រាជធានីភ្នំពេញ ៖ កោះកុងជាខេត្តជាប់ មាត់សមុទ្រមួយដែលស្ថិតនៅភាគនិរតីនៃប្រទេសកម្ពុជា ។ ខេត្តមួយនេះ មានសក្តានុពលទេសចរណ៍ជាច្រើនដែលកំពុងទាក់ទាញភ្ញៀវទេសចរ ក្នុងនោះតំបន់អេកូទេសចរណ៍អារ៉ែង និងជីផាត់ មានសក្តានុពលខ្លាំងជាងគេ…
រាជធានីភ្នំពេញ ៖ កោះកុងជាខេត្តជាប់ មាត់សមុទ្រមួយដែលស្ថិតនៅភាគនិរតីនៃប្រទេសកម្ពុជា ។ ខេត្តមួយនេះ មានសក្តានុពលទេសចរណ៍ជាច្រើនដែលកំពុងទាក់ទាញភ្ញៀវទេសចរ ក្នុងនោះតំបន់អេកូទេសចរណ៍អារ៉ែង និងជីផាត់ មានសក្តានុពលខ្លាំងជាងគេ ដោយសារមានព្រៃភ្នំ ទឹកជ្រោះ និងតំបន់វត្ថុបូរាណជាដើម ។ ក្រៅពីសហគមន៍អេកូទេសចរណ៍ទាំងពីរនេះ ខេត្តនៅមានសក្តានុពលធម្មជាតិជាច្រើនកន្លែងទៀត ដូចជាប្រជុំកោះដែលកំពុងបង្អួតសម្រស់រង់ចាំអ្នកមកទស្សនា ។
ប្រធានមន្ទីរទេសចរណ៍ខេត្ត បានអះអាងថា បន្ទាប់ពីអាជ្ញាធរខេត្តបានរៀបចំផ្លូវគមនាគមន៍ និងអភិវឌ្ឍន៍នូវហេដ្ឋារចនាសម្ព័ន្ធដែលបម្រើឲ្យវិស័យទេសចរណ៍រួច ខេត្តរំពឹងនឹងមានកំណើនភ្ញៀវទេសចរយ៉ាងគំហុក ។
ក្នុងបទសម្ភាសន៍ជាមួយអ្នកយកព័ត៌មាន «កោះសន្តិភាព» កាលពីពេលថ្មីៗនេះ ប្រធានមន្ទីរទេសចរណ៍ខេត្ត បានបញ្ជាក់ថា បច្ចុប្បន្នមន្ទីរទេសចរណ៍ បានសហការជាមួយអាជ្ញាធរខេត្ត កំពុងជំរុញការផ្សព្វផ្សាយ និងអភិវឌ្ឍន៍ផ្លូវគមនាគមន៍ និងហេដ្ឋារចនាសម្ព័ន្ធបម្រើឲ្យវិស័យទេសចរណ៍ ដើម្បីត្រៀមស្វាគមន៍ភ្ញៀវទេសចរដែលនឹងមានកំណើនជាបន្ដបន្ទាប់ ពិសេសនៅក្នុងពិធីបុណ្យសមុទ្រឆ្នាំនេះ ខេត្តរំពឹងនឹងមានភ្ញៀវទេសចរចូលរួមប្រហែលជាង៣០ម៉ឺននាក់ ។
លោក ប៊ុន បៀវ ប្រធានមន្ទីររូបនេះបានឲ្យដឹងថា ៖« ការងារសំខាន់របស់យើងនៅពេលនេះគឺរៀបចំកន្លែងស្នាក់នៅ, បង្គន់អនាម័យដោយសារបន្ទប់សណ្ឋាគារ និងផ្ទះសំណាក់់របស់យើងនៅតិចតួចណាស់ ។ ជាមួយគ្នានេះ យើងកំពុងតែអភិវឌ្ឍន៍ផ្លូវថ្នល់សម្រាប់ភ្ញៀវទេសចរ និងបង្កើតផលិតផលទេសចរណ៍ថ្មីៗបន្ថែមទៀត »។ លោកបានបញ្ជាក់ថា តំបន់រមណីយដ្ឋានសំខាន់ៗ ដែលយើងរំពឹងថានឹងទទួលភ្ញៀវទេសចរច្រើននោះ រួមមាន រមណីយដ្ឋានទឹកធ្លាក់តាចាត, ទឹកធ្លាក់សិលាមានជ័យ, ទឹកធ្លាក់កោះប៉ោ, តំបន់អារ៉ែង តំបន់ពាមក្រសោប, ព្រៃកោងកាង និងតំបន់ជីផាត់ជាដើម ។
បើទោះបីជាខេត្តមានសក្ដានុពលទេសចរណ៍ច្រើន តែអ្វីដែលជាបញ្ហាប្រឈមចំពោះមុខនោះគឺបច្ចុប្បន្ននេះ ហេដ្ឋារចនាសម្ព័ន្ធផ្លូវថ្នល់មួយចំនួនត្រូវរងការខូចខាត ដោយសារទឹកជំនន់លិចលង់នៅតំបន់មួយចំនួន ដែលទាមទារត្រូវធ្វើការជួសជុលឲ្យបានរួចរាល់ និងឆាប់រហ័ស ។
លោក ប៊ុន បៀវ បានបន្ថែមថា បច្ចុប្បន្ននេះ ទាំងអាជ្ញាធរខេត្ត និងមន្ត្រីជំនាញពាក់ព័ន្ធកំពុងខិតខំធ្វើយ៉ាងណាកែលម្អ និងបង្កើតផលិតផលទេសចរណ៍ថ្មីៗបន្ថែមទៀត ខណៈនៅឆមាសទី១ឆ្នាំនេះ ភ្ញៀវទេសចរមកទស្សនាកម្សាន្ដនៅខេត្តមានប្រមាណជាង២៣ម៉ឺននាក់ ហើយរំពឹងថា នៅឆ្នាំ២០១៩ នឹងទទួលបានភ្ញៀវទេសចរជាតិ និងអន្តរជាតិ ប្រមាណ៤០ម៉ឺននាក់ ។
រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងថា ខេត្តកោះកុង មានតំបន់សក្ដានុពលទេសចរណ៍ជាច្រើន ដែលអាចទាក់ទាញភ្ញៀវជាតិ និងអន្តរជាតិមកទស្សនាកម្សាន្ដ ។ ទោះយ៉ាងនេះក្ដី លោករដ្ឋមន្ត្រីបានលើកឡើងថា ៖«បញ្ហាប្រឈមដែលនឹងត្រូវរៀបចំដោះស្រាយឲ្យរួចរាល់នោះគឺផ្លូវគមនាគមន៍ដែលកំពុងជួបការលំបាកដោយសារគ្រោះទឹកជំនន់ »។
គួររំឭកថា ខេត្តកោះកុងនឹងរៀបចំព្រឹត្តិការណ៍បុណ្យសមុទ្រលើកទី៧ ក្នុងជុំទី២ នៅអំឡុងខែធ្នូចុងឆ្នាំ២០១៨នេះ បន្ទាប់ពីខេត្តជាប់ឆ្នេរសមុទ្រមួយនេះបានរៀបចំម្តងរួចមកហើយកាលពីឆ្នាំ២០១៤ប្រកបដោយជោគជ័យ ។ សម្រាប់ព្រឹត្តិការណ៍បុណ្យ សមុទ្រឆ្នាំ២០១៨នេះ ត្រូវបានលោករដ្ឋមន្ត្រីក្រសួងទេសចរណ៍បានរំពឹងទុកថា នឹងមានភ្ញៀវទេសចរជាតិ និងអន្តរជាតិចូលរួមប្រមាណជាង៣០ម៉ឺននាក់ ៕
ចែករំលែកព័តមាននេះ