ក្រុងប៉ោយប៉ែត ៖ មន្ដ្រីនគរបាលការពារព្រំដែនគោកម្នាក់ ទទួលរងការចោទប្រកាន់ពីស្ដ្រីចំណាស់ម្នាក់ថា បានវាយទាត់ធាក់ និងដកកាំភ្លើងខ្លីគំរាមរកបាញ់គាត់ កាលពីល្ងាចថ្ងៃទី២២ កក្កដា កន្លងមក នៅចំណុចអូរព្រំដែន ស្ថិតក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ។ មន្ដ្រីនគរបាលការពារព្រំដែនគោកដែល រងការចោទប្រកាន់នេះ ឈ្មោះ“ស៊ឺ” នៅសេនាតូចលេខ៨៩១ ឈរជើងនៅក្រុងប៉ោយប៉ែត ឯស្ដ្រីចំណាស់ដែលអះអាងថា ជាភាគីរងគ្រោះហើយចោទប្រកាន់ឈ្មោះស៊ឺ ថាបានវាយធ្វើបាបឈ្មោះឡេង នូវ អាយុ៤៥ឆ្នាំ មានទីលំនៅក្នុងភូមិគីឡូម៉ែទ្រលេខ៤ ។ ស្ដ្រីចំណាស់ខាងលើបានធ្វើការៀបរាប់ប្រាប់ សកម្មជនអង្គការសិទ្ធិមនុស្សអាដហុកខេត្ដថា ប៉ូលិសឈ្មោះស៊ឺ បានជិះម៉ូតូហុងដាឌ្រីម ស៊េរី ឆ្នាំ២០១០មួយគ្រឿងចូលកន្លែងល្បែង អាប៉ោង ឯរូបគាត់កំពុងអង្គុយចាក់អាប៉ោង ។ ហើយឈ្មោះស៊ឺ បានសួររកប្រពន្ធគាត់ក្រែង មកលេងល្បែង ។
តាមស្ដ្រីចំណាស់រូបនេះនិយាយថា ខណៈនោះគាត់ឆ្លើយទៅវិញថា អត់ឃើញទេ ភ្លាមនោះឈ្មោះស៊ឺ ចុះពីលើម៉ូតូមកក្របួចសក់គាត់ច្រាន រួចទាត់គាត់ចំនួន២ជើង ដែលមួយជើងទាត់ក.ដៃ និងប្រអប់ដៃខាងឆ្វេង ហើយមួយជើងទៀតទាត់គាត់ចំពោះ ។ អំពើហិង្សានេះធ្វើឱ្យគាត់ភ័យខ្លាំងណាស់ ហើយខណៈឃើញឈ្មោះស៊ឺ ទាញកាំភ្លើងខ្លីចេញពីស្រោមនៅចង្កេះគំរាមរកបាញ់គាត់ គាត់ក៏រត់ចូលព្រៃដែលនៅក្បែរនោះ ពេលគាត់ដួល ស្រាប់តែឈ្មោះស៊ឺ ទាត់គាត់ចំនួនពីរជើងថែមទៀត ។ ស្ដ្រីចំណាស់រូបនេះនិយាយទៀតថា កូនកាបូបលុយដែលគាត់ស្ពាយនឹងកក៏ត្រូវឈ្មោះស៊ឺ កញ្ឆក់ដាច់ហើយយកទៅបាត់ ដោយក្នុងកាបូបនោះមានលុយថៃចំនួន៥ពាន់បាត និងលុយខ្មែរចំនួន១៥ម៉ឺនរៀល ។ តាមស្ដ្រីឈ្មោះអ៊ូ ម៉ី អាយុ២៣ឆ្នាំ និងឈ្មោះពេជ្រ សៀប អាយុ៤៣ឆ្នាំ ក៏ដូចជាអ្នកផ្សេងមួយចំនួនទៀតនៅកន្លែងកើតហេតុបានប្រាប់ថា ពិតជាកើតហេតុបែបនេះមែន ។
ចំណែកស្ដ្រីចំណាស់និយាយថា ឈ្មោះស៊ឺ ស្ថិតក្នុងអាការស្រវឹង ។ ជុំវិញការចោទប្រកាន់ខាងលើនេះ លោកអនុសេនីយ៍ត្រី វិញ ស៊ុយ ហៅស៊ឺ បានប្រាប់កោះសន្ដិភាពតាមទូរស័ព្ទនៅវេលាម៉ោង៣ និង២០នាទីល្ងាច ថ្ងៃទី២៣ កក្កដា ២០១០ ថាចំពោះការទាត់ ឬវាយព្រមទាំងកញ្ឆក់ កាបូបលុយពីស្ដ្រីរូបនោះ គឺលោកបានប្រព្រឹត្ដមែន ប៉ុន្ដែលោកថា ដោយសារតែស្ដ្រីរូបនោះតដៃ វាយលោកក្នុងពេលលោកចុះបង្ក្រាបបនល្បែង ។ រីឯលុយដែលនៅក្នុង កាបូបលោកប្រាប់ថា មានតែចំនួន១.៨០០បាត និងកាក់១០បាតមួយកាក់តែប៉ុណ្ណោះ ចំណែករឿងដកកាំភ្លើងគំរាមបាញ់នោះ ជារឿងមិនពិតទេ ។ មន្ដ្រីប៉ូលិសជាប់ចោទបន្ដថា លោកពិតជាខឹងនឹងស្ដ្រីឈ្មោះនូវដែល នាំព្រន្ធរបស់លោកមកលេងល្បែងស៊ីសង ហាមមិនស្ដាប់ទើបទះកំផ្លៀងព្រមានខ្លះ ។
មានការចោទសួរថា ទោះបីជាមានការអះអាងពីលោកអនុសេនីយ៍ត្រី វិញ ស៊ុយ ហៅស៊ឺ យ៉ាងណាក្ដី ប៉ុន្ដែករណីបង្ក្រាបបនល្បែងគេតែងតែឃើញសមត្ថកិច្ចចេញប្រតិបត្ដិការក្នុងលក្ខណៈជាក្រុមមិនមែនទៅតែម្នាក់ឯងយ៉ាងដូច្នេះទេ ម្យ៉ាងទៀតការបង្ក្រាបបនល្បែងសមត្ថកិច្ចក៏មិនដែលប្រើអំពើហិង្សាវាយទាត់ធាក់ទៅលើប្រជាពលរដ្ឋយ៉ាងដូច្នេះដែរ ។ លោកហាំ វណ្ណៈ មេបញ្ជាការវរសេនាតូចលេខ៨៩១ នៃនគរបាលការពារព្រំដែកគោក មិនអាចទាក់ទងសុំការបំភ្លឺ បានទេចំពោះបញ្ហាខាងលើនេះដោយលោក ជាប់កំពុងបំពេញបេសកកម្ម ៕
ចែករំលែកព័តមាននេះ