ខេត្តបន្ទាយមានជ័យ ៖ ស្ត្រីម្នាក់បានស្លាប់ ក្រោយពេលបញ្ជូនបន្តពីមន្ទីរពេទ្យបង្អែកក្រុងប៉ោយប៉ែត ទៅមន្ទីរពេទ្យមិត្តភាពកម្ពុជា-ជប៉ុនមង្គលបុរី ដោយសារគ្រោះថ្នាក់រថយន្តបុកពេលកំពុងដើរឆ្លងផ្លូវជាតិលេខ៥ មុខផ្សារកណ្តាលស្ថិតក្នុងភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត កាលពីវេលាម៉ោងជិត៩យប់ថ្ងៃទី២៦ ខែសីហា ។ ស្ត្រីរងគ្រោះមានឈ្មោះ ឆេង លក្ខិណា អាយុ៣២ឆ្នាំ ជាជាងអ៊ុតសក់នៅក្នុងភូមិ សង្កាត់ខាងលើ ។
មន្ត្រីនគរបាលចរាចរណ៍ក្រុងប៉ោយប៉ែតប្រាប់ថា ជនរងគ្រោះត្រូវរថយន្តហាយឡែនឌ័រ ពាក់ផ្លាកលេខ ភ្នំពេញ២V-២៨៧៩ ពណ៌ខ្មៅ បើកបរមកពីទិសខាងកើតក្នុងល្បឿនលឿនបុក បណ្តាលឱ្យរបួសធ្ងន់ ខណៈដើរឆ្លងផ្លូវ ពេលភ្លៀងកំពុងធ្លាក់ ។
សមត្ថកិច្ចបន្តថា ក្រោយកើតហេតុ អ្នកបើកបររថយន្តបានលើកជនរងគ្រោះដាក់រថយន្តដឹកទៅកាន់មន្ទីរពេទ្យបង្អែកក្រុងប៉ោយប៉ែត ហើយក៏គេចទៅបាត់ភ្លាមៗ ក្រោយពីលើកស្ត្រីរងគ្រោះដាក់នៅមន្ទីរ
ពេទ្យ ។ ស្ត្រីរងគ្រោះបានស្លាប់ពេលបញ្ជូនបន្តទៅមន្ទីរពេទ្យមិត្តភាពកម្ពុជា-ជប៉ុនមង្គលបុរី ហើយត្រូវសាច់ញាត់ដឹកសពទៅស្រុកកំណើតនៅឯស្រុកថ្មគោល ខេត្តបាត់ដំបង ដើម្បីធ្វើបុណ្យតាមប្រពៃណី ។
មន្ត្រីនគរបាលអះអាងថា បានស្គាល់ម៉ាកនិងផ្លាកលេខរថយន្តហើយ ដូច្នេះបើម្ចាស់រថយន្តមិនចូលខ្លួនដោះស្រាយឬនៅលាក់មុខ នឹងធ្វើរបាយការណ៍ស្នើសុំទៅក្រសួងសាធារណការនិងដឹងជញ្ជូន ដើម្បីឆែករកអត្តសញ្ញាណម្ចាស់រថយន្តអនុវត្តតាមនីតិវិធី ។ សមត្ថកិច្ចបន្តថា បើរថយន្តនេះ គេលក់តគ្នា ក៏អាចស្រាវជ្រាវរកឃើញតាមរយៈអ្នកទិញចុងក្រោយដែរ ៕
ចែករំលែកព័តមាននេះ