រាជធានីភ្នំពេញ ៖ ដំណឹងនៃការទទួលមរណភាពរបស់លោក Dr. Beat Richner ស្ថាបនិកនៃមន្ទីរពេទ្យគន្ធបុប្ជា បានធ្វើឲ្យអ្នកសិល្បៈក៏ដូចជាមហាជនខ្មែរសម្តែងការសោកស្តាយ ហើយបានបង្ហោះសារបង្ហាញទឹកចិត្តបែបនេះសង្គមហ្វេសប៊ុក ។…
រាជធានីភ្នំពេញ ៖ ដំណឹងនៃការទទួលមរណភាពរបស់លោក Dr. Beat Richner ស្ថាបនិកនៃមន្ទីរពេទ្យគន្ធបុប្ជា បានធ្វើឲ្យអ្នកសិល្បៈក៏ដូចជាមហាជនខ្មែរសម្តែងការសោកស្តាយ ហើយបានបង្ហោះសារបង្ហាញទឹកចិត្តបែបនេះសង្គមហ្វេសប៊ុក ។
ទាំងអ្នកសិល្បៈ និងមហាជនខ្មែរបានចាត់ទុកមរណភាពរបស់Dr. Beat Richner គួរឲ្យសោកស្តាយជាទីបំផុត ដ្បិតលោកបានចំណាយពេលស្ទើរពេញមួយជីវិតក្នុងការជួយសង្គ្រោះ ព្យាបាលជំងឺដល់កុមារកម្ពុជា ។
តារាចម្រៀងកញ្ញាឱក សុគន្ធកញ្ញា បានបង្ហោះសារកាលពីថ្ងៃទី១០ ខែកញ្ញា ពីមរណភាពរបស់ Dr. Beat Richner ថា «ក្នុងនាមជាតារាចម្រៀងមួយរូបក្នុងប្រទេសកម្ពុជានាងខ្ញុំសូមចូលរួមរំលែកទុក្ខដ៏ក្រៀមក្រំ ដល់ Dr. Beat Richner និងក្រុមគ្រួសាររបស់គាត់ទាំងអស់ ដែលលោកដុកទ័រ ទើបតែទទួលមរណភាព ថ្មីៗ កាលពីល្ងាចថ្ងៃទី៩ កញ្ញា ២០១៨នេះ ។
លោកគឺជាវីរជន ក្នុងសន្តានចិត្តមហាសប្បុរស ពិតៗ ដល់កុមារកម្ពុជា ដែលលោកចំណាយពេលវេលាស្ទើរតែពេញមួយជីវិតរបស់លោកក្នុងការសង្គ្រោះជីវិតកុមារកម្ពុជា រាប់សែន រាប់លាននាក ់! លោកនឹងស្ថិតក្នុងការចងចាំរបស់ខ្មែរគ្រប់រូប ! សូមវិញ្ញាណក្ខន្ធរបស់លោកបានទៅដល់ឋានស្ងប់សុខ និងសុគតិភព កុំបីឃ្លាងឃ្លៀតឡើយ ! R.I.P Dr. Beat Richner »។
តារាចម្រៀងក្នុងផលិតកម្មថោនអ្នកនាងមាស សុខ សោភា បានបង្ហោះសារថា «នាងខ្ញុំសូមសម្តែងការសោកស្តាយដោយក្តីគោរព និងការអរគុណចេញពីបេះដូងរបស់នាងខ្ញុំ។ លោកបណ្ឌិតបានជួយជីវិតជាច្រើន សេចក្តីស្រឡាញ់ និងក្តីអាណិតអាសូររបស់លោកបណ្ឌិត ចំពោះកុមារកម្ពុជាគ្រប់រូប គឺជាបេះដូងដ៏កក់ក្តៅដ៏កម្ររមួយដែលយើងខ្ញុំមិនអាចបំភ្លេចបាន ។ សូមឲ្យដួងវិញ្ញាណក្ខន្ធ លោកបណ្ឌិតបានទៅកាន់សុគតិភព ហើយឈ្មោះ និងស្នាមញញឹមរបស់លោកបណ្ឌិតនឹងស្ថិតនៅក្នុងដួងចិត្តយើងជានិច្ច »។
តារាចម្រៀងលោកឆន សុវណ្ណរាជ បានសរសេរសារថា «ខ្ញុំបាទឆន សុវណ្ណរាជ សូមចូលរួមរំលែកទុក្ខដ៏ក្រៀមក្រំ និងសោកស្ដាយយ៉ាងខ្លាំងចំពោះការទទួលមរណភាពរបស់ លោកដុកទ័រ Beat Richner ដែលលោកដុកទ័រគឺជាសប្បុរសជនម្នាក់ដែលមានសន្តានចិត្តល្អ និងបានបូជាទាំងកម្លាំងកាយ កម្លាំងចិត្តស្ទើរតែពេញមួយជីវិតក្នុងការជួយសង្គ្រោះកុមារកម្ពុជា ។
ទោះបីលោកដុកទ័របានលាចាកលោកពិតមែន ប៉ុន្តែស្នាដៃ និងទឹកចិត្តរបស់លោកដុកទ័រគឺស្ថិតក្នុងការចងចាំរបស់ប្រជាជនកម្ពុជាជារៀងរហូត ជាចុងក្រោយខ្ញុំសូមជូនពរដល់វិញ្ញាណក្ខន្ធរបស់លោកដុកទ័រឲ្យបានទៅដល់ឋានសុគតិភពកុំបីឃ្លៀងឃ្លាតឡើយ R.I.P.»។
តារាចម្រៀងកញ្ញាសុខ ពិសី បានបង្ហោះសារ ថា «ខ្ញុំនឹងចងចាំលោកក្នុងបេះដូងរបស់ខ្ញុំជារៀងរហូត I love u my hero »។
តារាសម្តែងសិចស៊ីនាងដេននី ក្វាន់ បានបង្ហោះសារថា «នាងខ្ញុំ ដេននីក្វាន់ សូមចូលរួមរំលែកទុក្ខដ៏ក្រៀមក្រំ និងសោកស្ដាយយ៉ាងខ្លាំងចំពោះការទទួលមរណភាពរបស់លោកដុកទ័រ Beat Richner ដែលលោកដុកទ័រគឺជាសប្បុរសជនម្នាក់ដែលមានសន្តានចិត្តល្អ និងបានបូជាទាំងកម្លាំងកាយ កម្លាំងចិត្តស្ទើរតែពេញមួយជីវិតក្នុងការជួយសង្គ្រោះកុមារកម្ពុជា ។
ទោះបីលោកដុកទ័របានលាចាកលោកពិតមែន ប៉ុន្តែស្នាដៃ និងទឹកចិត្តរបស់លោកដុកទ័រគឺស្ថិតក្នុងការចងចាំរបស់ប្រជាជនកម្ពុជាជារៀងរហូត ជាចុងក្រោយខ្ញុំសូមជូនពរដល់វិញ្ញាណក្ខន្ធរបស់លោកដុកទ័រឲ្យបានទៅដល់ឋានសុគតិភពកុំបីឃ្លៀងឃ្លាតឡើយ R.I.P.»។
តារាសម្តែងកញ្ញានី មុន្នីនាថ បានសរសេរបង្ហោះដែរថា«ក្នុងនាមប្រជាជនកម្ពុជា ខ្ញុំសូមចូលរួមរំលែកទុក្ខដ៏ក្រៀមក្រំនេះ និងមានការសោយបំផុតចំពោះការបាត់បង់វីរបុរសកុមារកម្ពុជា លោកវេជ្ជបណ្ឌិត Beat Richner»។
ចំណែកលោកតាន់ គឹមសួរ បានចូលរួមសម្តែងការសោកស្តាយ និងបង្ហើបពីគម្រោងធ្វើរូបសំណាកលោក Beat Richner ជូនដល់មន្ទិរពេទ្យគន្ធបុប្ជា ដើម្បីជាការដឹងគុណចំពោះស្ថាបនិកដ៏ឆ្នើមរូបនេះ ។
លោកបានបញ្ជាក់តាមរយសារបង្ហោះតាមហ្វេសប៊ុកថា «ខ្ញុំ និងលោកអាចារ្យធំ នគររាជ នឹងរួមសហការគ្នាជាមួយវិចិត្រករសូនរូបដៃឯក Kamong Dong ដើម្បីធ្វើរូបសំណាកវីរបុរសខ្មែរ Dr. Beat Richnerអំពីស្ពាន់ ជូនមន្ទីពេទ្យគន្ធាបុប្ផាជាការបង្ហាញឲ្យឃើញថាកូនខ្មែរគ្រប់រូបគឺមានបេះដូងគោរពស្រឡាញ់ ដឹងគុណ និងសោកស្តាយបំផុតចំពោះការបាត់បង់និមិត្តរូបមួយនេះ ពួកយើងនឹងចងចាំអំពើល្អរបស់លោកអស់មួយជីវិត ។
រូបរាងកាយរបស់លោកបានចាកចោលពួកយើងក៏ពិតមែន តែវិញ្ញាណដួងព្រលឹងរបស់លោកនៅតែស្ថិតស្ថិរតាមថែរក្សាកុមារកម្ពុជាជារៀងរហូត។ លោកជាសាសន៍ដទៃទេ តែបេះដូងរបស់លោកចំពោះកុមារកម្ពុជាគឺមានទំហំធំធេងខ្លាំងណាស់ លោកបានលះបង់ច្រើនណាស់ទៅហើយ លោកហត់នឿយខ្លាំងពេកហើយ »។
ក្រៅពីអ្នកសិល្បះ នៅតាមហ្វេសប៊ុក មហាជនបានសម្តែងការសោកស្តាយ និងបាននាំគ្នាបង្ហោះសារចូលរួមរំលែកទុក្ខ និងមួយចំនួនទៀតក៏បានប្តូររូបprofile របស់ខ្លួនទៅជារូបលោក Beat Richner ។
លោកវេជ្ជបណ្ឌិត Beat Richner ដែលជាស្ថាបនិកមន្ទីរពេទ្យ គន្ធបុប្ផា បានទទួលមរណភាព នាថ្ងៃទី៩ ខែកញ្ញា ឆ្នាំ២០១៨ វេលាម៉ោង២ និង៤៥ នាទី ក្នុងជន្មាយុ៧១ឆ្នាំ នៅប្រទេសស្វីស បន្ទាប់ពីធ្លាក់ខ្លួនឈឺអស់ជាច្រើនឆ្នាំមកនេះ ។
បន្ទាប់ពីទទួលបានសញ្ញាបត្រវេជ្ជសាស្ត្រ ជំនាញវេជ្ជវិជ្ជាខាងជំងឺកុមារ ក្នុងឆ្នាំ១៩៧៣ លោកវេជ្ជបណ្ឌិតបេអាត រិចន័រ ធ្វើជាពេទ្យកុមារ នៅមន្ទីរពេទ្យកុមារនៅទីក្រុងហ្សូរិច(Zurich)។ ក្រោយមកនៅពេលធ្វើការជាមួយកាកបាទក្រហមស្វី៊ស លោកត្រូវបានបញ្ជូនមកប្រទេសកម្ពុជា និងបានធ្វើការនៅមន្ទីរពេទ្យគន្ធបុប្ផានៅទីក្រុងភ្នំពេញក្នុងចន្លោះឆ្នាំ១៩៧៤ និងឆ្នាំ១៩៧៥ ។ មន្ទីរពេទ្យនេះត្រូវបានប្រសិទ្ធភាពនាមដើម្បីជាការចងចាំដល់សម្តេចព្រះអង្គម្ចាស់ នរោត្តម គន្ធបុប្ផា (១៩៤៨-១៩៥២) ដែលជាព្រះរាជបុត្រីនៃព្រះបរមរតនកោដ្ឋ សម្តេចព្រះនរោត្តម សីហនុ ដែលបានសោយវិលាល័យក្នុងព្រះជន្មក្មេងវស្សា ។ នៅពេលដែលខ្មែរក្រហមបានកាន់កាប់ប្រទេសកម្ពុជា លោកត្រូវបានបង្ខំចិត្តចាកចេញទៅប្រទេសស្វ៊ីសវិញ និងបន្តការងារនៅមន្ទីរពេទ្យកុមារនៅទីក្រុងហ្សូរ៉ិច។
នៅខែធ្នូ ១៩៩១ រិចន័របានត្រឡប់មកកម្ពុជា និងបានឃើញការបំផ្លិចបំផ្លាញកើតឡើងជាបន្តបន្ទាប់ ដែលជាលទ្ធផលពីសង្គ្រាម។ លោកត្រូវបានស្នើសុំឲ្យបើក និងសាងសង់មន្ទីរពេទ្យគន្ធបុប្ផាឡើងវិញដោយរដ្ឋាភិបាលកម្ពុជា ។ លោករិចន័រ បានត្រឡប់មកកម្ពុជាជាផ្លូវការវិញ និងបង្កើតមូលនិធិគន្ធបុប្ផានៅខែមីនា ១៩៩២ ហើយមន្ទីរពេទ្យគន្ធបុប្ផាត្រូវបានបើកទ្វារឡើងវិញនៅខែវិច្ឆិកា ឆ្នាំ ១៩៩២ រហូតដល់សព្វថ្ងៃនេះ មន្ទីរពេទ្យបានពង្រីកមានសាខាចំនួនប្រាំ ៕
ចែករំលែកព័តមាននេះ