ខេត្តកណ្តាល ៖ គួរឱ្យអាណិតអាសូរណាស់ក្មេងប្រុសម្នាក់អាយុ០១ឆ្នាំ បានស្លាប់យ៉ាងអាណោចអាធ័មបំផុត ដោយសារឆក់ខ្សែភ្លើង ខណៈដែលជីតាគាត់មានការធ្វេសប្រហែស។ ហេតុការណ៍នេះបានកើតឡើងនៅថ្ងៃទី២៧ ខែសីហា ឆ្នាំ២០១៨ វេលាម៉ោង០៨ និង០៥នាទី នៅផ្ទះឈ្មោះ ឡាច រិន ស្ថិតនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល។
ជនរងគ្រោះឈ្មោះ បូ ពេជ្រ ភេទប្រុស អាយុ០១ឆ្នាំ រស់នៅភូមិឃុំកើតហេតុ។ បើតាមការបំភ្លឺរបស់លោក ម៉ៅ សំបូរ ភេទប្រុស អាយុ៤៣ឆ្នាំ(ត្រូវជាជីតា) បានឱ្យដឹងថា នៅមុនពេលកើតហេតុ ជនរងគ្រោះត្រូវជាចៅតែងតែនៅជាមួយជីតារាល់ថ្ងៃ ព្រោះម្តាយទៅធ្វើការនៅភ្នំពេញ។ នៅមុនពេលកើតហេតុជីតា បាននាំចៅមកលេងផ្ទះឈ្មោះ ឡាច រិន ភេទស្រី នៅក្នុងភូមិជាមួយគ្នា នៅពេលនោះ ជនរងគ្រោះទៅកាន់ខ្សែភ្លើង ដែលតទៅបន្ទប់ទឹក ខាងក្រោយផ្ទះដែលធ្លាក់នៅក្រោមផ្ទះ (ម្ចាស់ផ្ទះរុះជញ្ចាំងស្លឹករួចបាំងជញ្ជាំងស័ង្កសីវិញ) ដោយជនរងគ្រោះលូកម្រាមមេដៃស្តាំចូលក្នុងអំពូលភ្លើងបណ្តាលឆក់តែម្តង។
ក្រោយមកជីតាបានយកចៅ មន្ទីរពេទ្យបង្អែកស្រុកកៀនស្វាយដែរ នៅពេលទៅដល់លោកគ្រូពេទ្យថា ជនរងគ្រោះស្លាប់បាត់ហើយ។ ក្រោយពីកើតហេតុ និងសមត្ថកិច្ចបច្ចេកទេសស្រុកចុះទៅធ្វើការពិនិត្យឃើញថា ជនរងគ្រោះពិតជាស្លាប់ ដោយសារឆក់ខ្សែភ្លើងមែនហើយក៏បានប្រគល់សពជូនក្រុមគ្រួសារធ្វើបុណ្យតាមប្រពៃណី៕
ចែករំលែកព័តមាននេះ