រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ី នាថ្ងៃសៅរ៍ ទី១៥ កញ្ញា ស្អែកនេះ ការប្រកួតប្រដាល់អន្តរជាតិដណ្ដើមប្រាក់លានពីក្រុមហ៊ុនភេសជ្ជៈប៉ូវកម្លាំងខារ៉ាបាវបានឈានចូលដល់សប្តាហ៍ទី៣ហើយ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបដែលជាសមាសភាពឡើងប្រកួតនៅពេលនោះអាចទៅរួចដែរឬយ៉ាងណា…
រាជធានីភ្នំពេញ ៖ នៅលើសង្វៀនទូរទស្សន៍ស៊ីអិនស៊ី នាថ្ងៃសៅរ៍ ទី១៥ កញ្ញា ស្អែកនេះ ការប្រកួតប្រដាល់អន្តរជាតិដណ្ដើមប្រាក់លានពីក្រុមហ៊ុនភេសជ្ជៈប៉ូវកម្លាំងខារ៉ាបាវបានឈានចូលដល់សប្តាហ៍ទី៣ហើយ ។
អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបដែលជាសមាសភាពឡើងប្រកួតនៅពេលនោះអាចទៅរួចដែរឬយ៉ាងណា ខណៈកីឡាករថៃដែលពួកគេត្រូវជួបនៅពេលនេះហាក់មានសមត្ថភាពខ្លាំងពិបាកផ្ដួលអ៊ីចឹងនោះ។
គូដណ្ដើមប្រាក់លាននៅថ្ងៃនោះតម្រូវទៅលើកីឡាករ ជឹម ចិត្រា មកពីក្លិបខ្លារខិនមានរឹទ្ធ ត្រូវជួបប្រកួតជាមួយកីឡាករថៃឈ្មោះPhitsinghaក្នុងប្រភេទទម្ងន់៦៥គីឡូក្រាម ។ ជឹមចិត្រា និយាយថា នេះជាលើកទី១ហើយដែលរូបគេមានឱកាសឡើងប្រកួតដណ្ដើមប្រាក់លានជាមួយកីឡាករថៃ ដែលមិនធ្លាប់ស្គាល់ពីប្រវត្តិប្រកួតច្បាស់លាស់ ។ ទោះបីយ៉ាងណា រូបគេនឹងខិតខំប្រកួតឱ្យអស់ពីសមត្ថភាពធ្វើយ៉ាងណាដណ្ដើមជ័យជម្នះឱ្យបានដោយមិនធ្វើឱ្យអ្នកគាំទ្រអស់សង្ឃឹមឡើយ ។
មួយគូទៀតកីឡាករឌុម កែវដា មកពីក្លិបមកុដរាជសីហ៍ ត្រូវជួបប្រកួតជាមួយកីឡាករថៃឈ្មោះPhit Noyក្នុងប្រភេទទម្ងន់៦៣,៥គីឡូក្រាម ។ ឌុម កែវដា មិនខុសពីជឹម ចិត្រាប៉ុន្មានដែរ ទោះបីរូបគេជាអ្នកប្រដាល់ជើងចាស់ដែលធ្លាប់មានឈ្មោះបោះសំឡេងពីមុនមកក្ដី ប៉ុន្តែដោយសារតែបាត់មុខពីលើសង្វៀនយូរទើបគេមិនដឹងថា អាចយកឈ្នះកីឡាករជើងខ្លាំងថៃបានឬអត់ ។
តាមដឹង កីឡាករថៃម្នាក់នេះពិតជាមិនអន់ឡើយ គេធ្លាប់មកប្រកួតនៅលើសង្វៀនស្រុកខ្មែររាប់ភ្លេច និងប៉ះសុទ្ធតែជើងខ្លាំងទៀតផង ។ ដូច្នេះ បើចង់ដឹងថា នរណាខ្លាំងជាងនរណានោះ មានតែរង់ចាំមើលការប្រកួតជាក់ស្ដែងនៅលើសង្វៀនប៉ុណ្ណោះ។
គួររំលឹកផងដែរថា ព្រឹត្តិការណ៍ប្រកួតប្រដាល់អន្តរជាតិដណ្ដើមប្រាក់លានរបស់ក្រុមហ៊ុនខារ៉ាបាវ លើកនេះ មានលក្ខណៈខុសប្លែកពីគេ ។ តាមធម្មតា ការប្រកួតដណ្ដើមប្រាក់លានបែបនេះ គឺមានតែអ្នកឈ្នះ និងអ្នកចាញ់ប៉ុណ្ណោះមិនមានស្មើឡើយ ហើយប្រាក់លានបានទៅលើអ្នកឈ្នះផ្ដាច់មុខ ។
សម្រាប់ការប្រកួតលើកនេះមានការខុសប្លែកត្រង់ថា មានឈ្នះ មានចាញ់ និងមានស្មើ ។ ដូច្នេះ បើគូណាមួយត្រូវបានគណៈកម្មការរៀបចំការប្រកួតប្រកាសឱ្យស្មើ ប្រាក់រង្វាន់ត្រូវចែកគ្នាម្នាក់ពាក់កណ្ដាល ពោលគឺអ្នកឈ្នះនឹងទទួលបាន១លានរៀល បើស្មើគ្នាវិញទទួលបាន៥០ម៉ឺនរៀលម្នាក់បន្ថែមពីលើប្រាក់តម្លៃខ្លួន។
ក្រៅពីគូដណ្ដើមប្រាក់លាននេះទៅនៅមានគូមិត្តភាពចំនួន៣គូទៀត ។ កីឡាករ ចាន់ រក្សា មកពីក្លិបអេភូថងកីឡា ប្រកួតជាមួយកីឡាករ មាឃ វណ្ណរ៉ា មកពីក្លិបរាជសីហ៍ខេត្តរតនគិរី។
កីឡាករ សារឿន ច័ន្ទ មកពីក្លិបតាព្រហ្មមានជ័យ ប្រកួតជាមួយកីឡាករ សុខ សុវណ្ណមកពីសមាគមកីឡាប្រដាល់ក្រសួងការពារជាតិ និងកីឡាករ រឿង សារិទ្ធ មកពីក្លិបមកុដរាជសីហ៍ ប្រកួតជាមួយកីឡាករ ឡុង ណងសៅ មកពីក្លិបសាលវ័ន្តកីឡា ៕
ចែករំលែកព័តមាននេះ