ខេត្តស្វាយរៀង ៖ ប្រជាពលរដ្ឋបានរិះគន់សមត្ថកិច្ចនគរបាលប៉ុស្តិ៍រដ្ឋបាលសង្កាត់ពោធិតាហោថា បានបើកដៃឲ្យគេដាក់ដាយយកត្រីនៅក្នុងប្រឡាយទ្វារទឹកទន្លេវ៉ៃគោ សង្ស័យថា ខ្សែអ្នកធំហើយមើល ទៅទើបសមត្ថកិច្ចមិនហ៊ានបង្ក្រាបបែបនេះ។ សូម្បីតែមន្ត្រីរដ្ឋបាលជលផលក៏មិនឃើញមកបង្ក្រាបដែរ រហូតមកដល់ថ្ងៃទី២ កញ្ញា ២០១៨នេះ។
បើតាមប្រជាពលរដ្ឋដែលរស់នៅភូមិក្បាលស្ពាន សង្កាត់ពោធិតាហោ ក្រុងស្វាយរៀង បានឲ្យដឹងថា មានមនុស្ស២នាក់បានយកដាយសំណាញ់មកដាក់ នៅក្នុងប្រឡាយបង្ហៀរទឹក ទន្លេវ៉ៃគោ ជាប់ប៉ុស្ត៍រដ្ឋបាលសង្កាត់ពោធិតាហោនេះរយៈពេលជិត១០ថ្ងៃមកហើយ។ មិនឃើញសមត្ថកិច្ចណា មកបង្ក្រាបឡើយ សង្ស័យថាម្ចាស់ដាយចំនួន២គ្រឿងនេះគឺជាសាច់ញាតិអ្នកធំហើយមើលទៅ ទើបគ្មានសមត្ថកិច្ចណាហ៊ានមកក្បែរបែបនេះ។
ទាក់ទិនករណីខាងលើនេះដែរមិនអាចសុំការបំភ្លឺពី មន្ត្រីរដ្ឋបាលជលផលបានទេមកដល់ល្ងាចថ្ងៃទី២ កញ្ញានេះ។ ហើយប្រជាពលរដ្ឋបានរង់ចាំមើលថា តើដល់ពេលណាទើបសមត្ថកិច្ចចុះមកបង្ក្រាប៕
ចែករំលែកព័តមាននេះ