ខេត្តសៀមរាប ៖ ប្រាសាទអង្គរវត្តជាទីប្រាថ្នាចង់មកស្គាល់ មកទស្សនារបស់អ្នកទេសចរគ្រប់ទិសទីនៅលើពិភពលោក ។ ពេលបានមកឃើញប្រាសាទអង្គរវត្តហើយ តើអ្នកទេសចរបរទេសទាំងនោះមានអារម្មណ៍យ៉ាងណា ?
តាមការអះអាងរបស់លោកតេង អៀគ ឈង មគ្គុទ្ទេសទេសចរណ៍ភាសារចិន កាលពីពេល ថ្មីៗកន្លងមករៀបរាប់ប្រាប់កោះសន្តិភាពនៅមុខប្រាសាទអង្គរវត្តថា«ភ្ញៀវចិន ប្រុស ស្រី ក្មេងចាស់ ដែលខ្ញុំបាននាំមកដើរលេងកម្សាន្តថ្ងៃនេះ គឺជាភ្ញៀវទេសចរដែលមកតាមទួរ ហើយពួកគាត់មានការសប្បាយរីករាយដោយបានឃើញប្រាសាទអង្គរវត្តខុសពីប្រាសាទនានា នៅលើពិភពលោក ។ ពួកគាត់បាននិយាយ តៗគ្នាថា នេះជាលើកទី១ហើយដែលពួកគាត់បានមកលេងស្រុកខ្មែរ ហើយមកដើរលេងនៅទឹកដីប្រវត្តិសាស្ត្រនៃខេត្តសៀមរាប ព្រមទាំងបានខាងរថយន្តដឹកដើរទស្សនាតាមប្រាសាទនានា រួចហួសចូលមកមើលប្រាសាទអង្គរវត្ត ពិតជាដូចពាក្យគេនិយាយ ថាស្អាតឥតខ្ចោះមែន នេះហើយជាស្នាដៃរបស់កូនខ្មែរជំនាន់មុនដែលបន្សល់ទុកឱ្យ ក្មេងៗជំនាន់ក្រោយមើល ។
ភ្ញៀវនាំគ្នាមកមើលប្រាសាទ ព្រមទាំងផ្តិតរូប ទុកជាអនុស្សាវរីយ៍ ។ ចំពោះសន្តិសុខ និងសណ្តាប់ធ្នាប់វិញ ក៏ពួកគាត់បានកោតសរសើរមិនដាច់ពីមាត់ដែរ »។
លោកដៀប ដាវីត មគ្គុទេ្ទសទេសចរណ៍ភាសារអង់គ្លេស បាននាំភ្ញៀវស្រីបរទេស២នាក់ ជនជាតិកូឡាំប៊ី ដើរលេងក្នុងទឹកដីខេត្តសៀមរាប ក្នុងដំណើរជាលើកទី១របស់ពួកនាងមកកាន់អង្គរវត្ត ។ លោកឲ្យដឹងតាមសម្តីរបស់ពួកនាងថា «ការចូលមកទស្សនានៅតាមប្រាសាទអង្គរវត្តនេះ គឺពួកគាត់បាននិយាយថា គាត់មានចិត្តសប្បាយរីករាយណាស់ដែលបានមកដល់ទឹកដីកម្ពុជា ជាពិសេសខេត្តសៀមរាប ព្រមទាំងបានឃើញទេសភាពដ៏ស្រស់បំព្រងគួរឱ្យទាក់ទាញអស្ចារ្យមិនដែលធ្លាប់ឃើញពីមុនមក មិនថាពេលយប់ ឬពេលថ្ងៃនោះទេ »។ ប្រភពដដែលឲ្យដឹងថាពេលព្រលឹមភ្ញៀវបរទេសទាំង២ ព្រមទាំងភ្ញៀវផ្សេងទៀតបាននាំគ្នាឡើងទៅលើប្រាសាទបាខែងមើលថ្ងៃរះ ហើយពេលថ្ងៃដើរទស្សនាតាមប្រាសាទនានាជុំវិញបរិវេណវង់តូច ឬវង់ធំ ។ ដល់ពេលល្ងាចភ្ញៀវនាំគ្នាមើលថ្ងៃលិចវិញ ខ្លះជិះរ៉ឺម៉កម៉ូតូ ខ្លះជិះកង់ជួល ខ្លះជិះឡានតាមក្រុមហ៊ុនទេសចរណ៍ ។
លោកដៀប ដាវីត ប្រាប់តាមសម្តីភ្ញៀវរបស់លោកទៀតថា «ពួកគាត់បាននិយាយប្រាប់ថា ចំណែកសន្តិសុខ និងសណ្តាប់ធ្នាប់ អនាម័យ បរិស្ថានវិញ ក៏មានរបៀបរៀបរយដែរ កុំថា ដើរយប់ ឬថ្ងៃ ក៏សន្តិសុខល្អដែរ ។ នេះបើតាមពួកម៉ាករបស់ពួកគាត់ដែលបានប្រាប់កាលពួកគាត់មិនទាន់មកដល់ ពេលនេះពួកគាត់មកដល់ ទើបឃើញជាក់ស្តែងពិតប្រាកដមែន »។
ចំណែកអ្នកស្រីមគ្គុទេ្ទសទេសចរណ៍ភាសាវៀតណាម ដែលនាំភ្ញៀវជនជាតិវៀតណាម ដើរលេងតាមប្រាសាទ ជាពិសេសប្រាសាទអង្គរវត្ត បាននិយាយប្រហាក់ប្រហែលគ្នាថា មកលេងអង្គរវត្តសប្បាយណាស់ បានទស្សនាប្រាសាទដ៏អស្ចារ្យដែលពោរពេញទៅដោយអ្នកទេសចរចម្រុះជាតិសាសន៍ពីទូទាំងពិភពលោក ។ មិនតែប៉ុណ្ណោះពួកគេមើលឃើញក្រុងសៀមរាបមានភាពរីកចម្រើនលូតលាស់ មានសណ្ឋាគារប្រណីតៗ …។ អ្នកទេសចរបរទេសទាំងនោះថានឹងជួយផ្សព្វផ្សាយពីអង្គរវត្តដល់សាច់ញាតិ មិត្តភក្តិឲ្យមកទស្សនាកម្សាន្ត ជាពិសេសពួកគេផ្ទាល់ប្រាថ្នាចង់ត្រឡប់មកទស្សនាម្តងទៀតនៅពេលក្រោយ ៕
ចែករំលែកព័តមាននេះ