សារព័ត៌មានថៃកាលពីពេល ថ្មីៗកន្លងមកផ្សាយថា ជ្រូកព្រៃពូជបង្កាត់មួយក្បាលដ៏សែនចេះ មានចរិកគួរឲ្យស្រឡាញ់រស់នៅជាមួយមនុស្ស នៅស្រុកឡាំថាប់ ខេត្តក្រាប៊ី ប្រទេសថៃ ដោយម្ចាស់ផ្ទះជាចៅសង្កាត់រង ។
ជ្រូកនោះឈ្មោះ«ចេកអំបូង» អាយុ១ឆ្នាំ ព្រោះចេកជាចំណីដ៏ឆ្ងាញ់របស់វា ។ ក្រៅពីនេះក៏ជាជ្រូកបង្កើតនូវភាពចម្លែកដល់ពលរដ្ឋទូទៅ ជាសត្វចូលចិត្តផឹកទឹកដោះគោ ផ្លែឈើ សាច់ ពិសេសចូលចិត្តមាន់អាំង បាយដំណើប និងផឹកតែ អ្វីដែលមនុស្សទទួលទានបាន វាសុីបានទាំងអស់ ។
ម្ចាស់បញ្ជាក់ថា ជ្រូក«ចេកអំបូង»នេះ មានលក្ខណៈពិសេសជាងជ្រូកទូទៅ ព្រោះជាសត្វសែនចេះ ប្រាប់ឲ្យថើបវាក៏ថើប វាស្រឡាញ់ម្ចាស់ ពិសេសសមាជិកនៅក្នុងផ្ទះ។ នៅពេលណាមានអ្នកចម្លែកចូលវានៅរង់ចាំឃ្លាំមើលគ្រប់ពេល ប្រសិនបើចូលទៅក្បែរម្ចាស់វាក៏ដេញខាំ ដោយសារតែបារម្ភ និងនៅពេលជិះក្នុងរថយន្តវាក៏អង្គុយនៅលើពូក ពេលដេកក៏ដេកនៅក្នុងផ្ទះដោយមានកន្លែងដេកត្រឹមត្រូវ ។
ពិសេសជាងនេះនៅពេលល្ងាចវាបានចូលក្នុងបន្ទប់ទឹកដើម្បីងូតទឹក និងម្ចាស់ដុសខ្លួនឲ្យ ។ ក្រោយពីងូតទឹករួចក៏ជូតខ្លួន និងលាបម្សៅចូលដេក ប្រសិនបើមិនបានងូតទឹកក៏មិនព្រមដេក ៕
ចែករំលែកព័តមាននេះ