ទីក្រុងបាងកក ៖ ខែកក្កដា និងសីហាជាខែមមាញឹករបស់ក្រុមហ៊ុនអចលនទ្រព្យក្នុងទីក្រុងបាងកក ដោយបានដាក់លក់ខុនដូថ្មីៗប្រមាណ១១.៦០០យូនីត ធ្វើឲ្យចំនួនខុនដូដែលបានដាក់លក់លើទីផ្សារក្នុងរយៈពេល៨ខែដំបូងនាឆ្នាំនេះកើនដល់៣៣.៣៩៥យូនីត ។
ចំនួនដាក់លក់កាលពីពីរខែកន្លងមកនេះច្រើនជាងត្រីមាសទី២នាឆ្នាំ២០១៨ដល់ទៅ៣៧% ហើយមានគម្រោងជាច្រើនកំពុងមានផែនការដាក់លក់ក្នុងខែនេះផងដែរ។ ជាលទ្ធផល វិស័យខុនដូអាចនឹងសម្រេចគោលដៅផ្គត់ផ្គង់ខុនដូថ្មីៗប្រមាណ៥៦.០០០យូនីតក្នុងឆ្នាំនេះ ។
ភាពជោគជ័យនៅតែបន្តពឹងផ្អែកលើស្ថានការណ៍សេដ្ឋកិច្ច ប៉ុន្តែអំណាចទឹកប្រាក់ និងជំនឿចិត្តរបស់អតិថិជនបានកាន់តែល្អប្រសើរឡើងបន្តិចម្តងស្របទៅតាមការលូតលាស់សេដ្ឋកិច្ច ។
ប្រមាណ៧៦%នៃខុនដូដែលបានដាក់លក់ក្នុងរយៈពេល៨ខែមកនេះមានទីតាំងស្របទៅនឹងខ្សែរថភ្លើងក្រោមដី និងរថភ្លើងអាកាសដែលសាងសង់រួច ខណៈដែលមាន២០%នៃស្ថិតតាមបណ្តាយខ្សែរថភ្លើងថ្មីៗដែលកំពុងស្ថិតក្រោមការសាងសង់ ។
ខុនដូដែលស្ថិតតាមបណ្តាយខ្សែរថភ្លើងដែលមានស្រាប់បន្តមានប្រជាប្រិយភាពយ៉ាងខ្លាំងក្នុងចំណោមប្រជាជនថៃ និងអតិថិជនបរទេស។ សម្រាប់ក្រុមហ៊ុនអចលនទ្រព្យ អត្រាលក់នៃខុនដូក្នុងទីតាំងនេះស្មើជាមធ្យមប្រមាណ៦៥%ឯណោះក្នុងឆ្នាំនេះ ។
អំណាចទឹកប្រាក់របស់ប្រជាជនថៃកាន់តែល្អប្រសើរឡើង ប៉ុន្តែអតិថិជនមួយចំនួននៅព្រួយបារម្ភពីស្ថានការណ៍នយោបាយ និងសេដ្ឋកិច្ចក្រោមរដ្ឋាភិបាលថ្មី ប្រសិនបើប្រទេសថៃមានការបោះឆ្នោតនៅឆ្នាំក្រោយ ។
ប្រមាណ៧០%នៃខុនដូដែលបានដាក់លក់ក្នុងឆ្នាំនេះមានតម្លៃក្រោម៤.៦០០ដុល្លារក្នុងមួយម៉ែត្រការ៉េ ឬប្រមាណ១៥ម៉ឺនដុល្លារក្នុងមួយយូនីត ៕
ចែករំលែកព័តមាននេះ