រាជធានីភ្នំពេញ ៖ នៅទីបំផុតជំនួបរវាងកីឡាករជើងខ្លាំងវ័យក្មេងរបស់ប្រទេសកម្ពុជា និងថៃ ដល់ថ្ងៃកំណត់ហើយគឺនាល្ងាចថ្ងៃសៅរ៍ ទី១ កញ្ញា ស្អែកនេះ នៅលើសង្វៀនទូរទស្សន៍ប៉ុស្ដិ៍លេខ៥ ។ អ្នកនិយមទស្សនាកីឡាប្រដាល់កំពុងតែទន្ទឹងរង់ចាំមើលថាតើកីឡាករកម្ពុជា ស្រេង ស្រឿន អាចទៅរួចជាមួយកីឡាករថៃវ័យក្មេង និងឡើងសន្ទុះហើយទើបឈ្នះខ្សែក្រវាត់នៅក្នុងប្រទេសថៃ ដែរឬយ៉ាងណា ។
ជំនួបប្រកួតរវាងកីឡាករជើងខ្លាំងទាំងពីរនឹងត្រូវធ្វើឡើងនៅសង្វៀនប៉ុស្ដិ៍លេខ៥ ព្រែកកំពិស ស្ថិតនៅម្ដុំព្រែកហូរ ជាយរាជធានីភ្នំពេញ ដោយការប្រកួតនោះ គឺស្ថិតក្នុងព្រឹត្តិការណ៍ប្រកួតជើងឯក TV5 Boxing Knock Out Series By K-Cement ដែលមានកីឡាករប្រកួតគ្នាចាញ់ធ្លាក់ៗយក៤នាក់ទៅកាន់វគ្គបន្តផង។
ការប្រកួតដែលចាប់ផ្ដើមនៅវេលាម៉ោង៦ល្ងាចនេះ មានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅតំបន់ប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា ។
កីឡាករកម្ពុជាត្រូវបានគេចាប់អារម្មណ៍ហួសប្រមាណក្រោយពីមានការប្រកាសថា តម្រូវឱ្យស្វាគមន៍ជើងខ្លាំងមកពីប្រទេសថៃ ហា ឆ្លាម ដែលអ្នកណាៗក៏ស្គាល់ថាជាជើងខ្លាំងម្នាក់ ទើបទទួលបានខ្សែក្រវាត់ជើងឯក និងមានប្រវត្តិវាយឈ្នះគូប្រកួតរាប់មិនអស់ ដោយឈ្នះទាំងគូប្រកួតខ្លាំងៗផង។
វត្តមានកីឡាករកម្ពុជា និងថៃ ក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈមិត្តភាពក្នុងស្រុកទេ គឺពិតជាធ្វើឱ្យអ្នកស្នេហាវិស័យប្រដាល់ មានការចាប់អារម្មណ៍ ជាពិសេសគឺវត្តមានរបស់កីឡាករ ស្រេង ស្រឿន ដោយសារតែកីឡាកររូបនេះត្រូវគេដឹងថាជាជើងខ្លាំង ដែលម្នាក់ៗកំពុងតែចាំតាមដានថាតើគេនឹងកាន់តែបង្កើនសន្ទុះនៅពេលប៉ះជាមួយជើងខ្លាំងមកពីប្រទេសថៃ ឬក៏អត់សម្រាប់ជំនួបទាំងមូល។
វត្តមានរបស់សមាសភាពគូអន្តរជាតិនេះ ត្រូវបានគេអះអាងថា មានការសម្រាំងយ៉ាងពិសេសដើម្បីឱ្យអ្នកទស្សនាកាន់តែកន្ត្រាក់អារម្មណ៍ ក្នុងពេលដែលសប្ដាហ៍នេះគឺជាការប្រកួតរវាងអ្នកឈ្នះ៨នាក់ក្នុងព្រឹត្តិការណ៍ដណ្ដើមជើងឯកនៅប៉ុស្ដិ៍លេខ៥ ដើម្បីជម្រុះយកតែ៤នាក់សម្រាប់ជុំថ្មី។
លោក សេង កដិកា បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ស្រេង ស្រឿន ដោយសារតែកីឡាកររូបនេះ ធ្លាប់មានស្នាដៃរាប់មិនអស់ ហើយលោកជឿថាកណ្ដាប់ដៃ និងភាពខ្លាំងរបស់គេនឹងល្អ ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ។
លោកប្រកាសថា វត្តមានចុះមករបស់កីឡាករថៃ ហាឆ្លាម លោកទុកចិត្តកីឡាករកម្ពុជារូបនេះ ទើបលោកហ៊ានសម្រេចផ្គូផ្គង បើទោះជាមានអ្នកគាំទ្រភាគច្រើនថាកីឡាករកម្ពុជាអាចនឹងពិបាកទប់ជាមួយកីឡាករថៃក្ដី ។ លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរមុនពេលផ្គូផ្គង ទើបលោកយល់សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិ នៅថ្ងៃសៅរ៍នេះបាន ។
លោកថា កីឡាករកម្ពុជា និងថៃ សុទ្ធតែត្រូវបានអះអាងថាមានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។ មួយគូនេះ មានការចាប់អារម្មណ៍ភាគច្រើន ថានឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករកម្ពុជា ស្រេង ស្រឿន មិនសូវមានទម្លាប់ឡើងវ៉ៃលាក់ដៃស្រាប់ទៅហើយ ស្របគ្នាដែលគេក៏ជាកីឡាករក្លាហាន និងវាយស៊ូធ្វើឱ្យលោកពេញចិត្ត ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាងកីឡាករទាំង២ លោកជឿជាក់ថានឹងកក្រើក ដោយសារកីឡាករថៃលោកស្គាល់ថ្វីដៃច្បាស់ហើយថា មិនធម្មតា ហើយសម្រាប់កីឡាករកម្ពុជា វិញ ក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។
យ៉ាងណាមិញ លោកថា កីឡាករកម្ពុជាដ្បិតថារូបលោក និងអ្នកគាំទ្រទុកចិត្តពីសមត្ថភាពយ៉ាងហ្នឹង តែបើគេប្រកួតមិនល្អ ឬមិនអស់ពីសមត្ថភាព ក៏ពិតជារងការរិះគន់មិនតិចដែរ ។ ដោយឡែក សម្រាប់គូប្រកួតជម្រុះដណ្ដើមយកកៅអី៤នាក់ក្នុងចំណោមអ្នកឈ្នះ៨នាក់សម្រាប់ព្រឹត្តិការណ៍ដណ្ដើមជើងឯកនៅសប្ដាហ៍នេះ ក៏មានការអះអាងថា ត្រៀមខ្លួនមិនធម្មតាផងដែរ ដើម្បីកុំឱ្យហាលអាវ និងបាត់បង់ឱកាសទៅកាន់វគ្គបន្ត៕
ចែករំលែកព័តមាននេះ