ខេត្តកណ្ដាល ៖ ជនសង្ស័យម្នាក់ក្នុងចំណោមបក្ខពួក៧នាក់ ត្រូវបាននគរបាលឃាត់ខ្លួន បន្ទាប់ពីឈ្លោះប្រកែកគ្នា និងវាយសមត្ថកិច្ចបណ្តាលឲ្យរងរបួសម្នាក់។ ហេតុការណ៍នេះបានកើតឡើងនៅចំណុចក្រុមហ៊ុន 7NG ភូមិព្រៃចាស់ ឃុំវិហាសួគ៌…
ខេត្តកណ្ដាល ៖ ជនសង្ស័យម្នាក់ក្នុងចំណោមបក្ខពួក៧នាក់ ត្រូវបាននគរបាលឃាត់ខ្លួន បន្ទាប់ពីឈ្លោះប្រកែកគ្នា និងវាយសមត្ថកិច្ចបណ្តាលឲ្យរងរបួសម្នាក់។ ហេតុការណ៍នេះបានកើតឡើងនៅចំណុចក្រុមហ៊ុន 7NG ភូមិព្រៃចាស់ ឃុំវិហាសួគ៌ ស្រុកខ្សាច់កណ្តាល ខេត្តកណ្តាល កាលពីវេលាម៉ោង៨យប់ ថ្ងៃទី២៤ ខែសីហា ឆ្នាំ ២០១៨ ។
នគរបាលស្រុកខ្សាច់កណ្ដាលបានឱ្យដឹងថា ជនរងគ្រោះខាងលើឈ្មោះ នូ វណ្ណៈ ភេទប្រុស អាយុ៤៥ឆ្នាំ មុខរបរយោធាឆ័ត្រយោង៩១១ មានទីលំនៅភូមិព្រៃនប់ សង្កាត់ព្រៃនប់ ខណ្ឌព្រៃនប់ ក្រុងព្រះសីហនុ បច្ចុប្បន្នស្នាក់នៅក្នុងក្រុមហ៊ុន 7NG រងរបួសមុតថ្ពាល់ស្តាំមួយកន្លែងនិងរងការខូចខាតម៉ូតូ៣គ្រឿង។ ចំណែកជនសង្ស័យមានគ្នា៧នាក់ តែឃាត់ខ្លួនបានតែម្នាក់ឈ្មោះ ជាង ហេង អាយុ៣៤ឆ្នាំ មុខរបរបើកបររថយន្ត មានទីលំនៅភូមិថ្នល់បត់ ឃុំបានកាម ស្រុកព្រៃកប្បាស ខេត្តតាកែវ សមត្ថកិច្ចដកហូតបានវត្ថុតាងរួមមាន ៖ រថយន្តមួយគ្រឿងម៉ាក HINO ក្បាលរថយន្ត ពាក់ស្លាកលេខ ព្រះសីហនុ ៣A-៦៥៣១ កន្ទុយសណ្តោង ពាក់ស្លាកលេខភ្នំពេញ ៤A-៤៦០៨ ពណ៌ខៀវ និងម៉ូតូចំនួន៣គ្រឿង ។
តាមប្រភពដដែលបន្តថា មុនពេលកើតហេតុ ក្រុមជនសង្ស័យបានបើករថយន្តខាងលើ ទៅផឹកស៊ីនៅហាងតែគុជក្នុងក្រុមហ៊ុន7NG ហើយពេលបំរុងបើករថយន្តចេញ ក៏មានទំនាស់ពាក្យសម្តីជាមួយឈ្មោះ ធី បន្ទាប់មកក្រុមជនសង្ស័យ បានយកពូថៅពីក្នុងរថយន្តរបស់ខ្លួនដេញកាប់ឈ្មោះ ធី ស្របពេលនោះកម្លាំងប៉ុស្តិ៍នគរបាលវិហារសួគ៌ និងកម្លាំងឆ័ត្រយោងចុះល្បាតបានមកដល់ ស្រាប់តែក្រុមជនសង្ស័យប្រដាប់ដោយពូថៅ ដែកបំពង់ទីបគ្រប់ដៃស្ទុះរត់មកកាប់ទៅលើកម្លាំងប៉ុស្តិ៍ និងកម្លាំងឆ័ត្រយោង៩១១ បណ្តាលឲ្យត្រូវជនរងគ្រោះឈ្មោះ នូ វណ្ណៈ ត្រូវចំថ្ពាល់ខាងស្តាំមួយកន្លែង ត្រូវដើមដៃស្តាំមួយកន្លែងរងរបួសហូរឈាម។
បន្ទាប់មកកម្លាំងសមត្ថកិច្ចក៏បានដកថយ ហើយក្រុមជនសង្ស័យបាននាំគ្នាឡើងជិះលើរថយន្តបើកចេញទៅតែបានធ្លាក់ជនសង្ស័យម្នាក់ពីលើរថយន្ត ហើយក្រុមជនសង្ស័យបានបើករថយន្តកិនម៉ូតូ បណ្តាលឲ្យរងការខូចខាតអស់៣គ្រឿង ពេលនោះកម្លាំងឆ័ត្រយោង៩១១ បានផ្ទុះអាវុធបាញ់ឡើងលើ តែរថយន្តរបស់ជនសង្ស័យមិនបានឈប់នោះទេ នៅតែបើកបន្តទៅមុខទៀត។
លោកនាយប៉ុស្តិ៍វិហារសួគ៌បានរាយការណ៍ជូនលោកអធិការជួយអន្តរាគមន៍ ភ្លាមនោះកម្លាំងអធិការដ្ឋាននគរបាលស្រុកបានចេញអន្តរាគមន៍ ដោយយករថយន្តស៊ីរ៉ែនដាក់បាំងផ្លូវនៅចំណុចរង្វង់មូលគល់ស្ពានព្រែកតាមាក់ ស្រាប់តែរថយន្តរបស់ក្រុមជនសង្ស័យបានបើកបំបុករថយន្តស៊ីរ៉ែនរបស់សមត្ថកិច្ច បណ្តាលឲ្យរងការខូចខាត។
ពេលនោះកម្លាំងសមត្ថកិច្ចបានផ្ទុះអាវុធបាញ់ឡើងលើចំនួនបីគ្រាប់ទៀត បន្ទាប់មកកម្លាំងនគរបាលស្រុកខ្សាច់កណ្ដាល បានសហការជាមួយកម្លាំងនគរបាលស្រុកមុខកំពូល ដេញតាមរថយន្តរបស់ក្រុមជនសង្ស័យពីក្រោយ ហើយពេលក្រុមជនសង្ស័យបើករថយន្តដល់ចំណុចវត្តរកាកោង ក្រុមជនសង្ស័យបានរត់គេចខ្លួនអស់ បន្សល់ទុកតែរថយន្ត។
ទន្ទឹមនឹងនោះ កម្លាំងសមត្ថកិច្ចនគរបាលបានយករថយន្តនេះមករក្សាទុកនៅអធិការដ្ឋាននគរបាលស្រុកខ្សាច់កណ្តាលដើម្បីចាត់ការបន្តតាមនីតិវិធី៕
ចែករំលែកព័តមាននេះ