ខណ្ឌដែលមានតម្លៃដីថ្លៃ និងថោកជាងគេនៅរាជធានីភ្នំពេញ
- ភ្នំពេញ
រាជធានីភ្នំពេញ ៖ យោងតាមរបាយការណ៍ស្រាវជ្រាវរបស់ក្រុមហ៊ុន Key Real Estate បានបង្ហាញថា នៅឆមាសទី១ ឆ្នាំ២០១៨នេះ ដីធ្លីនៅក្នុងខណ្ឌដូនពេញ…
រាជធានីភ្នំពេញ ៖ យោងតាមរបាយការណ៍ស្រាវជ្រាវរបស់ក្រុមហ៊ុន Key Real Estate បានបង្ហាញថា នៅឆមាសទី១ ឆ្នាំ២០១៨នេះ ដីធ្លីនៅក្នុងខណ្ឌដូនពេញ…
រាជធានីភ្នំពេញ ៖ យោងតាមរបាយការណ៍ស្រាវជ្រាវរបស់ក្រុមហ៊ុន Key Real Estate បានបង្ហាញថា នៅឆមាសទី១ ឆ្នាំ២០១៨នេះ ដីធ្លីនៅក្នុងខណ្ឌដូនពេញ មានតម្លៃខ្ពស់ជាងគេក្នុងចំណោមខណ្ឌទាំង១២របស់រាជធានីភ្នំពេញ ដោយសារខណ្ឌមួយនេះកំពុងក្លាយជាមជ្ឈមណ្ឌលពាណិជ្ជកម្ម មានតម្លៃថ្លៃបំផុត ហើយដីលំនៅឋានត្រូវបានលក់ជាមធ្យមក្នុងតម្លៃ៣.៥០០ដុល្លារក្នុង១ម៉ែត្រការ៉េ និងដីសម្រាប់ធ្វើពាណិជ្ជកម្មមានតម្លៃជាមធ្យម៦.១០០ក្នុង១ម៉ែត្រការ៉េ ។
ការសិក្សាររបស់ក្រុមហ៊ុននេះបានបង្ហាញទៀតថា ដីដែលមានតម្លៃថ្លៃស្ថិតនៅតាមសង្កាត់មួយចំនួន ដូចជា សង្កាត់ផ្សារថ្មី១, ផ្សារថ្មី២ និងផ្សារថ្មី៣ ក្នុងខណ្ឌដូនពេញ ដីពាណិជ្ជកម្មថ្លៃបំផុតដែលអាចលក់បានក្នុងតម្លៃ ៩.០០០ដុល្លារក្នុង១ម៉ែត្រការ៉េ រីឯដីលំនៅឋានក្នុងសង្កាត់ផ្សារចាស់មានតម្លៃខ្ពស់ជាង៤.០០០ដុល្លារក្នុង១ម៉ែត្រការ៉េ ។
ការសិក្សាក៏បានរកឃើញខណ្ឌដែលមានតម្លៃដីថោកជាងគេផងដែរ គឺស្ថិតក្នុងខណ្ឌដែលនៅជាយក្រុង ពិសេសខណ្ឌដែលទើបង្កើតថ្មី ដូចជា ខណ្ឌព្រែកព្នៅ ខណ្ឌសែនសុខ ខណ្ឌពោធិ៍សែនជ័យ និងខណ្ឌដង្កោជាដើម ដែលគេអាចរកទិញដីបានក្នុងចន្លោះពី១០០ដុល្លារទៅ២០០ដុល្លារ ក្នុង១ម៉ែត្រការ៉េ ជាប្រភេទដីលំនៅឋាន។ ចំណែកដីស្រែដែលនៅសេសសល់ មានតម្លៃប្រមាណពី២០ដុល្លារ ទៅដល់៦០ដុល្លារក្នុង១ម៉ែត្រការ៉េ។
ស្ថាបនិក និងជានាយកប្រតិបត្តិក្រុមហ៊ុន Key Real Estate លោក សន សៀប បានពន្យល់ថា ហេតុផលសំខាន់បំផុតដែលនាំឱ្យដីក្នុងខណ្ឌដូនពេញ មានតម្លៃថ្លៃជាងគេ គឺទីផ្សារអចលនទ្រព្យ ដែលមានភាពចាស់ទុំ និងតម្លៃដីធ្លីខ្ពស់នៅក្នុងខណ្ឌនីមួយ ។
លោកបានសង្កត់ធ្ងន់ថា វាជាតំបន់អភិវឌ្ឍន៍ចាស់ជាងគ េហើយវាមានទីផ្សារធំៗដែរ និងគម្រោងអភិវឌ្ឍន៍ធំៗនៅទីនោះដែរ ។ ម្យ៉ាងវិញទៀត ខណ្ឌនេះមានគោលដៅទេសចរណ៍ក៏ពេញនិយមដូចជា ព្រះបរមរាជវាំង សារមន្ទីរជាតិ និងតំបន់មាត់ទន្លេជាដើម ហើយនៅថ្ងៃអនាគត សាលារាជធានី ក៏គ្រោងបង្កើតផាប់ស្ទ្រីតនៅតាមមាត់ទន្លេថែមទៀតដែលធ្វើឲ្យខណ្ឌនេះកាន់តែមានសក្ដានុពលថែមទៀត ។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី២៣ សីហា ថា ជាមធ្យមតម្លៃដីនៅក្រុងភ្នំពេញកើនឡើង៦,៦%ប្រចាំឆ្នាំ ។ តួលេខនេះជាការគិតជាទូទៅ ប៉ុន្តែតំបន់ខ្លះកើនខ្ពស់ជាងនេះច្រើន និងខ្លះតិចជាងនេះ។
មូលហេតុដែលធ្វើឲ្យដីធ្លីនៅកម្ពុជា ពិសេសក្រុងភ្នំពេញឡើងថ្លៃខ្ពស់ ដោយសារកត្តាសំខាន់ៗមួយចំនួនដូចជា ទី១ លំហូរនៃទុនវិនិយោគផ្ទាល់ពីបរទេសកើនឡើង(FDI)។ ទី២ កម្ពុជាមានច្បាប់វិនិយោគពិសេស ដែលអនុញ្ញាត្តឲ្យជនបរទេសកាន់កាប់ក្រុមហ៊ុន១០០%ដោយខ្លួនឯងបាន ។ ទី៣ កំណើនសេដ្ឋកិច្ចរឹងមាំរបស់កម្ពុជា ដែលធ្វើឲ្យប្រាក់ចំណូលប្រជាជនកើនឡើង ។ ទី៤ ការវិនិយោគលើវិស័យអចលនទ្រព្យកើនឡើងខ្ពស់ ពិសេសលំនៅឋាន អគារការិយាល័យ និងលំនៅឋានបែបសហកម្មសិទ្ឋ(ខុនដូ) ។
ទី៥ ការពង្រីកហេដ្ឋារចនាសម្ព័ន្ថរបស់រាជរដ្ឋាភិបាលកាន់តែមានភាពប្រសើរឡើង និងទី៦ តម្រូវការប្រើប្រាស់ដីកើនឡើង ដោយសារកំណើនប្រជាសាស្ត្រ នៅក្នុងទីក្រុងភ្នំពេញបានកើនឡើងជាប់ជាប្រចាំ ។
យោងតាមការសិក្សារបស់ក្រសួងរៀបចំដែនដី នគរូបនីយកម្ម និងសំណង់ បានរកឃើញថា គិតពីឆ្នាំ២០១៥ដល់ឆ្នាំ២០៣០ ប្រទេសកម្ពុជាត្រូវការលំនៅឋានជាង៨០ម៉ឺនខ្នងបន្ថែមទៀត នៅក្នុងទីក្រុង ហើយចំនួនប្រជាជនចូលមករស់នៅតាមទីក្រុង និងទីប្រជុំជននានាកើនដល់៨លាននាក់ ៕
ចែករំលែកព័តមាននេះ