កូនចៅប្រលងនៅក្នុងបន្ទប់ ឪពុកម្ដាយព្រួយបារម្ភនៅខាងក្រៅ
- កំពង់ចាម
ខេត្តត្បូងឃ្មុំ ៖ នៅមណ្ឌលប្រលងវិទ្យាល័យសម្តេចម៉ែ ស្ថិតនៅឃុំជប់ ស្រុកត្បូងឃ្មុំ មានបេក្ខនារីម្នាក់ ឈ្មោះ ជ ស្រីនិច អាយុ១៩ឆ្នាំ…
ខេត្តត្បូងឃ្មុំ ៖ នៅមណ្ឌលប្រលងវិទ្យាល័យសម្តេចម៉ែ ស្ថិតនៅឃុំជប់ ស្រុកត្បូងឃ្មុំ មានបេក្ខនារីម្នាក់
ឈ្មោះ ជ ស្រីនិច អាយុ១៩ឆ្នាំ នៅបន្ទប់លេខ០៨ មកពីវិទ្យាល័យអម្ពវ័ន្តជំនិក ស្រុកក្រូចឆ្មារ បាន
សន្លប់ពេលដែលកំពុងតែប្រលងនាព្រឹកថ្ងៃទី២១ សីហា ២០១៨។ ត្រូវបានគ្រូពេទ្យនាំគ្នាសង្គ្រោះ ទាន់ពេលវេលាដាក់បន្តោងសេរ៉ូម និងបានមកប្រលងវិញ កត្តានេះដោយសារតែខ្សោយកម្លាំង នេះបើតាមការអះអាង របស់លោកប្រធានមន្ទីរអប់រំយុវជន និងកីឡាខេត្ត។
អ្នកលក់បាយឈ្មោះ ហេង ចំណាន នៅភូមិ០៥ ឃុំជប់ ប្រាប់ឲ្យដឹងថា ប្រពន្ធរបស់លោកបានប្រកបរបរលក់បាយសម្លនេះចាប់តាំងពី ឆ្នាំ២០១១ ដែលកាលណោះឲ្យតែដល់ពេលប្រលងបាក់ឌុបម្តងៗលក់ដូរមិនបានទំនេរដៃ និងឈរនិយាយគ្នាលេងទេ ព្រោះសម្បូរសិស្សនាំគ្នាមកទិញបាយយកទៅហូប ដោយក្នុង១ថ្ងៃអាចរកចំណូលបានទៅដល់ជាង១លានរៀល នៅមុខវិទ្យាល័យសម្តេចម៉ែ។ តែមកដល់សព្វថ្ងៃនេះ ការលក់ដូរក្នុង១ថ្ងៃមិនបានស្មើនឹងពាក់កណ្តាលមុនៗនោះទេ ហើយបើតាមការយល់របស់គាត់ មកពីពលរដ្ឋខ្លះមានជីវភាពខ្វះខាត មួយចំនួនវេចបាយយកមកហូប ពេលដែលកូនៗចេញពីប្រលង។
អ្នកស្រី ឡាយ ស៊ាន អាយុ៥៩ឆ្នាំ នៅភូមិក្រពើសារ ឃុំដំរិល ស្រុកអូររាំងឪ ប្រាប់ថា គាត់បានជូនកូនស្រីឈ្មោះ អាន ស៊ិនរី អាយុ២០ឆ្នាំ ដែលរៀនៅវិទ្យាល័យហេង សំរិន ចក មកប្រលងបាក់ឌុប នៅមណ្ឌលវិទ្យាល័យសម្តេចម៉ែ ឃុំជប់ ស្រុកត្បូងឃ្មុំ ដោយបានជួលផ្ទះគេស្នាក់នៅ បាន១យប់តែដោយសារកន្លែងចង្អៀតពេក នៅយប់ថ្ងៃទី២០ សីហា ២០១៨ បានជិះម៉ូតូទៅដេកផ្ទះវិញ។
លុះមកដល់ព្រឹកព្រលឹម ថ្ងៃទី២១ សីហា ត្រូវងើបជិះម៉ូតូ០២គ្រឿង ដោយបានចំណាយពេលជិតកន្លះម៉ោង លុះពេលកូនស្រីចេញពីប្រលងម៉ោង១១ព្រឹក គាត់បានក្រាលកៅស៊ូតង់ហូបបាយ នៅក្នុងចម្ការកៅស៊ូទោះបីជាលំបាកបែបណាក្តីក៏ត្រូវតែមកលើកទឹកចិត្តកូន។ គាត់ជាស្ត្រីមេម៉ាយតែបានតស៊ូពុះពារឲ្យកូនៗបាន
រៀនដល់ទៅ០៣នាក់ ក្នុងនោះកូនបងរៀនចប់នៅសាកលវិទ្យាល័យ កូនទី២រៀនគ្រូចប់ និងកូនស្រីទី
៣មកប្រលងនេះ។
យុវសិស្ស គន់នី កុងស៊ិញ មកពីវិទ្យាល័យសម្តេចតេជោ ហ៊ុនសែន សួង ប្រាប់ថា ចាប់តាំងពីមកប្រលងនៅមណ្ឌលវិទ្យាល័យសម្តេចម៉ែ នៅថ្ងៃដំបូង និងព្រឹកថ្ងៃទី២១ សីហា រាល់វិញ្ញាសាដែលដាក់មកនោះ រូបគេអាចធ្វើបានជាង៥០ភាគរយដែរ។ លុះដល់ពេលបាយចេញមកក្រៅ នាំគ្នាក្រាលតង់ហូបបាយ ក្នុងចម្ការកៅស៊ូដោយមានបងស្រីមកលើកទឹកចិត្ត ហើយបើប្រលងជាប់ចង់រៀន ផ្នែកសេដ្ឋកិច្ច។
លោក អ៊ិន ពៅ សម្បត្តិ ប្រធានមន្ទីរអប់រំ និងយុវជនកីឡាខេត្តបញ្ជាក់ថា នៅក្នុងខេត្តត្បូងឃ្មុំ មានគ្រឹះស្ថានរដ្ឋ និងឯកជនចំនួន២៥ ហើយបេក្ខជន-បេក្ខនារី ដែលត្រូវប្រលងនៅថ្ងៃទី២០ និង២១ សីហា ២០១៨ មានចំនួន៣.៧១៩នាក់ ក្នុងនោះអ្នកមិនបានមកប្រលង ឬមានជំងឺសរុបចំនួន៤៧នាក់។
ដោយសារតែកត្តាអាកាសធាតុបានឲ្យសិស្សខ្លះមានបញ្ហាខ្យល់សន្លប់ ថប់ដង្ហើមមួយចំនួន តែត្រូវបានដោះស្រាយដោយមានគ្រូពេទ្យដាក់នៅប្រចាំការតាមមណ្ឌលប្រលង ហើយកាលពីឆ្នាំ២០១៧កន្លងទៅអ្នកជាប់និទ្ទេស(A) មានមានចំនួន១២នាក់ ហើយ២០១៨នេះរំពឹងថាបានលើសជាងឆ្នាំកន្លងទៅ៕
ចែករំលែកព័តមាននេះ