ខេត្តប៉ៃលិន ៖ តាមសេចក្តីរាយការណ៍ព័ត៌មានបឋមបានឱ្យដឹងថា លោក ផាន់ ចាន់ធុល អភិបាលខេត្តប៉ៃលិន បានថ្លែងទៅកាន់ពលរដ្ឋថា តបតាមការសន្យានៅមុនពេលបោះឆ្នោតថា អាជ្ញាធរនឹងជួសជុលផ្លូវមួយចំនួនក្នុងខេត្តប៉ៃលិនទាំងអស់ពេលគណបក្សប្រជាជនជាប់ឆ្នោតបន្តដឹកនាំរាជរដ្ឋាភិបាល ពេលនេះក្រុមការងារ និងថ្នាក់ដឹកនាំក្នុងខេត្តមិនបានបំភ្លេចសន្យានោះទេ គឺថ្នាក់ដឹកនាំខេត្តបានបន្តចុះជួបប្រជាពលរដ្ឋតាមមូលដ្ឋាន និងបានធ្វើផ្លូវជូនពលរដ្ឋនាពេលនេះ ដើម្បីជាការឆ្លើយតបតាមការដែលពលរដ្ឋទាំងអស់បានគាំទ្រ ព្រមទាំងបានទៅបោះឆ្នោតជូនគណបក្សប្រជាជនកម្ពុជាយ៉ាងច្រើនកុះករ ។
លោកថ្លែងដូច្នេះនៅក្នុងពិធីសម្ពោធការដ្ឋានជួសជុលបង្ហើយកំណាត់ផ្លូវលេខ១០៦ (ហៅផ្លូវយាយកំពត) ជាប់នឹងកែងវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន នៅព្រឹកថ្ងៃទី២១ខែសីហា ឆ្នាំ២០១៨នេះ ដែលមានការអញ្ជើញចូលរួមពីថ្នាក់ដឹកនាំក្នុងខេត្តប៉ៃលិនគ្រប់មន្ទីរស្ថាប័ន ព្រមទាំងប្រជាពលរដ្ឋផងដែរ ។
ជាមួយគ្នានេះដែរ លោកក៏បានអំពាវនាវដល់ប្រជាពលរដ្ឋទាំងអស់សូមឱ្យរួមគ្នាជួយថែរក្សាទ្រព្យសម្បត្តិសាធារណៈរបស់រដ្ឋ ជាពិសេសផ្លូវថ្នល់នេះតែម្តង ព្រោះការជួសជុលម្តងៗចំណាយថវិការដ្ឋអស់ច្រើនសន្ធឹកសន្ធាប់ ។ ម្យ៉ាងវិញទៀត ពលរដ្ឋដែលនៅសងខាងផ្លូវដែលកំពុងធ្វើការជួសជុលនេះ មេត្តាយោគយល់អធ្យា ស្រ័យនិងចូលរួមសហការផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ