រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ បានថ្លែងថា កំណើនសេដ្ឋកិច្ចកម្ពុជានៅតែរក្សាភាពរឹងមាំដដែល ដែលនាំឲ្យអ្នកវិនិយោគបរទេសមានការចាប់អារម្មណ៍កាន់តែខ្លាំង ក្នុងចំណោមបណ្ដាប្រទេសនៅអាស៊ាន ។
លោក ម៉ី វ៉ាន់ ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ បានមានប្រសាសន៍ក្នុងពិធីបើកកិច្ចប្រជុំប្រចាំឆ្នាំរបស់សមាគមក្រុមហ៊ុនអចលនទ្រព្យអាស៊ាន ដែលរៀបចំដោយសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា នៅថ្ងៃទី២៤ ខែសីហា ម្សិលមិញថា បច្ចុប្បន្នមិនថាវិស័យអចលនទ្រព្យ ឬវិស័យផ្សេងៗនោះទេ គឺមានការរីកចម្រើនដូចៗគ្នា ដែលធ្វើឲ្យអ្នកវិនិយោគបរទេសមានការជឿទុកចិត្ត ហើយរីករាយក្នុងការសហការជាមួយអ្នកវិនិយោគក្នុង ស្រុក ដែលនាំឲ្យសេដ្ឋកិច្ចជាតិមានកំណើន និងរឹងមាំ ។
លោកបន្តថា ៖« កិច្ចប្រជុំកម្រិតអាស៊ាននេះ គឺជាសញ្ញាវិជ្ជមានមួយ ដើម្បីរឹតចំណងការធ្វើពាណិជ្ជកម្មអចលនទ្រព្យក្នុងតំបន់ និងពិភពលោកឲ្យកាន់តែទូលំទូលាយបន្ថែមទៀត »។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកបណ្ឌិត គីម ហ៊ាង បានបញ្ជាក់ថា តាមរយៈកិច្ចប្រជុំប្រចាំឆ្នាំរបស់ក្រុមហ៊ុនអចលនទ្រព្យអាស៊ាននេះ គឺសបញ្ជាក់ឲ្យឃើញពីការជឿទុកចិត្ត១០០%ពីអ្នកវិនិយោគបរទេស ទើបមានថ្នាក់ដឹកនាំសមាគមអាស៊ាន និងភ្ញៀវបរទេសដល់ទៅជាង៧០០នាក់ចូលរួម។
លោករំពឹងថា ទំនាក់ទំនងក្នុងការធ្វើអាជីវកម្មលក្ខណៈអន្ដរជាតិ រវាងកម្ពុជានិងពិភពលោក នឹងកាន់តែធំទូលាយ ពិសេសគឺអាជីវកម្មវិស័យអចលនទ្រព្យកម្ពុជា ដែលកំពុងមានការរីកចម្រើននាពេលបច្ចុប្បន្នតែម្ដង ។
កិច្ចប្រជុំប្រចាំឆ្នាំរបស់សមាគមអចលនទ្រព្យអាស៊ាន ដែលកម្ពុជាទទួលរៀបចំនេះ គឺធ្វើឡើងរយៈពេល២ថ្ងៃ នៅថ្ងៃទី២៤-២៥ ខែសីហា ដោយមានថ្នាក់ដឹកនាំសមាគមអចលនទ្រព្យអាស៊ាន៨ប្រទេសចូលរួម និងមានក្រុហ៊ុនអចលនទ្រព្យបរទេសជាច្រើនចូលរួម ដូចជាចិន ជប៉ុន កូរ៉េ ម៉ុងហ្គោលី អូស្ដ្រាលី អឺរ៉ុប និងអាមេរិកជាដើម ដែលមានអ្នកចូលរួមសរុប៧០០នាក់ ។ នេះបើតាមការបញ្ជាក់របស់លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ។
រយៈពេល៥ឆ្នាំចុងក្រោយនេះ រាជរដ្ឋាភិបាលសម្រេចបានតាមការគ្រោងទុកនូវកំណើនសេដ្ឋកិច្ចប្រចាំឆ្នាំក្នុងរង្វង់៧,០% ប្រកបដោយបរិយាប័ន្ន និងសមធម៌ ។ កម្ពុជាថែមទាំងឆ្លងផុតពីឋានៈប្រទេសមានចំណូលទាបទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ២០១៥ ព្រមទាំងត្រូវបានចាត់ទុកថាជា «ខ្លាសេដ្ឋកិច្ចថ្មីនៅអាស៊ី» ក្នុងឆ្នាំ២០១៦។
កំណើននេះ បានបង្កើតការងារជាច្រើនដល់ប្រជាពលរដ្ឋទូទាំងប្រទេស ដែលឆ្លុះបញ្ចាំងតាមរយៈតួលេខរបស់ធនាគារពិភពលោក ដែលបានបង្ហាញថា ភាពគ្មានការងារធ្វើនៅប្រទេសកម្ពុជាស្ថិតក្នុងអត្រា០,៣% និងភាពក្រីក្រតោកយ៉ាកត្រូវបានលុបបំបាត់ចោលទាំងស្រុងក្នុងឆ្នាំ២០១៧។ ទន្ទឹមនេះ ប្រាក់ចំណូលរបស់ប្រជាជន ក៏មានការកើនឡើងផងដែរ ដោយ ផលិតផលក្នុងស្រុកសរុបក្នុងមនុស្សម្នាក់កើនពី១.០៤២ដុល្លារអាមេរិកក្នុងឆ្នាំ២០១៣ ដល់ប្រមាណ១.៤២៧ដុល្លារអាមេរិកក្នុងឆ្នាំ២០១៧ និង១.៥៦៣ដុល្លារអាមេរិកនៅក្នុងឆ្នាំ២០១៨ ។
យោងតាមក្របខ័ណ្ឌគោលនយោបាយសេដ្ឋកិច្ច បង្ហាញថា វិស័យអចលនទ្រព្យត្រូវបានរំពឹងថានឹងនៅតែមានកំណើនរឹងមាំក្នុងរង្វង់៨,៥%ក្នុងឆ្នាំ២០១៨ និងឆ្នាំ២០១៩ ។
កំណើននេះនឹងត្រូវទ្រទ្រង់ដោយការកើនឡើងនៃសកម្មភាពទិញ-លក់សំណង់អគារពាណិជ្ជកម្ម និងលំនៅឋានដែលមានថ្លៃទាបនិងមធ្យម ដែលប៉ះប៉ូវដល់ការថមថយនៃប្រតិបត្តិការទិញ-លក់ និងជួលលំនៅឋានថ្លៃខ្ពស់ ដោយសារកំណើនខ្លាំងនៃការផ្គត់ផ្គង់ធៀបនឹងតម្រូវការ ៕
ចែករំលែកព័តមាននេះ