ខេត្តបន្ទាយមានជ័យ ៖ កាលពីថ្ងៃទី៧ ខែកញ្ញា ឆ្នាំ២០១៨ ក្រសួងវប្បធ៌ម និងវិចិត្រសិល្បៈ បានរៀបចំពិធីបួងសួងសុំសេចក្តីសុខ ក្នុងការបិទការដ្ឋានជួសជុលរោងទងមុខខាងលិចប៉ែកខាងត្បូង និងបើកការដ្ឋានជួសជុលក្ដារបែនខាងកើតនៃប្រាសាទបន្ទាយឆ្មារ ។
ប្រាសាទបន្ទាយឆ្មារមានទីតាំងស្ថិតនៅភូមិបន្ទាយឆ្មារ ឃុំបន្ទាយឆ្មារ ស្រុកពួក ខេត្តបន្ទាយមានជ័យ ។ លោកជុច ភឿន រដ្ឋលេខាធិការ តំណាងលោកជំទាវ រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិបតីក្នុងពិធីបួងសួងនេះ ។ លោកបានមានប្រសាសន៍ថា ប្រាក់សម្រាប់ជួសជុលក្រោមការជួយឧបត្ថម្ភពីលោកជំទាវម៉ៅ ម៉ាល័យ កែ គឹមយ៉ាន ។ កន្លងមកក្រុមការងារបានជួសជុលចំណុចជាច្រើននៅប្រាសាទបន្ទាយឆ្មារ ដូចជាការជួសជុលស្ពានហាលខាងត្បូង ស្ពានហាលខាងកើត ។
លោកជុច ភឿន បញ្ជាក់ថា ប្រាសាទបន្ទាយឆ្មារ បានកសាងឡើងនៅចុងសតវត្សរ៍ទី១២ ដល់ដើមសតវត្សរ៍ទី១៣ ក្នុងរជ្ជកាលព្រះបាទជ័យវរ្ម័នទី៧ ដើម្បីឧទ្ទិសដល់បុត្រា និងមេទ័ព៤នាក់របស់ព្រះអង្គដែលបានពលីក្នុងសមរភូមិដេញចាមនៅឆ្នាំ១១៧៧ ៕
ចែករំលែកព័តមាននេះ