រាជធានីភ្នំពេញ៖ តារាសម្តែងកញ្ញាវ៉ាន់ វល័ក្ខ បានបដិសេធ ភ្លាមៗជុំវិញព័ត៌មានដែលដាក់ការសង្ស័យថា បុរសអ្នកមានម្នាក់ជាអ្នកចាំទំនុកបម្រុងចំពោះភាពហ៊ឺហារបស់នាង។ ការបដិសេធរបស់តារាសម្តែងរូបនេះបានធ្វើឡើង បន្ទាប់ពីសារព័ត៌មាននៅក្នុងស្រុកមួយចុះផ្សាយការបង្ហើបពីប្រភពក្រៅផ្លូវការថា បុរសមា្នក់ដែលមានឋានៈធំ និងសម្បូរប្រាក់ចាំជួយទំនុកបម្រុង…
រាជធានីភ្នំពេញ៖ តារាសម្តែងកញ្ញាវ៉ាន់ វល័ក្ខ បានបដិសេធ ភ្លាមៗជុំវិញព័ត៌មានដែលដាក់ការសង្ស័យថា បុរសអ្នកមានម្នាក់ជាអ្នកចាំទំនុកបម្រុងចំពោះភាពហ៊ឺហារបស់នាង។ ការបដិសេធរបស់តារាសម្តែងរូបនេះបានធ្វើឡើង បន្ទាប់ពីសារព័ត៌មាននៅក្នុងស្រុកមួយចុះផ្សាយការបង្ហើបពីប្រភពក្រៅផ្លូវការថា បុរសមា្នក់ដែលមានឋានៈធំ និងសម្បូរប្រាក់ចាំជួយទំនុកបម្រុង ។
សារព័ត៌មាននោះបានលើកឡើង កាលពីពេល ថ្មីៗកន្លងមកថា បុរសរូបនោះបានចំណាយប្រាក់ជាច្រើនដើម្បីឲ្យវ៉ាន់ វល័ក្ខ មានភាពហ៊ឺហាដូចសព្វថ្ងៃនេះ ។ ភាពហ៊ឺហាជាមួយការនៅខុនដូ ជាមួយរថយន្តដែលមានតម្លៃរាប់ម៉ឺនដុល្លារ និងដីធ្លីពីរបីកន្លែងនោះ គឺមិនអាចបានមកដោយលុយពីការងារសិល្បៈរបស់នាងទាំងស្រុងនោះឡើយ ពោលប្រាកដជាមានបុរសអ្នកមានម្នាក់ជាអ្នកឧបត្ថម្ភពីក្រោយជាមិនខាន ។
ឆ្លើយតបទៅនឹងបញ្ហានេះ វ៉ាន់ វល័ក្ខ បានបដិសេធចោលទាំងស្រុង និងបានចាត់ទុកសម្ភារដែលនាងកំពុងតែប្រើប្រាស់សព្វថ្ងៃនេះគឺបានមកពីកម្លាំងញើសឈាមរបស់នាងសុទ្ធសាធ ។ វ៉ាន់ វល័ក្ខ បានបង្ហោះសារឆ្លើយតបព័ត៌មាននោះថា «តើឲ្យខ្ញុំនិយាយប៉ុន្មានដងទៀត ថាខ្ញុំគ្មានអ្នកជួយទំនុកបម្រុង ឬនៅពីក្រោយអីទេ រីឯគូស្នេហ៍អីគេហ្នឹងក៏គ្មានដែរ ។
ខ្ញុំសូមប្រាប់ថា របស់ដែលខ្ញុំមានរាល់ថ្ងៃនេះជាកម្លាំងញើសឈាមរបស់ខ្ញុំ ហើយរបស់ទាំងនេះមិនមែនសន្សំមួយថ្ងៃពីរបានណា គឺខ្ញុំសន្សំរាប់ឆ្នាំទើបសល់ប៉ុណ្ណឹង»។
វ៉ាន់ វល័ក្ខ បានស្នើសុំឲ្យមានការកែប្រែនូវព័ត៌មានដែលបានផ្សាយនោះ ដ្បិតវាអាចខូចឈ្មោះនាង ។
វ៉ាន់ វល័ក្ខ ដែលជានារីមកពីជនបទ មានជីវភាពក្រីក្រលំបាកម្នាក់ បានវិវឌ្ឍខ្លួនពីអ្នកលក់ទឹកអំពៅ ទៅជាតារាសម្តែងដ៏ល្បី និងមានប្រជាប្រិយភាពម្នាក់ ដោយសារទេពកោសល្យ រួមជាមួយនឹងសម្រស់ពីធម្មជាតិផងនោះ ខណៈសព្វថ្ងៃ នាងកំពុងតែត្រូវបានទស្សនិកជនជាច្រើនគាំទ្រ និងមានភាពមមាញឹកខ្លាំងនឹងការងារសិល្បៈ ៕
ចែករំលែកព័តមាននេះ