រាជធានីភ្នំពេញ៖ តន្ត្រីករប្រពៃណី និងអ្នកចម្រៀងវ័យក្មេងទាំងនៅកម្ពុជា តំបន់មេគង្គ និងជុំវិញពិភពលោក នឹងជួបជុំគ្នានៅមជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈ ក្នុងខេត្តសៀមរាប នាពេលខាងមុខដើម្បីប្រារព្ធកម្មវិធី«តន្ត្រីអេសណូកម្ពុជា»ជាលើកដំបូង ។ នេះជាគម្រោងផ្ដួចផ្ដើមឡើងដោយអង្គការសិល្បៈខ្មែរអមតៈ…
រាជធានីភ្នំពេញ៖ តន្ត្រីករប្រពៃណី និងអ្នកចម្រៀងវ័យក្មេងទាំងនៅកម្ពុជា តំបន់មេគង្គ និងជុំវិញពិភពលោក នឹងជួបជុំគ្នានៅមជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈ ក្នុងខេត្តសៀមរាប នាពេលខាងមុខដើម្បីប្រារព្ធកម្មវិធី«តន្ត្រីអេសណូកម្ពុជា»ជាលើកដំបូង ។ នេះជាគម្រោងផ្ដួចផ្ដើមឡើងដោយអង្គការសិល្បៈខ្មែរអមតៈ និងជាផ្នែកមួយនៃកម្មវិធីអេសណូ (Ethno)។
សិល្បករទាំង៣០នាក់ ជំនាញ និងមានវប្បធម៌ ខុសៗគ្នានឹងចំណាយពេលមួយសប្ដាហ៍ស្នាក់នៅរួមគ្នា ឈ្វេងយល់ពីគ្នាទៅវិញទៅមក ចែករំលែកចំណេះដឹង និងបង្កើតស្នាដៃតន្ត្រីជាមួយគ្នា ហើយនឹងត្រូវសម្ដែងជូនសាធារណជនទស្សនាចំនួន២លើក នៅថ្ងៃទី១២ និង១៣ ខែមករា ២០១៩ នៅខេត្តសៀមរាប ។
បើយោងតាមសេចក្តីប្រកាសព័ត៌មានរបស់អង្គការសិល្បៈខ្មែរអមតៈឲ្យដឹងថា កម្មវិធី អេសណូ បានរៀបចំធ្វើឡើងអស់រយៈពេល ៣០ឆ្នាំមកហើយ នៅតាមបណ្ដាប្រទេសចំនួន ២០ ។ អ្នកចូលរួមជាតន្ត្រីករវ័យក្មេងដែលមានបេសកកម្មររក្សាមរតកវប្បធម៌ពីគ្រប់ទិសទីជុំវិញពិភពលោកឲ្យនៅស្ថិតស្ថិរជាមួយមនុស្សជំនាន់ថ្មី ។ សិល្បករផ្ទេរចំណេះដឹងតន្ត្រី និងវប្បធម៌ពីម្នាក់ទៅម្នាក់តាមរបៀបបុរាណ ។ អ្នកចូលរួម គឺជាសិស្ស ក៏ជាគ្រូដែរក្នុងពេលជាមួយគ្នា ។
កម្មវិធីលម្អិតរួមមាន ការហាត់រៀនជាមួយគ្នា និងការសម្ដែង សិល្បករកម្មវិធីអេសណូកម្ពុជានឹងអាចផ្សព្វផ្សាយតន្ត្រីរបស់ពួកគេ។ តាមរយៈការប្រគំ និងសម្ដែងមរតកវប្បធម៌អរូបីជាតិសាសន៍ នីមួយៗ សិក្ខាសាលាតន្ត្រីអេសណូកម្ពុជា នឹងជាឱកាសមួយសម្រាប់សិល្បករបង្កើនការគោរព និងអធ្យាស្រ័យគ្នា ព្រមទាំងការចេះផ្ដល់តម្លៃលើវប្បធម៌គ្នាទៅវិញទៅមកតាមរយៈតន្ត្រី ។
គាត សុគីម សិល្បករចាប៉ីដងវែង និងអ្នកចូលរួមកម្មវិធី Ethno Germany 2017 និងជាសមាជិកក្នុងក្រុមដឹកនាំសិល្បៈសម្រាប់កម្មវិធី Ethno កម្ពុជា បានឲ្យដឹងថា«ពេលវេលានៅអាល្លឺម៉ង់កាលពីឆ្នាំទៅ ពិតជាអស្ចារ្យណាស់ ។ ខ្ញុំបានស្គាល់សិល្បករជាច្រើនមកពីជុំវិញពិភពលោក ។ យើងលេង និងច្រៀងបទចម្រៀងនៅតាមប្រទេស នីមួយៗ។ យើងនិយាយគ្នា និងឈ្វេងយល់ពីគ្នាទៅវិញទៅមក ព្រមទាំងទទួលយកគ្នាទៅវិញទៅមកអំពីប្រទេស និងវប្បធម៌ ។
នៅកម្ពុជា និងតំបន់មេកង្គ យើងមានវប្បធម៌ និងសិល្បៈដ៏សំបូរបែប ដែលយើងមានលក្ខណៈរួមគ្នាខ្លះ និងខុសគ្នាខ្លះ ។ ខ្ញុំជឿជាក់ថា កម្មវិធី Ethno កម្ពុជា គឺជាកន្លែងប្រមូលផ្ដុំមួយរបស់សិល្បករមកពីគ្រប់ទិសទី មកឈ្វេងយល់ពីគ្នាទៅវិញទៅមក ។ ខ្ញុំពិតជាចង់ឃើញកម្មវិធីនេះកើតមានឡើងណាស់ ដូចជាពេលហាត់ និងសមជាមួយគ្នា កម្មវិធីប្រគំតន្ត្រី ព្រមទាំងពេលនិយាយគ្នា និងចែករំលែករឿងរ៉ាវនានាជាមួយសិល្បករដទៃទៀតផងដែរ»៕
ចែករំលែកព័តមាននេះ