ខេត្តស្វាយរៀង ៖ នៅថ្ងៃទី១១ ខែកញ្ញា ឆ្នាំ២០១៨ មានស្ត្រីរងគ្រោះម្នាក់បានអំពាវនាវសុំឲ្យសមត្ថកិច្ចស្រុកស្វាយទាបរកយុត្តិធម៌ឲ្យនាង ដោយសារមានជនល្មើស៣នាក់ប្រដាប់ដោយដុំថ្មបានជិះម៉ូតូដេញគប់ទៅលើបណ្តាលឲ្យរងរបួសក្បាលធ្ងន់ធ្ងរ ។
ស្ត្រីរងគ្រោះជាកម្មការិនីរោងចក្រកាត់ដេរនៅតំបន់សេដ្ឋកិច្ចពិសេសនាគរាជ ក្រុងបាវិត បានរងរបួសបែកក្បាលដោយសារជនមិនស្គាល់មុខជិះម៉ូតូមានគ្នា៣នាក់ដេញគប់ដុំថ្មមកលើរថយន្តដឹកកម្មករដែលកម្មការិនីរូបនេះជិះរួចក៏ជិះម៉ូតូគេចខ្លួនបាត់ស្រមោល ។
ស្ត្រីរងគ្រោះបានឲ្យដឹងថា ករណីនេះបានកើតឡើងកាលពីវេលាម៉ោង៧និង១០នាទីយប់ ថ្ងៃទី៧ ខែកញ្ញា ឆ្នាំ២០១៨ នៅលើផ្លូវជាតិលេខ១ ស្ថិតក្នុងភូមិក្បាលថ្នល់ ឃុំកណ្តៀងរាយស្រុកស្វាយទាប ខេត្តស្វាយរៀង ត្រង់ចំណុចខ្លោងទ្វារវត្តព្រៃអង្គ ។
បើតាមសមត្ថកិច្ចបានឲ្យដឹងថា នារីរងគ្រោះឈ្មោះ ជេត ម៉ារ៉ាឌី អាយុ២៥ឆ្នាំ មុខរបរកម្មការិនីរោងចក្រកាត់ដេរ នៅក្នុងតំបន់សេដ្ឋកិច្ចពិសេសនាគរាជ មានទីលំនៅភូមិចំបក់កោង ឃុំតាសួស ស្រុកស្វាយជ្រុំ ខេត្តស្វាយរៀង ។
នៅមុនពេលកើតហេតុមានជនសង្ស័យ៣នាក់មិនស្គាល់អត្តសញ្ញាណបានជិះម៉ូតូ១គ្រឿងទិសដៅស្របគា្នជាមួយរថយន្តកម្មករមកពីទិសខាងកើតទៅលិចលុះមកដល់ចំណុចផ្លូវចូលវត្តព្រៃអង្គបានគប់ដុំថ្មចំនួន២ដុំមកលើរថយន្តដឹកកម្មករ-កម្មការិនីមួយគ្រឿងបណ្តាលឲ្យត្រូវក្បាលរបស់នារីរងគ្រោះបែកក្បាលតែម្តង រួចជនសង្ស័យបានបន្តជិះម៉ូតូរត់គេចខ្លួនបាត់ស្រមោលតែម្តង ។
បច្ចុប្បន្នជនរងគ្រោះបានមកព្យាបាលនៅមន្ទីរពេទ្យស្រុកស្វាយទាប ចំណែកជនសង្ស័យសមត្ថកិច្ចកំពុងតាមស្រាវជ្រាវរកចាប់ខ្លួនយកមកដោះស្រាយតាមនីតិវិធីច្បាប់ ៕
ចែករំលែកព័តមាននេះ