រាជធានីភ្នំពេញ ៖ កវីលាក់ខ្លួន តន្ត្រីករ និងជាអ្នកដឹកនាំប្រគំតន្ត្រី(សម្រួលតន្ត្រី)ដ៏ល្បីក្នុងជំនាន់លោកស៊ីន ស៊ីសាមុត គឺលោកម៉ម ប៊ុនណារ៉ាយ បានលាចាកលោកហើយ កាលពីវេលាម៉ោង៩ព្រឹកថ្ងៃទី៣ ខែកញ្ញា ២០១៨ដោយរោគាពាធក្នុងវ័យ៨៥ឆ្នាំ ។
តន្ត្រីករជើងចាស់ម៉ម ប៊ុណ្ណារ៉ាយ បានជម្នះជាមួយនឹងជំងឺដ៏រ៉ាំរៃ៉ ជាមួយនឹងជរាពាធអស់ពេលជាច្រើនឆ្នាំ ដោយបានដេកដួលលើគ្រែសម្រាកក្នុងគេហដ្ឋានរបស់គាត់នៅជិតសាលាពញាក្រែក ខាងជើងស្ពានជ្រោយចង្វាប្រហែល៣០០ម៉ែត្រ មុនពេលគាត់ទទួលមរណភាពនាពេលនេះ ។
បច្ចុប្បន្នសពរបស់លោកគាត់កំពុងតម្កល់នៅព្រះវិហារយេស៊ូគ្រឹស្តមួយ ម្ដុំខណ្ឌឫស្សីកែវ រាជធានីភ្នំពេញ ។ នេះចាត់ទុកជាដំណឹងដល់ទស្សនិកជនដែលធ្លាប់និយម និងគាំទ្រនូវទឹកដៃរបស់គាត់នាពេលកន្លងមក និងចាត់ទុកមរណភាពរបស់អតីតតន្ត្រីករដ៏ចំណាស់រូបនេះគឺជាការបាត់បងនូវធនធានមនុស្សដ៏សំខាន់ក្នុងវិស័យសិល្បៈចម្រៀងខ្មែរ ។
មុន និងក្រោយមរណភាពរបស់លោកម៉ម ប៊ុនណារ៉ាយ កូនៗរបស់គាត់មិនចង់ទទួលជំនួយទេ ដោយពួកគាត់ខ្លាចមានការរិះគន់ ដូចសិល្បករនានាដែលពេលមានបាន ថតរូបឡាន វីឡាបង្អួតគេ លុះពេលឈឺទើបលើកដៃសុំជំនួយ ។ តែចំពោះតន្ត្រីកររៀមច្បង ខុសពីសិល្បករជំនាន់ថ្មី គាត់មិនដែលមានអ្វីអួតគេឡើយ ហើយក៏មិនដែលចេញមុខ ចង់ល្បីឈ្មោះតាមកាសែត ឬទូរទស្សន៍ដែរ គឺលោករស់ដាច់ពីគេឯង រស់បែបលាក់ខ្លួនរហូត ហេតុនេះទើបគេមិនសូវស្គាល់លោក ។ ស្នាដៃលោកមានច្រើនដែលគួរឲ្យកោតសរសើរណាស់ ។
ពេលនេះលោកកម៉ម ប៊ុនណារ៉ាយ បានលាចាកលោកទៅហើយ ប៉ុន្តែស្នាដៃតែងនិពន្ធតន្ត្រីជាមួយនឹងទឹកដមសំនៀងដ៏ក្រអួនក្រអៅនៃអធិរាជសំឡេងមាសលោកស៊ីន ស៊ីសាមុត នៅតែបំពេអារម្មណ៍ប្រិយមិត្តអ្នកស្តាប់នៅឡើយ។
លោកម៉ម ប៊ុនណារ៉ាយ គឺជាប្អូនបង្កើតរបស់លោកម៉ម បុប្ផានី ដែលជាតន្ត្រីកររៀមច្បងនៅសម័យដើម ។ កន្លងមកលោកបានកសាងស្នាដៃជាច្រើន បន្សល់ឲ្យអ្នកជំនាន់ក្រោយស្តាប់រហូតមកដល់សព្វថ្ងៃនេះ ជាមួយការនិពន្ធបទភ្លេង ឲ្យលោកស៊ីន ស៊ីសាមុត និងអ្នកសិល្បៈ ល្បីៗនាសម័យមុនជាច្រើនរូប ។ លោកម៉ម ប៊ុនណារ៉ាយ ត្រូវបានគេចាត់ទុកគឺជាតន្ត្រីករជើងចាស់ដែលមានទឹកដៃខ្ពស់មួយរូប ។
ស្នាដៃរបស់លោកមានច្រើនណាស់ ភាគច្រើនលោកជាអ្នកដឹកនាំភ្លេងប្រគំ (សម្រួលតន្ត្រី) រីឯស្នាដៃនិពន្ធទំនុកច្រៀង និងបទភ្លេងគឺជារបស់កវីនិងតន្ត្រីករ ផ្សេងៗ ។ បទចម្រៀងជាច្រើនដែលគាត់សម្រួលតន្ត្រីក្នុងដូចជាបទ ៖
«កម្មប្រចាំកាយ» (ស៊ីន ស៊ីសាមុត) «មេត្តារៀមផង» (លោកគង់ សំអឿន-លោកគង់ ចន្ថា) «នៅតែឃ្លាត» (លោកគង់ ចន្ថា) «មេឃអើយជួយផង» (សាមុត-សុទ្ធា) «ឃ្លាតទាំងទឹកភ្នែក» រស់ សេរីសុទ្ធា «តំណក់ភ្លៀងស្រក» (ប៉ែន រ៉ន) «រង់ចាំតែបងមួយ» (រស់ សេរីសុទ្ធា) «រំពឹង ! រំពឹង !» (រស់ សេរីសុទ្ធា) «បងពិតជាកំលោះ» ។
(សាមុត-សុទ្ធា) «កណ្តូបបុកស្រូវ» (សាមុត-សុទ្ធា) «ផ្កាត្របែកព្រៃ» (ឌី សុខន) «ចម្រៀងមកមិត្ត» (ឌី សុខន) «ស្នេហ៍យើង» (សុទ្ធា) «គ្រាដំបូង» (សាមុត) «ជីវិតអ្នកផ្សងព្រេង» (សាមុត) «បងក្បត់អូនហើយ» (ហួយ មាស) «ខែរះក្រោមផ្កាយ» (ម៉ម ប៊ុនណារ៉ាយ)«បញ្ជីខ្មោច» (អ៊ឹង ណារី) «កំពង់ធំជំរំចិត្ត» ស៊ីន ស៊ីសាមុត ។
ចំណែក៦បទដែលជាស្នាដៃនិពន្ធ និងដឹកនាំភ្លេងផ្ទាល់របស់គាត់មានបទ១.ស្ទឹងកែវ ២.ថ្ពាល់ក្រហមឃើញសរសៃ ៣.បិសាចក្រមុំ ៤.កំពង់ធំជំរំចិត្ត ៥.ជើងមេឃពណ៌ខ្មៅ៦.រិទ្ធិសក្តិព្រួញមាស ៕ វីដេអូដកស្រង់ចេញពី ៖ SSK Old Song
ចែករំលែកព័តមាននេះ