ខេតសៀមរាប ៖ ដើម្បីរំលឹកគុណដល់វិញាណក្ខន្ធវីរបុរសវីរនារីខ្មែរដែលបានបាត់បង់ជីវិតដើម្បីបុព្វហេតុជាតិមាតុភូមិ ជាពិសេសបុព្វហេតុការពារបូរណភាពទឹកដីកម្ពុជា នាថ្ងៃទី២២ មេសា ឆ្នាំ២០១០ ប្រជាពលរដ្ឋក្នុងឃុំពួក ស្រុកពួក រួមជាមួយពលរដ្ឋខ្មែរជាច្រើនទៀតមកពីគ្រប់ខេត្ដ-ក្រុង បានរៀបចំពិធីបុណ្យមហាសាមគ្គីដែលមានឈ្មោះថា បុណ្យបួងសួងរំលឹកគុណទសបារមីម្ចាស់ទឹក ម្ចាស់ដី និងវិញាណក្ខន្ធវីរបុរស វីរនារីខ្មែរ ។
លោកតានាម រស់ ដោយញញឹម បានឱ្យដឹងថា មហាបុណ្យនេះមិនមែនធ្វើឡើងដើម្បីជាប្រយោជន៍សំរាប់បុគ្គល ឬក្រុមណាមួយទេ តែសំរាប់ពលរដ្ឋខ្មែរទូទាំងប្រទេស ។ ពិធីបុណ្យនេះមានឈ្មោះថា បុណ្យមហាសាមគ្គីដើម្បីរំលឹកគុណដល់ទសបារមីម្ចាស់ទឹក ម្ចាស់ដី និងរំលឹកដល់វិញាណក្ខន្ធបុព្វវីរបុរស បុព្វវីរនារីខ្មែរ និងសុំសេចក្ដីសុខសន្ដិភាព ដែលពិធីបុណ្យនេះត្រូវរៀបចំធ្វើនៅប្រាសាទភិមានអាកាសខេត្ដសៀមរាប ។
លោកតាបញ្ជាក់ថា ពិធីនេះរៀបចំទៅតាមប្រពៃណី និងទំនៀមទំលាប់ខ្មែរ ដោយមានរៀបចំក្រុងពាលី ប្រគំភ្លេងពិណពាទ្យពូនភ្នំខ្សាច់ ភ្នំស្រូវ និងភ្នំអង្ករនៅប្រាសាទ ភិមានអាកាសខាងក្រោយព្រលានជល់ដំរី ក្នុងបរិវេណតំបន់អង្គរធំ ។ បន្ទាប់មករៀបចំពិធីបួងសួងរំលឹកដល់ដួងវិញាណក្ខន្ធបុព្វវីរបុរសបុព្វវីរនារីខ្មែរគ្រប់ជំនាន់សំខាន់ជំនាន់ មហានគរបន់ស្រន់សូមឱ្យបុព្វបុរសទាំងអស់រួចផុតពីបណ្ដាសាកម្មពៀរវេរាទុក្ខសោកទាំងឡាយ ព្រមទាំងវិលមកជួយពលរដ្ឋក្នុងព្រះរាជាណាចក្រកម្ពុជាឱ្យបានប្រកបតែសេចក្ដីសុខ និងសន្ដិភាពជារៀងរហូតទៅ ។ ពិធីបុណ្យនោះដែរ ក៏មានពិធីលែងសត្វចំនួន៥០០ក្បាល និងពិធីរាប់បាត្រព្រះសង្ឃ២៥៤អង្គជាកិច្ចបង្ហើយបុណ្យ ៕
ចែករំលែកព័តមាននេះ