រាជធានីភ្នំពេញ ៖ កីឡាករម៉ូតូទឹក សាលី អ៊ូមើត ក្លាយជាកីឡាករទីមួយក្នុងប្រវត្តិសាស្ត្រកីឡាកម្ពុជាក្នុងព្រឹត្តិការណ៍កីឡាអាស៊ី(Asian Games) ឆ្នាំ២០១៨ បើគិតចាប់តាំងពីឆ្នាំ១៩៥៤មកតាមរយៈការឈ្នះមេដាយមាស១ និងសំរឹទ្ធ១ ។ មុននឹងក្លាយជាវីរកីឡាកររបស់ជាតិកម្ពុជាកីឡាករដែលមានដើមកំណើតជាខ្មែរអ៊ិស្លាមនៅខេត្តត្បូងឃ្មុំ ប៉ុន្តែធំធាត់នៅខេត្តក្រចេះរូបនេះ បានឆ្លងកាត់ជីវិតតស៊ូមិនធម្មតាដោយសារតែគ្រួសារក្រីក្រខ្លាំងពេក។
ជួបអ្នកយកព័ត៌មានកោះសន្តិភាព កីឡាករសាលី អ៊ូមើត បានរៀបរាប់ពីប្រវត្តិរបស់ខ្លួនមុននឹងក្លាយជាវីរកីឡាកររបស់ជាតិថា លោកមានស្រុកកំណើតនៅខេត្តត្បូងឃ្មុំ ដោយសារគ្រួសារក្រីក្រខ្លាំងពេកក៏បោះបង់ចោលការសិក្សាត្រឹមថ្នាក់ទី៦ហើយបានចាកចេញទៅរស់នៅជាមួយបងប្អូនជីដូនមួយឯទីក្រុងប៉ាតាយ៉ា ប្រទេសថៃ ក្នុងឆ្នាំ២០០៦ ដើម្បីរកប្រាក់យកមកជួយផ្គត់ផ្គង់គ្រួសារ ។
ដោយសារបងប្អូនជីដូនមួយរូបនោះមានអាជីពជាកីឡាករម៉ូតូទឹកដ៏ល្បីប្រចាំប្រទេសថៃ និងទទួលបានប្រាក់រង្វាន់យ៉ាងច្រើនពីរាជរដ្ឋាភិបាលថៃពេលដណ្ដើមបានមេដាយពីការប្រកួតម្ដងៗ ធ្វើឱ្យលោកមានចិត្តចង់ក្លាយជាកីឡាករម៉ូតូទឹកដ៏ខ្លាំងពូកែមួយរូបនៅថ្ងៃអនាគតដោយយកគំរូតាមបងប្អូនជីដូនមួយ ។
លោកថា មុននឹងសហព័ន្ធកីឡាម៉ូតូទឹកថៃអនុញ្ញាតឱ្យលោកក្លាយជាកីឡាករពេញសិទ្ធិនៅឆ្នាំ២០០៧ លោកបានចំណាយពេលអស់ជិតមួយឆ្នាំក្នុងការហ្វឹកហាត់បញ្ជាម៉ូតូទឹកដោយខ្លួនឯងផងនិងដោយមានការណែនាំជ្រោមជ្រែងយ៉ាងពេញទំហឹងពីសំណាក់បងប្អូនជីដូនមួយផង ។ ក្នុងការហ្វឹកហាត់ក្រោមការគ្រប់គ្រងរបស់សហព័ន្ធកីឡាម៉ូតូទឹកថៃ លោកជួបការលំបាកយ៉ាងខ្លាំង មានពេលខ្លះលោកត្រូវបានសហព័ន្ធដាក់វិន័យតឹងរ៉ឹងពេលមានកំហុសឆ្គងម្ដងៗ។
ជាក់ស្ដែងមានថ្ងៃមួយពេលប្រកួតសាកល្បងនៅក្នុងក្រុម រូបលោកត្រូវគ្រូបង្វឹកពិន័យឱ្យដាក់កូនសោសម្រាប់បញ្ឆេះម៉ាស៊ីនលើក្បាលរយៈពេល២-៣នាទី ហើយឱ្យកីឡាករដទៃចេញដំណើរទៅមុន ប៉ុន្តែលោកនៅតែធ្វើបានល្អដោយបង្កើនល្បឿនទៅដល់គោលដៅមុនគេដដែល។
សាលី អ៊ូមើត ដែលមកដល់ពេលនេះមានអាយុ២៦ឆ្នាំបានបន្តថា ដោយសារមើលឃើញលោកមានថ្វីដៃក្នុងការបញ្ជាម៉ូតូទឹកយ៉ាងស្ទាត់ជំនាញនេះហើយ ទើបនៅក្នុងឆ្នាំ២០០៨ លោកត្រូវបានសហព័ន្ធជ្រើសរើសឱ្យចូលរួមប្រកួតក្នុងព្រឹត្តិការណ៍មួយក្នុងប្រទេសថៃហើយដណ្ដើមបានតំណែងជាម្ចាស់ជើងឯកលើកដំបូង ។
នៅក្នុងការប្រកួតជាបន្តបន្ទាប់មកទៀតលោកមិនដែលថ្លោះធ្លោយម្ដងណាឡើយរមែងដណ្ដើមបានពានជើងឯករាល់ឆ្នាំនិងទទួលបាននូវការកោតសរសើរពីសំណាក់ថ្នាក់ដឹកនាំសហព័ន្ធមិនដាច់ពីមាត់ទៀតផង។ជាមួយនឹងការខិតខំប្រឹងប្រែងហ្វឹកហាត់យ៉ាងយកចិត្តទុកដាក់អស់រយៈពេលប្រហែលជា៣ឆ្នាំ នៅក្នុងឆ្នាំ២០១២ លោកត្រូវបានសហព័ន្ធជ្រើសរើសឱ្យទៅចូលរួមប្រកួតកីឡាម៉ូតូទឹកលំដាប់ថ្នាក់ពិភពលោកជាលើកដំបូងនៅឯសហរដ្ឋអាមេរិក ហើយជាលទ្ធផលលោកដណ្ដើមបានមេដាយមាស១គ្រឿង និងសំរឹទ្ធ១គ្រឿងត្រឡប់មកវិញធ្វើឱ្យកេរ្តិ៍ឈ្មោះរបស់លោកកាន់តែល្បីល្បាញថែមទៀត។
លោក សាលី អ៊ូមើត ដែលបច្ចុប្បន្នជាអគ្គលេខាធិការសហព័ន្ធកីឡាម៉ូតូទឹកកម្ពុជាបញ្ជាក់ថា ដោយសារតែមើលឃើញលោកមានបទពិសោធន៍ប្រកួតម៉ូតូទឹកយូរឆ្នាំ និងមានជំនាញបញ្ជាម៉ូតូទឹកច្បាស់លាស់ ថែមទាំងមានឈាមជ័រជាកូនខ្មែរស្រាប់ផងនោះ លោកត្រូវបានគណៈកម្មាធិការជាតិអូឡាំពិកកម្ពុជាទាក់ទងឱ្យតំណាងកម្ពុជាចូលរួមប្រកួតក្នុងព្រឹត្តិការណ៍កីឡាទ្វីបអាស៊ីឆ្នាំ២០១៨នៅប្រទេសឥណ្ឌូណេស៊ីជាលើកដំបូង ។ តាមរយៈវត្តមានរបស់លោកធ្វើឱ្យកម្ពុជាមានឱកាសបំបែកកំណត់ត្រាជាង៦០ឆ្នាំ បន្ទាប់ពីលោកដណ្ដើមបានមេដាយមាស១គ្រឿង និងសំរឹទ្ធ១គ្រឿងមកជូនជាតិ។
គួរបញ្ជាក់ផងដែរថា វីរកីឡាករសាលី អ៊ូមើត បានរៀបការប្រពន្ធនៅក្នុងឆ្នាំ២០១៤ ដែលមកដល់ពេលនេះមានកូន២នាក់(ស្រី១ប្រុស១)និងកំពុងតែរួមរស់ជាមួយគ្នានៅឯប្រទេសថៃ។ លោកមានបំណងនាំប្រពន្ធកូនវិលមករស់នៅប្រទេសកម្ពុជាក្នុងពេលដ៏ខ្លីខាងមុខ និងបានសន្យាថា នឹងរកមេដាយមាសជូនជាតិឱ្យបាន នៅពេលកម្ពុជាធ្វើជាម្ចាស់ផ្ទះកីឡាស៊ីហ្គេមលើកទី៣២ ឆ្នាំ២០២៣៕
ចែករំលែកព័តមាននេះ