកិច្ចឃាត់ខ្លួនបាន ។ បន្ទាប់ពីឃាត់ខ្លួន ជនសង្ស័យក៏ត្រូវបាននគរបាលនាំទៅឆែកឆេរលំនៅឋានផងដែរ ។
ជនសង្ស័យជាចោរឆក់ត្រូវបាននគរបាលឱ្យដឹងថា ជាមុខសញ្ញាចាស់ធ្លាប់ជាប់ពន្ធនាគារ ហើយចេញពីគុកមកវិញមិនរាងចាល បានបន្តធ្វើចោរឆក់យ៉ាងសកម្មទៀត ។ ជនសង្ស័យនិងរថយន្តត្រូវបាននគរបាលបញ្ជូនទៅកាន់ការិយាល័យដើម្បីចាត់ការតាមនីតិវិធី ៕
ចែករំលែកព័តមាននេះ