ខេត្តព្រះវិហារ ៖ ក្រៅពីការងារស្រែចម្ការកសិករម្នាក់រស់នៅភូមិបេងកោង ឃុំព្រះឃ្លាំង ស្រុកត្បែង មានជ័យ ខេត្តព្រះវិហារបានចាប់យកអាជីពដាំដំណាំត្រប់វែង ទទួលបានទិន្នផលល្អនឹងបង្កើននូវប្រាក់ចំណូលចន្លោះពី៨ម៉ឺនរៀលទៅ១០ម៉ឺនរៀលជារៀងរាល់ថ្ងៃ ។ អ្នកស្រី…
ខេត្តព្រះវិហារ ៖ ក្រៅពីការងារស្រែចម្ការកសិករម្នាក់រស់នៅភូមិបេងកោង ឃុំព្រះឃ្លាំង ស្រុកត្បែង មានជ័យ ខេត្តព្រះវិហារបានចាប់យកអាជីពដាំដំណាំត្រប់វែង ទទួលបានទិន្នផលល្អនឹងបង្កើននូវប្រាក់ចំណូលចន្លោះពី៨ម៉ឺនរៀលទៅ១០ម៉ឺនរៀលជារៀងរាល់ថ្ងៃ ។
អ្នកស្រី ខែក សុខឡេង ជាកសិកររស់នៅភូមិបេងកោង ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ បានលើកឡើងថា រូបគាត់បានឆ្លៀតពេលពីចម្ការរបស់គាត់ ហើយងាកមកដាំដំណាំត្រប់វែងវិញ ដែលមានទំហំដី ត្រឹមតែ៣០អាតែប៉ុណ្ណោះ ដើម្បីផ្គត់ផ្គង់លក់លើទីផ្សារ ព្រោះដំណាំនេះមានទីផ្សារល្អ ឈ្មួញបានចុះមកទិញដល់ចម្ការត្រប់តែម្តងមិនពិបាកដឹកជញ្ជូនទៅលក់នៅផ្សារនោះទេ ។ អ្នកស្រីបន្តថា ដំណាំនេះដាំដុះដោយមិនសូវ រើសដីនោះទេ ។ មួយវិញទៀតដំណាំនេះត្រូវការទឹកជាចាំបាច់ ដាំដុះក្នុងរយៈពេល៣ខែ អាចទទួលផលបេះ លក់បានជារៀងរាល់ថ្ងៃ រហូតដល់រដូវដាច់ទឹកភ្លៀងទើបឈប់ផ្លែ ។ ស្រីបន្ថែមទៀតថា ដំណាំត្រប់វែងនេះរូបគាត់បានទិញយកមកពីប្រទេសថៃ ហើយការដាំដុះដោយប្រើប្រាស់ជីធម្មជាតិសុទ្ធសាធមិនប្រើជីគីមី ដើម្បីជំនួយឲ្យដំណាំលូតលាស់នោះឡើយ ។
អ្នកស្រីថា ក្នុងមួយថ្ងៃអាចលក់ចេញទៅឲ្យឈ្មួញដែលមកពីក្រុងព្រះវិហារ និងខេត្តកំពង់ធំ ចន្លោះពី៨០ ទៅ១០០គីឡូក្រាម ថ្ងៃខ្លះអាចលក់បានដល់១៥០គីឡូក្រាមឯណោះ នឹងបានតម្លៃចន្លោះពី១៥០០រៀល ទៅ២០០០រៀលក្នុងមួយគីឡូក្រាម កាត់ថ្លៃកម្លាំងពលកម្ម អ្នកស៊ីឈ្នួលបេះ អាចឲ្យរូបគាត់ចំណេញប្រាក់ចន្លោះពី៨ម៉ឺនរៀល ទៅ១០ម៉ឺនរៀល សម្រាប់ផ្គត់ផ្គង់ជីវភាពប្រចាំថ្ងៃបានយ៉ាងងាយស្រួល ។ ជាមួយគ្នានេះដែរកសិករដដែលក៏បានសំណូមពរដល់កសិករដទៃទៀត រួមគ្នាដាំដំណាំរួមផ្សំ និងបន្លែផ្សេងៗឲ្យបានច្រើនចៀសវាងការទុកដីឲ្យនៅទំនេរចោលឥតប្រយោជន៍ មួយវិញទៀតបានជួយលើកកម្ពស់វិស័យកសិកម្មដំណាំបន្លែរបស់ខេត្តព្រះវិហារឲ្យទទួលបានទីផ្សារល្អ ចៀសវាងបានការហូរចូលបន្លែពីទីផ្សារខាងក្រៅ មិនមានសុវត្ថិភាពដល់អ្នកបរិភោគ ។
អ្នកស្រី ជឿន ផារី ជាអ្នកស៊ីឈ្នួលបេះផ្លែត្រប់វែងបានលើកឡើងថា រូបគាត់មកស៊ីឈ្នួលបេះត្រប់វែងនេះឃើញថា មានភាពងាយស្រួលដោយមិនសូវចំណាយកម្លាំងពលកម្ម និងពេលវេលាច្រើននោះទេ ហើយទទួលបានកម្រៃក្នុង១ថ្ងៃចន្លោះពី២៥០០០រៀល ទៅ៣ម៉ឺនរៀលនឹងអាចផ្គត់ផ្គង់ការហូបចុកប្រចាំថ្ងៃក្នុងគ្រួសារបាន ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារមានប្រសាសន៍ថា បច្ចុប្បន្ននេះផ្ទៃដីដាំដំណាំបន្លែផ្សេងៗនៅទូទាំងខេត្តព្រះវិហារមានប្រមាណជាង១០០០ហិកតាភាគច្រើនកសិករដាំដុះនៅក្នុងស្រុកត្បែងមានជ័យ ស្រុកគូលែន និងក្រុងព្រះវិហារ ។ លោកថា ការដាំដុះបន្លែនៅខេត្តព្រះវិហារឃើញថាទទួលបាននូវភោគផលល្អ អាចឲ្យកសិកររកចំណូលបានច្រើនពីការផ្គត់ផ្គង់លក់បន្លែរបស់ខ្លួនលើទីផ្សារក្នុងស្រុកកាត់បន្ថយបានការនាំចូលនូវបន្លែពីទីផ្សារខាងក្រៅ ។
តែទោះជាយ៉ាងនេះក្តីលោក៏បានជម្រុញឲ្យកសិករបន្តពង្រីកផ្ទៃដីដាំដុះបន្លែបន្ថែមទៀត មន្ទីរនឹងជួយគាំទ្រទាំងបច្ចេកទេស និងគ្រាប់ពូជព្រោះ បច្ចុប្បន្ននេះឃើញថា កសិករភាគច្រើនដាំដុះជាលក្ខណៈគ្រួសារប៉ុននោះ ពុំទាន់អាចដាំដុះជាលក្ខណៈអាជីពនៅឡើយទេ ៕
ចែករំលែកព័តមាននេះ