រាជធានីភ្នំពេញ ៖ តារាសម្តែងកញ្ញាណាក់ ស្រីណា និងផលិតកម្មមហាហង្សបានចរចាដោះស្រាយបញ្ចប់រឿងជំពាក់លុយថ្លៃសម្តែងហើយ ។ រឿងរ៉ាវមួយនេះបានបង្កឲ្យមានការភ្ញាក់ផ្អើលក្នុងពិភពលោកសិល្បៈតាមរយៈការទម្លាយតាមហ្វេសប៊ុករបស់ណាក់ ស្រីណា ។ ទាំងណាក់…
រាជធានីភ្នំពេញ ៖ តារាសម្តែងកញ្ញាណាក់ ស្រីណា និងផលិតកម្មមហាហង្សបានចរចាដោះស្រាយបញ្ចប់រឿងជំពាក់លុយថ្លៃសម្តែងហើយ ។ រឿងរ៉ាវមួយនេះបានបង្កឲ្យមានការភ្ញាក់ផ្អើលក្នុងពិភពលោកសិល្បៈតាមរយៈការទម្លាយតាមហ្វេសប៊ុករបស់ណាក់ ស្រីណា ។
ទាំងណាក់ ស្រីណា និងផលិតកម្មមហាហង្សដែលមានលោកអូន ឧសហ្សា ជាតំណាងបានសម្រុះសម្រួលគ្នាដោយផ្ទាល់ ដោយមានការជួយអន្តរាគមន៍ពីលោកហេង ឡុង ជួសមុខឲ្យអ្នកនាងចន ច័ន្ទលក្ខិណា ប្រធានសមាគមសិល្បករខ្មែរ នៅថ្ងៃទី៧ ខែកញ្ញា ឆ្នាំ២០១៨។
ក្នុងកិច្ចចរចានោះភាគីទាំងពីរបានយល់ព្រមដោះស្រាយគ្នាដោយសន្តិវិធី ដោយខាងផលិតកម្មមហាហង្សបានសម្រេចទូទាត់ប្រាក់ទៅឲ្យណាក់ ស្រីណា ខណៈពេលដែលតារាសម្តែងរូបនេះបានសុំទោសជាសាធារណៈចំពោះការប្រើប្រាស់ពាក្យសម្តីមិនសមរម្យដល់ផលិតកម្ម ។
ថៅកែផលិតកម្មមហាហង្សលោកអ៊ិន សុភិន អះអាងថា បន្ទាប់ពីក្រុមហ៊ុនលោកគ្រោងនឹងរៀបចំពាក្យបណ្តឹងដើម្បីប្តឹងចំពោះការបង្ហោះខ្លឹមសារមិនសមរម្យមកលើក្រុមហ៊ុនពីកញ្ញាណាក់ ស្រីណា នោះ សមាគមសិល្បករខ្មែរក៏បានចេញមកសម្របសម្រួល ។
ក្រោយមានការសម្របសម្រួលនេះមក តារាសម្តែងណាក់ ស្រីណា ក៏បានយល់ព្រមសុំទោសក្រុមហ៊ុនវិញ ទើបធ្វើឲ្យខាងលោកយល់ព្រមទូទាត់ប្រាក់ឲ្យនាងចប់សព្វគ្រប់ កុំឲ្យមានរឿងវែងឆ្ងាយ ។
បើតាមលោកអ៊ិន សុភីន ឆ្លងកាត់រឿងរ៉ាវមួយនេះផលិតកម្មរបស់លោកនឹងពិចារណាតាមការជាក់ស្តែងពីការហៅតួណាក់ ស្រីណាសម្តែងទៀតឬយ៉ាងណា ។ លោកផ្ទាល់រអាចិត្តក្នុងការហៅតារាសម្តែងរូបនេះសម្តែងទៀត ព្រោះរឿងរ៉ាវនេះបានធ្វើឲ្យប៉ះពាល់មុខមាត់ផលិតកម្មរបស់លោកយ៉ាងខ្លាំង ។
ដោយឡែកតារាសម្តែងកញ្ញាណាក់ ស្រីណា បានបង្ហោះសារតាមហ្វេសប៊ុកបន្ទាប់ពីកិច្ចចរចានោះបានបញ្ចប់ថា «ដោយសារតែមានការយល់ច្រឡំទាំងសងខាងរវាងនាងខ្ញុំ និងក្រុមហ៊ុនមហាហង្សកន្លងមកដែលបណ្តាលឲ្យមានការប្រើប្រាស់ពាក្យពេចន៍មិនសមរម្យ និងប៉ះពាល់ដល់ក្រុមហ៊ុនមហាហង្ស ដូច្នេះក្នុងពេលនេះនាងខ្ញុំសូមទោសលោកអគ្គនាយក និងផលិតកម្មមហាហង្សចំពោះការប្រើពាក្យពេចន៍មិនសមរម្យដោយប្រការណាមួយដែលធ្វើឲ្យមានការប៉ះពាល់ដល់លោក និងផលិតកម្មរបស់លោក ។ នាងខ្ញុំក៏សូមគោរពអរគុណលោកអគ្គនាយកផងដែរ ដែលលោកព្រមផ្តល់ដំណោះស្រាយយ៉ាងប្រសើរជូនខ្ញុំ »។
ដោយសារតែភាពអត់ទ្រាំមិនបាន ខណៈការថតកុនបានចប់រំលងជិត១ឆ្នាំហើយ ក្នុងនាមជាតួសម្តែងក្នុងរឿង «មរតកចុកឈាម» តែផលិតកម្មមហាហង្សពុំទាន់ប្រគល់ប្រាក់គ្រប់ចំនួនទៅតាមកិច្ចសន្យា និងបន្តនៅស្ងាត់ស្ងៀមនោះទើបណាក់ ស្រីណា បានសម្រេចចិត្តទម្លាយជាសារអាថ៌កំបាំងពីការជំពាក់លុយសម្តែងតាមហ្វេសប៊ុកបង្កការភ្ញាក់ផ្អើលយ៉ាងខ្លាំង ។
ឆ្លើយតបបញ្ហានេះលោកអ៊ិន សុភិន បានអះអាងថា ហេតុផលដែលតារាសម្ដែងណាក់ ស្រីណា មិនទទួលបានតម្លៃថតនៅសល់ចំនួន២ពាន់ដុល្លារ ក្រោយពេលថតចប់ មិនមែនជាកំហុសរបស់ផលិតកម្មរបស់លោកទេ ប៉ុន្តែគឺកំហុសរបស់អតិថិជនរបស់លោកដែលជាអ្នកស្នើឲ្យលោកផលិតរឿង«មរតកចុកឈាម» ហើយតម្រូវឲ្យលោកជ្រើសយកនាងធ្វើជាតួឯកប៉ុណ្ណោះ ។ ក្រោយពេលផលិតចប់ អតិថិជនរបស់លោកមិនបានប្រគល់លុយឲ្យលោកតាមការកំណត់ ទើបលោកមិនបានដោះស្រាយប្រាក់ឲ្យតួដែរ ៕
ចែករំលែកព័តមាននេះ