រាជធានីភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្នុងរយៈពេល៨ខែដើមឆ្នាំនេះ ក្រសួងបានចេញលិខិតអនុញ្ញាតសាងសង់គម្រោងចំនួន១.៩៧៣ ដែលមានទុនវិនិយោគសរុបចំនួន២.៩៩៦លានដុល្លារអាមេរិក ។…
រាជធានីភ្នំពេញ ៖ មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្នុងរយៈពេល៨ខែដើមឆ្នាំនេះ ក្រសួងបានចេញលិខិតអនុញ្ញាតសាងសង់គម្រោងចំនួន១.៩៧៣ ដែលមានទុនវិនិយោគសរុបចំនួន២.៩៩៦លានដុល្លារអាមេរិក ។
លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានមានប្រសាសន៍ឲ្យដឹងក្នុងពិធីបញ្ចុះបឋមសិលាសាងសង់ផ្សារទំនើប ជីប ម៉ុង ២៧១ មេហ្កាម៉ល នាព្រឹកថ្ងៃទី៣០ សីហា កន្លងមកថា ក្នុងឆ្នាំ២០១៧កន្លងទៅ ក្រសួងបានអនុញ្ញាតលិខិតឲ្យសាងសង់៣.៤១៨គម្រោង និងមានទុនវិនិយោគចំនួន៦.៧៩៨លានដុល្លារអាមេរិក។
ចំណែកក្នុងរយៈពេល៨ខែឆ្នាំ២០១៨នេះ ក្រសួងបានចេញលិខិតសាងសង់ចំនួន១.៩៧៣ ដែលមានទឹកប្រាក់ចំនួន២.៩៩៦លានដុល្លារអាមេរិក ដល់អ្នកវិនិយោគជាតិ និងអន្តរជាតិ។ ក្នុងនោះមានប្រទេសចំនួន១០បានមកចូលរួមក្នុងការវិនិយោគលើវិស័យអចលនវត្ថុនៅកម្ពុជា ដែលបានធ្វើឲ្យវិស័យនេះមានការរីកចម្រើនយ៉ាងឆាប់រហ័ស ។
លោកថ្លែងថា ៖« នេះបានបង្ហាញពីការទុកចិត្តលើស្ថិរភាពនយោបាយ និងសេដ្ឋកិច្ច បើមិនអីចឹងទេ នឹងមិនមានអ្នកណាមកបណ្ដាក់ទុនវិនិយោគនៅកម្ពុជានោះទេ ពួកគេនឹងផ្លាស់ប្តូរពីកម្ពុជាទៅកាន់ប្រទេសផ្សេងៗ។ មិនតែ ប៉ុណ្ណោះ បច្ចុប្បន្ន រាជរដ្ឋាភិបាលក៏បានខិតខំសម្រួលដល់វិនិយោគិននានា ដូចជាកៀងគរឲ្យមានការផលិតអគ្គិសនីឲ្យបានច្រើន ដើម្បីបំពេញទៅតាមតម្រូវការកសាងហេដ្ឋារចនាសម្ព័ន្ធផ្លូវជាច្រើន »។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកបណ្ឌិត គីម ហ៊ាងបានអបអរសាទរចំពោះការរីកចម្រើននៃវិស័យនេះ ប៉ុន្តែលោកបានលើកជាសំណួរថា តើទំហំទឹកប្រាក់ជាក់ស្តែងចូលក្នុងវិស័យនេះ ជាទំហំពិតឬយ៉ាងណា ព្រោះអ្នកវិនិយោគខ្លះបានបោះទូនវិនិយោគត្រឹម១០លានដុល្លារ ប៉ុន្តែពួកគេប្រកាស២០ទៅ៣០លានដុល្លារ ដោយបូកសរុបនូវអ្វីដែលពួកគេរំពឹងទទួលបានពីការវិនិយោគរបស់ពួកគេ។
ទោះជាយ៉ាងណា លោកបន្តថា ៖« យើងមានសុទិដ្ឋិនិយមពីការរីកចម្រើននៃវិស័យនេះ ដែលបានធ្វើឲ្យកម្ពុជាទាក់ទាញបានការវិនិយោគកាន់តែច្រើន ហើយមុខមាត់កម្ពុជាមានភាពល្បីរន្ទឺលើឆាកអន្តរជាតិ »។
លោក Tom O”sullivan អគ្គនាយកក្រុមហ៊ុនគេហទំព័រ Realestate.com.kh បានថ្លែងដែរថា វិស័យសំណង់និងអចលនទ្រព្យនៅកម្ពុជា នឹងរីកចម្រើនរយៈពេលវែងបន្ថែមទៀត ដោយសារតែការរីកចម្រើននៃសេដ្ឋកិច្ចរបស់ប្រទេសនេះ ការកើនឡើងនូវប្រាក់ចំណូលរបស់ប្រជាពលរដ្ឋ និងចំនួនប្រជាពលរដ្ឋចូលមករស់នៅក្រុងភ្នំពេញមានកំណើនយ៉ាងច្រើនប្រចាំឆ្នាំ ។ ហេតុនេះ តម្រូវការលំនៅឋាន នឹងកើនឡើងជាស្វ័យប្រវត្តិ ៕
ចែករំលែកព័តមាននេះ