ខេត្តប៉ៃលិន ៖ ប្រជាពលរដ្ឋប្រកបមុខរបរលក់គ្រឿងសិប្បកម្មដូចជា កញ្ជើ, ល្អី, អង្រុត, បង្គី និងប្រដាប់ប្រដាមួយចំនួនទៀតតាមម៉ូតូដែលធ្វើដំណើរឆ្លងដែនពីខេត្តមួយទៅខេត្តជួបនូវបញ្ហាប្រឈមជាច្រើន ដោយជួនកាលលក់អត់ដាច់ហើយត្រូវនគរបាលផាកពិន័យ ។…
ខេត្តប៉ៃលិន ៖ ប្រជាពលរដ្ឋប្រកបមុខរបរលក់គ្រឿងសិប្បកម្មដូចជា កញ្ជើ, ល្អី, អង្រុត, បង្គី និងប្រដាប់ប្រដាមួយចំនួនទៀតតាមម៉ូតូដែលធ្វើដំណើរឆ្លងដែនពីខេត្តមួយទៅខេត្តជួបនូវបញ្ហាប្រឈមជាច្រើន ដោយជួនកាលលក់អត់ដាច់ហើយត្រូវនគរបាលផាកពិន័យ ។
បើតាមការរៀបរាប់ពីបុរសម្នាក់ឈ្មោះ សុង នឿន អាយុ២៥ឆ្នាំ មានស្រុកកំណើតនៅភូមិត្រោក ឃុំកំពុងចម្លង ស្រុកស្វាយជ្រំ ខេត្តស្វាយរៀង បានរៀបរាប់ឱ្យដឹងថា គាត់បានធ្វើដំណើរអស់រយៈពេល១៥ថ្ងៃមកហើយពេលនេះទើបតែមកដល់ខេត្តប៉ៃលិន ដោយជិះម៉ូតូរ៉ឺម៉កលក់ទំនិញសិប្បកម្មមានដូចជា ប្រដាប់ប្រដាដាក់តាំងក្នុងផ្ទះ កញ្ជើ, ល្អី, បង្គី, អំបោស, អង្រុតត្រី, ទ្រូ និងស៊ុមក្រុងមាន់ជាដើម ។
គាត់បន្តទៀតថា ការលក់ដូររបស់ទាំងនេះតែងតែមានអតិថិជនជួយទិញជាហូរហែដែរ លើសពីនេះរបស់ដែលគាត់យកមកលក់នេះវាជារបស់ខ្មែរសុទ្ធសាធ ដោយបានទិញពីខេត្តបាត់ដំបង សៀមរាម និងភ្នំពេញជាដើម ហើយប្រសិនអស់របស់ទាំងនេះគឺគាត់ទិញជាបន្តបន្ទាប់ មិនឲ្យខ្វះនៅពេលប្រជាពលរដ្ឋតាមភូមិត្រូវការទិញយកទៅប្រើប្រាស់នោះឡើយ ។
គាត់បានបញ្ជាក់ទៀតថា ការលក់ឥវ៉ាន់សិប្បកម្មតាមរយៈម៉ូតូរ៉ឺម៉កនេះគឺមានបញ្ហាប្រឈមមួយចំនួនដែរដូចជាជូនកាលអត់មានអ្នកទិញខាតចុងខាតដើម សមត្ថកិច្ចនគរបាលចរាចរតាមខេត្តមួយចំនួនផាកពិន័យនៅពេលដែលគេឃើញឥវ៉ានសំពីងសំពោងល្មើសច្បាប់ចរាចរណ៍ ។
ការផាកពិន័យម្តងអស់រហូតដល់៤ទៅ៥ម៉ឺនរៀល លុះអត់មានលុយបង់ក៏សុំសមត្ថកិច្ចបន្ធូរបន្ថយដោយបង់ថ្លៃផាកត្រឹមតែ៥ពាន់រៀលប៉ុណ្ណោះ ។ ការផាកពិន័យរបស់សមត្ថកិច្ចគឺមានដោយកន្លែងដែរតែកន្លែងខ្លះបង់លុយ កន្លែងខ្លះទៀតមិនបានបង់នោះឡើយ ហើយពេលមកដល់ខេត្តប៉ៃលិនគឺសមត្ថកិច្ចមិនបានធ្វើការផាកពិន័យនោះទេ ។
ចំណែកបុរសម្នាក់ឈ្មោះ លី សាមិត្ត អាយុ៤៩ឆ្នាំ ជាអ្នកទិញឥវ៉ានរស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បានរៀបរាប់ឱ្យដឹងថា ដោយសារតែការស្រឡាញរបស់របរប្រើប្រាស់ដែលជារបស់របរតាមបែបបុរាណ និងកុំឲ្យភេ្លចដើមកំណើតជាតិសាសន៍របស់យើង ដែលដូនតាបានបន្សល់ទុកដូចជា អង្រុត, ទ្រូ, លប, ឈ្នៀង ជាដើមទើបលោកក៏មកជួយទិញយកទៅទុកដើម្បីឲ្យកូនចៅបានស្គាល់ ។ ជាមួយគ្នានេះដែរលោកក៏បានស្នើសុំឲ្យបងប្អូនប្រជាពលរដ្ឋមេត្តាជួយលើកតម្កើងវប្បធម៌ខ្មែរផងដែរដោយធ្វើការទិញរបស់ទាំងនោះទុកសម្រាប់ប្រើប្រាស់ និងតាំងនៅក្នុងផ្ទះ ៕
ចែករំលែកព័តមាននេះ