ខេត្តកំពត ៖ ស្ពានឃុំស្ទឹងកែវ ស្រុកទឹកឈូ ដែលបានរងការខូចខាតទាំងស្រុង ដោយសារតែគ្រោះទឹកជំនន់បានហូរកួចបាក់ទាំងស្រុងកាលពីកំឡុងខែកក្កដា កន្លងទៅថ្មីៗនេះ បច្ចុប្បន្នត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជួយឧបត្ថម្ភថវិកាចំនួន១៥.០០០ដុល្លារ ស្មើនិង៦០លានរៀល តាមរយៈលោក ជាវ តាយ អភិបាលនៃគណអភិបាលខេត្ត ដើម្បីកសាងស្ពានឈើថ្មីជាបណ្តោះអាសន្នឡើងវិញ។ បើតាមលោក ប្រាក់ សាមឿន មេឃុំស្ទឹងកែវបានប្រាប់អ្នកសារព័ត៌មានយើងថា ដោយសារការយកចិត្តទុក ដាក់ពីសំណាក់ឯកឧត្ដ អភិបាលខេត្តក៏ដូចជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ដោយមើលឃើញពីការទុក្ខលំបាករបស់ប្រជាពលរដ្ឋ នៅឃុំស្ទឹងកែវយើងខ្ញុំយ៉ាងខ្លាំង ដោយសារតែគ្រោះទឹកជំនន់បានបោកបក់បាក់ស្ពានដែលពលរដ្ឋ ទូទាំងឃុំធ្លាប់ឆ្លងកាត់ ហើយពេលនោះសម្តេចបានផ្តល់ថវិកា ដើម្បីឲ្យសាងសង់ស្ពានថ្មីជាបន្ទាន់ សម្រាប់បំពេញសេចក្តីត្រូវការរបស់ប្រជាពលរដ្ឋនៅក្នុងតំបន់នៃឃុំស្ទឹងកែវនេះ។ លោកមេឃុំបានបន្តថា ក្រោយពីមានផែនការបញ្ជាភ្លាមៗពីលោកអភិបាលខេត្ត ស្ពាន ដែលបានកសាងថ្មីបណ្តោះអាសន្ននេះ ជាស្ពានឈើនះ គឺចាប់ផ្តើមសាង់សង់ឡើងវិញនៅថ្ងៃទី៣ ខែសីហា ឆ្នាំ២០១៨ រហូតមកដល់ថ្ងៃទី១០ ខែកញ្ញា ឆ្នាំ២០១៨នេះ សម្រេចលទ្ធផលបាន៧០ភាគរយហើយ នៅតែវាយធ្នឹមក្រាលក្តារ និងបង្កាន់ដៃតែប៉ុណ្ណោះ។ លោកមេឃុំបន្តថា ទោះបីយ៉ាងណាយើងខ្ញុំជុំរុញជាង ធ្វើឲ្យហើយរួចរាល់ មុនថ្ងៃភ្ជុំបិណ្ឌដើម្បីបង្កការងាយស្រួលឲ្យបងប្អូនប្រជាពលរដ្ឋ ទៅកាន់បិណ្ឌ។
ឯកឧត្តម ជាវ តាយ ចុះពិនិត្យការកសាងស្ពានឈើដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នៅព្រឹកថ្ងៃច័ន្ទ ១កើត ខែភទ្របទ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១០ ខែកញ្ញា ឆ្នាំ២០១៨នេះ។ លោកអភិបាលខេត្ត បានថ្លែងថា ការសាងសង់ស្ពាននេះធ្វើយ៉ាងណាកុំយកតែបរិមាណ ត្រូវឲ្យមានគុណភាពល្អផងដែរ។ លោកសុំឲ្យធ្វើយ៉ាងណាត្រូវធានាគុណភាព ហើយស្ពាននេះក្រោយពី ធ្វើហើយរួចរាល់ បងប្អូនចេះប្រើប្រាស់ និងចេះជួយថែគ្នា រថយន្តធុនធំសុំកុំដឹកលើសចំណុះ និងឆ្លងកាត់ នាំឲ្យខូចខាត។ យើងប្រើប្រាស់ត្រឹមតែរថយន្តខ្នាតតូចទេ ដើម្បីទ្រនឹងទម្ងន់ស្ពាន ដូចកាលស្ពានមិនទាន់ ខូចអ៊ីចឹងដែរ។
ក្នុងឱកាសមកពិនិត្យស្ពានដែលកំពុងសាងសង់នេះដែរ លោកអភិបាលខេត្តក៏បាន លើកឡើងអំពីការស្តារ និងជុលប្រឡាយនៅក្នុងឃុំស្ទឹងកែវ ចំពោះប្រឡាយដែលកន្លងមករងការខូចខាត ស្ទះចរន្តផ្លូវទឹក និងមានការខ្វះខាតទឹកដើម្បីស្រោចស្រពដល់ដំណាំកសិកម្មរបស់ប្រជាពលរដ្ឋ យើងនៅ ក្នុងឃុំស្ទឹងកែវនេះ លោកក៏បានសួរនាំទៅប្រធានមន្ទីរ កសិកម្មខេត្ត ដើម្បីស្តារប្រឡាយនៅក្នុងឃុំនេះជូន ប្រជាពលរដ្ឋ ដោយលោកអះអាងថា ឲ្យតែធ្វើខ្វះថវិកាលោក និងជួយឧបត្ថម្ភ។ ជាមួយគ្នានេះដែរក្រោយពី បញ្ចប់ការលើកឡើងអំពីការស្តារប្រឡាយ លោកអភិបាលខេត្តក៏បានសួរប្រជាពលរដ្ឋដែលមកចូលរួម ក្នុងកម្មវិធីនាព្រឹកនោះ ក្រៅពីសម្តេចជួយស្ពាន និងរដ្ឋបាលខេត្តជួយស្តារប្រឡាយហើយ តើបងប្អូនសំណូមពរចង់បានអ្វីទៀត សុំឲ្យយោបល់មក លោកនឹងដោះស្រាយជូនបងប្អូនបន្តទៅទៀត ?
ក្នុងនោះត្រូវបាន ប្រជាពលរដ្ឋសុំឲ្យជួយដោះស្រាយភ្លើងអគ្គិសនីយបំភ្លឺតាមផ្លូវនៅក្នុងឃុំចម្ងាយ ៣.០០០ម៉ែត្រ លោកអភិបាលខេត្តបានជម្រាបប្រជាពលរដ្ឋថា ថ្ងៃនេះខាងអ្នក គ្រប់គ្រងអគ្គិសនី អត់អញ្ជើញមក ប៉ុន្តែលោកទទួលសំណូមពររបស់បងប្អូន ពេលត្រឡប់មកខេត្តវិញ លោកនឹងអញ្ជើញ ប្រធានអគ្គិសនីមកនិយាយគ្នា ដើម្បីរកគន្លឹះដោះស្រាយជូនបងប្អូនឲ្យបានតាមសំណូមពររបស់បងប្អូន៕
ចែករំលែកព័តមាននេះ