រាជធានីភ្នំពេញ ៖ អ្នកនិពន្ធអ្នកស្រីម៉ៅ សំណាង ហៅទន្សាយ ប្រមាណជិត១០ឆ្នាំមកហើយបាត់មុខ ស្របពេលស្នាដៃថ្មីរបស់អ្នកស្រីក៏មិនឃើញចេញផ្សាយដែរ ។ តើអ្នកនិពន្ធប្រលោមលោក និងភាពយន្ត…
រាជធានីភ្នំពេញ ៖ អ្នកនិពន្ធអ្នកស្រីម៉ៅ សំណាង ហៅទន្សាយ ប្រមាណជិត១០ឆ្នាំមកហើយបាត់មុខ ស្របពេលស្នាដៃថ្មីរបស់អ្នកស្រីក៏មិនឃើញចេញផ្សាយដែរ ។ តើអ្នកនិពន្ធប្រលោមលោក និងភាពយន្ត ដ៏ល្បីរូបនេះមានបញ្ហាអ្វី ?
កាលពីពេល ថ្មីៗកន្លងមកអ្នកស្រីម៉ៅ សំណាង បញ្ជាក់ថា អ្វីដែលធ្វើអ្នកស្រីបាត់មុខពីការតែងនិពន្ធមិនក្រោមហេតុផលអ្នកស្រីចេញទៅរស់នៅបរទេសទេ ។ តាមរយៈសំណេរដែលអ្នកស្រីម៉ៅ សំណាង បង្ហោះតាមហ្វេសប៊ុកឲ្យដឹងថា «មានប្រិយមិត្តអ្នកអានជាច្រើនបានសាកសួរខ្ញុំថា ហេតុអ្វីបានជាខ្ញុំខកខានបោះពុម្ពផ្សាយប្រលោម រហូតដល់ជិត១០ឆ្នាំ ?
មិត្តអ្នកអានខ្លះស្មានថា ខ្ញុំចេញទៅរស់នៅប្រទេសក្រៅបាត់ទៅហើយ ។ ការណ៍ពិតទៅរឿងនេះមិនទាក់ទងនឹងសុខភាពរបស់ខ្ញុំទេ មូលហេតុធំ គឺមកពីរយៈពេលចុងក្រោយក្នុងរវាងឆ្នាំ ២០១០ ស្នាដៃប្រលោមលោករបស់ខ្ញុំត្រូវបានគេលួចថតចម្លងផ្សព្វផ្សាយ តាមគ្រប់រូបភាពលើប្រព័ន្ធអ៊ីនធើរណែត ធ្វើឲ្យខ្ញុំមានការពិបាក ។ ខ្ញុំជាអ្នកនិពន្ធដែលបានទទួលការគាំទ្រពីប្រិយមិត្តអ្នកអានជាច្រើន ប៉ុន្តែបែរជាលក់សៀវភៅបានតិចទៅវិញ។ ខ្ញុំអស់កម្លាំងចិត្តខ្លាំងណាស់ ហើយសម្រេចផ្អាកបោះពុម្ពប្រលោមលោកទាំងសោកស្តាយបំផុត ។
ពេលវេលាជិត១០ឆ្នាំនេះខ្ញុំបែរទៅសរសេរអត្ថបទភាពយន្តវិញ ទាំងដែលខ្ញុំនៅស្រឡាញ់ការនិពន្ធប្រលោមលោកយ៉ាងខ្លាំង ។ តែពេលនេះដោយសារខ្ញុំបានឃើញច្បាប់រក្សាសិទ្ធិបញ្ញាមានប្រសិទ្ធភាពជាងមុន ខ្ញុំក៏មានកម្លាំងចិត្តវិលមកនិពន្ធប្រលោមលោកជាថ្មីម្តងទៀត។ ខ្ញុំសង្ឃឹមថាយើងនឹងមានការយោគយល់ទៅវិញទៅមក ជួយទប់ស្កាត់ការថតចម្លងស្នាដៃអ្នកនិពន្ធ ផ្សព្វផ្សាយដោយគ្មានការអនុញ្ញាតដើម្បីឲ្យខ្ញុំ និងអ្នកនិពន្ធទាំងអស់មានកម្លាំងចិត្តនឹងបន្តការងារនេះបានយូរអង្វែងផង ។
ខ្ញុំរង់ចាំពេលវេលានេះអស់ជិត១០ឆ្នាំទៅហើយ គឺពេលវេលាដែលខ្ញុំមានឱកាសបានវិលត្រលប់មកកាន់ដងប៉ាកកានិពន្ធប្រលោមលោកជាថ្មីម្តងទៀត ។ ដោយសារតែបានការលើកទឹកចិត្តយ៉ាងពេញទំហឹងពីក្រុមអ្នកនិពន្ធវេទមន្ត និងសិស្សជំនិតម្នាក់ គឺសែត ហត្ថា (កូនចាបមាស) អ្នកនិពន្ធសៀវភៅវិញ្ញាសាជីវិត ។ ហត្ថា ជួយខ្ញុំទាំងកម្លាំងកាយ និងកម្លាំងចិត្ត ដើម្បីឲ្យខ្ញុំបានបោះពុម្ពផ្សាយប្រលោមលោកមួយនេះ មានចំណងជើងថា «ប្រលោមចិត្ត» ដែលខ្ញុំនឹងត្រៀមបោះពុម្ពផ្សាយ នៅចុងឆ្នាំនេះហើយ។
ប្រលោមចិត្តចង់ជួយរួមចំណែកផ្តល់ក្តីសង្ឃឹម និងការតស៊ូគ្រប់ពេលដល់មនុស្សគ្រប់រូប ហើយក៏ជួយប្រលោមចិត្តដល់អ្នកដែលមានទុក្ខគ្រប់បញ្ហាដែរ ។ ខ្ញុំសង្ឃឹមថាប្រិយមិត្តអ្នកអានទាំងអស់នឹងជួយគាំទ្រអក្សរសាស្ត្រខ្មែរយើង ដើម្បីឲ្យអ្នកនិពន្ធទាំងអស់មានកម្លាំងចិត្តនឹងបន្តការងារមួយនេះរៀងរហូតទៅ »។
ចំពោះស្នាដៃភាពយន្តរបស់អ្នកស្រីម៉ៅ សំណាង ដែលទស្សនិកជនធ្លាប់បានទស្សនាដូចជារឿង «ផ្ការីកពេញរដូវ» ជាដើម ។ នៅក្នុងឆ្នាំនេះអ្នកស្រីមានខ្សែភាពយន្តភាគ៦រឿងដើម្បីបម្រើអារម្មណ៍ទស្សនិកជនដែលតែងតែនិយមគាំទ្រស្នាដៃអ្នកស្រីកន្លងមក ។ ខ្សែភាពយន្តទាំង៦រឿងនោះ មានរឿង មរតកបេះដូង, រឿង ឱកូនសម្លាញ់, រឿង មន្តស្នេហ៍ពសុធា, រឿង សែងសូរិយា, រឿង ម្ចាស់បំណុល , និងសង្គ្រាមមរតក ។
អ្នកស្រីម៉ៅ សំណាង បានបង្ហាញស្នាដៃនិពន្ធប្រលោមលោកជាច្រើនរឿង ជាពិសេសរឿង «ទឹកភ្នែកគ្រីយ៉ាណា» គឺជាស្នាដៃដំបូងរបស់អ្នកស្រី ហើយក៏ជាស្នាដៃទីមួយដែលធ្វើឲ្យអ្នកស្រីល្បីឈ្មោះក្នុងពិភពអ្នកនិពន្ធ ។
អ្នកស្រីម៉ៅ សំណាង មានស្នាដៃរឿងភាគដូចជា រឿង ផ្ការីកពេញរដូវ, រឿងឧត្តមដួងចិត្ត ,រឿងបញ្ចពណ៌ , រឿងជីវិតលើវិថីសិល្បៈ , រឿងភពផែនដែនស្នេហ៍, រឿងជីវិតនាងរក្សា,រឿងគំនុំស្នេហ៍ចាស់, រឿង រលកបោកខ្សាច់ និងរឿងមីនុយធ្នាក់អន្ទាក់ស្នេហ៍ ជាដើម ។
នៅឆ្នាំ១៩៩៥ ស្នាដៃរឿង «រលកបោកខ្សាច់» របស់អ្នកស្រីបានជាប់ចំណាត់ថ្នាក់លេខ១ ពានរង្វាន់ព្រះសីហុរាជ ។
នៅឆ្នាំ២០០០ រឿង«កម្រងផ្កាម្លិះ» បានទទួលចំណាត់ថ្នាក់ លេខ២ នៅអង្គការន័រវេស្សសង្គ្រោះកម្ពុជា ។ នៅឆ្នាំ២០០១ រឿង «សមុទ្រខ្មៅ» ក៏បានជាប់អត្ថបទបកប្រែជាភាសាជប៉ុន ។
នៅឆ្នាំ២០០៣ អ្នកស្រីម៉ៅ សំណាងបានទទួលគ្រឿងឥស្សរិយយសមុនីសារាភណ្ឌថ្នាក់សេនា ជាអ្នកនិពន្ធដែលមានស្នាដៃល្អ និងគុណបំណាច់ខ្ពស់ក្នុងការថែរក្សាការពារនិងបណ្តុះបណ្តាលផ្នែកវប្បធម៌អក្សរសាស្ត្រជាតិពីសម្តេចតេជោហ៊ុន សែន ។
ដោយឡែកនៅក្នុងមហោស្រពភាពយន្តខ្មែរឆ្នាំ២០០៦ ភាពយន្តរឿង«កតញ្ញូ» ដែលជាស្នាដៃនិពន្ធរបស់អ្នកស្រីក៏បានទទួលចំណាត់ថ្នាក់លេខ៣(ថាសប្រាក់)៕
ចែករំលែកព័តមាននេះ