ខេត្តកណ្ដាល ៖ នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត សហការជាមួយនគរ បាលស្រុកកោះធំ ដោយមានការសម្របសម្រួលនីតិវិធីពីសំណាក់លោកឯក ស៊ុនរស្មី ព្រះរាជអាជ្ញារងអមសាលាដំបូងខេត្ត បានបង្ក្រាបចាហួយនិងនំស្រួយក្លែងក្លាយ តាមពាក្យបណ្តឹងរបស់ក្រុមហ៊ុនជីប ម៉ុង គ្រុបដែលទទួលបានសិទ្ធិលក់ផ្តាច់មុខទូទាំងប្រទេស ។
ការបង្ក្រាបនេះ ធ្វើឡើងកាលពីវេលាម៉ោង៥ និង៣០នាទី ថ្ងៃទី៧ ខែកញ្ញាកន្លងទៅ នៅផ្លូវលេខ២១A ភូមិព្រែកសំរោង សង្កាត់តាខ្មៅ ក្រុងតាខ្មៅ និងទីតាំងមួយទៀត នៅភូមិខ្ពបឃុំសំពៅពូន ស្រុកកោះធំ ។
លោក លី សុជាតិ នាយការិយាល័យនគរបាលប្រឆាំងបទល្មើសសេដ្ឋកិច្ច បានឲ្យដឹងថា អនុវត្តតាមបទ បញ្ជារបស់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្ត និងមានការសម្របសម្រួលនីតិវិធីពីលោកឯក ស៊ុនរស្មី ព្រះរាជអាជ្ញារងអមសាលាដំបូងខេត្ត កម្លាំងនគរបាលប្រឆាំងបទល្មើសសេដ្ឋកិច្ច បានចាប់ឃាត់រថយន្ត២គ្រឿងដែលផ្ទុកទំនិញចាហួយពេញនៅផ្លូវលេខ២១A ភូមិព្រែកសំរោង សង្កាត់តាខ្មៅ ក្រុងតាខ្មៅ និងបន្តទៅឆែកឆេរឃ្លាំងស្តុកទំនិញនៅភូមិខ្ពប ឃុំសំពៅពូន ស្រុកកោះធំឃាត់បានរថយន្ត១គ្រឿង បិទឃ្លុបជិត ផ្ទុកសុទ្ធតែចាហួយនិងនំស្រួយក្លែងក្លាយ ។
លោកនាយការិយាល័យបានឲ្យដឹងទៀតថា ម្ចាស់ទំនិញឈ្មោះ ស្រ៊ន ចន្ធី ភេទស្រី អាយុ៤៤ឆ្នាំ មានទីលំនៅក្នុងភូមិខ្ពប ឃុំសំពៅពូន និងមានស្រុកកំណើតនៅភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ ត្រូវបានឃាត់ខ្លួនដើម្បីសាកសួរ ។
ប្រតិបត្តិការនេះសមត្ថកិច្ចបានឃាត់រថយន្តចំនួន៣គ្រឿង នំស្រួយម៉ាកRUAPUANផលិតនៅប្រទេសវៀតណាមចំនួន១៦៨កេស ស្មើនឹង២០.១៦០កញ្ចប់តូច តំណាប់ដូងម៉ាកមិញ ចូវ ផលិតនៅប្រទសវៀតណាម៤៨កេស ស្មើ២០០កញ្ចប់ ចាហួយដូងម៉ាកSONGLONG ចំនួន៣កេសស្មើ៤៨កំប៉ុង និងនំចម្រុះជាច្រើនទៀត ។
លោកនាយការិយាល័យបញ្ជាក់ថា ចាហួយដែលត្រូវបានបង្ក្រាបគឺគ្មានច្បាប់អនុញ្ញាតនាំចូល ដែលជាការរំលោភលើសិទ្ធិផ្ដាច់មុខរបស់ក្រុមហ៊ុនជីបម៉ុងគ្រុប ដែលមានសិទ្ធិចែកចាយទួទាំងប្រទេស ៕
ចែករំលែកព័តមាននេះ