ខេត្តកំពត ៖ គួរឲ្យអនិច្ចាផ្លូវជាតិលេខ៣ កំពតភ្នំពេញ និងកំពតខេត្តព្រះសីហនុ ត្រូវរងការខូចខាតយ៉ាងធ្ងន់ធ្ងរ ដោយនឹកស្មានមិនដល់ និងមិនធ្លាប់មានសោះតាំងពីមុនមក ។
ផ្លូវជាតិលេខ៣ ចាប់ពីព្រំប្រទល់ខេត្តតាកែវផ្លូវបំបែកគូសចេញទៅផ្លូវលេខ៣១ តាមផ្លូវតានី ស្រុកអង្គរជ័យ រហូតឆ្លងចូលផ្លូវលេខ៣៣ ចេញពីស្រុកកំពង់ត្រាចឆ្លងកាត់ខេត្តកែប ក៏ត្រូវរងការខូចខាតយ៉ាងធ្ងន់ធ្ងរជាច្រើនកន្លែងផងដែរ ។ រីឯចេញពីផ្លូវបំបែកគូសមកកាត់ស្រុកឈូក រហូតដល់ទីរួមខេត្តកំពត និងចេញពីក្រុងកំពតរហូតទៅដល់វាលរេញព្រំប្រទល់ខេត្តព្រះសីហនុក៏រងការខូចខាតយ៉ាងធ្ងន់ធ្ងរផងដែរ ។ ប្រភពព័ត៌មានមួយចំនួនបានរិះគន់លើក្រុមហ៊ុនដែលដេញថ្លៃធ្វើផ្លូវកន្លងមកនោះថា ធ្វើអត់ស្តង់ដាបច្ចេកទេសត្រឹមត្រូវទើបផ្លូវជាតិប៉ុន្មានខ្សែដែលឆ្លងកាត់ខេត្តកំពតនេះ រងការខូចខាតយ៉ាងដំណំដូចគ្នាយ៉ាងនេះ ។
ប្រភពខ្លះទៀតបានរិះគន់ថា មកពីរថយន្តផ្ទុកទំនិញលើសចំណុះ ទើបបណ្តាលឲ្យផ្លូវខូចដូច្នេះ ហើយគួបផ្សំ និងឆ្នាំនេះភ្លៀងក៏ធ្លាក់ជាប់ទើប បណ្តាលឲ្យផ្លូវដែលទើប និងកសាងហើយថ្មីៗត្រូវរថយន្តដឹកធ្ងន់ហួសចំណុះ ឆ្លងកាត់ជាញឹកញាប់ផងនោះ ទើបបណ្តាលឲ្យផ្លូវដាច់ជាបន្តបន្ទាប់ ។ ហើយនៅក្នុងនោះផងដែរពេលខូចតិចតួចជួសជុលមិនកើតដោយសារតែមានភ្លៀងធ្លាក់ជាប់រហូតទើបបណ្តាលឲ្យខូចខាតកាន់តែខ្លាំងទៅៗរហូតដល់ពេលនេះ គឺផ្លូវជាតិស្ទើរក្លាយជាផ្លូវឌឿងហែមទៅហើយ ។ ចំណុចនៃការខូចខាតផ្លូវជាតិលេខ៣នេះផងដែរ មានប្រភពព័ត៌មួយចំនួនបានផ្តល់ការវិភាគឲ្យឃើញពីផលប៉ះពាល់ខ្លះៗក្នុងកំឡុងខែកក្កដា ដែលមានគ្រោះទឹកជំនន់ បានកាត់ផ្តាច់ផ្លូវជាតិលេខ៤ ជាច្រើនកន្លែង ហើយមិនអាចធ្វើចរាចរណ៍ដឹកទំនិញបាន គឺផ្លូវជាតិលេខ៤ បានផ្អាកការធ្វើចរាចរណ៍ ហើយរថយន្តដឹកទំនិញធំៗត្រូវបង្វែរមកធ្វើចរាចរណ៍តាមផ្លូវជាតិលេខ៣មួយរយៈវិញផងនោះ ទើបបណ្តាលឲ្យផ្លូវដែលទើប និងកសាងថ្មីខាងលើនេះរងការខូចខាតយ៉ាងធ្ងន់ធ្ងរដូច្នេះ ។
ការខូចខាតផ្លូវខាងលើនេះផងដែរ កាលពីពាក់កណ្តាលខែកក្កដា ឆ្នាំ ២០១៨កន្លងមក លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនលោកបានដឹកនាំប្រតិភូក្រសួងចុះពិនិត្យផ្ទាល់ ដើម្បីសិក្សាការខូចខាតផ្លូវជាតិលេខ៣នេះ និងត្រូវឲ្យក្រុមហ៊ុនចិនធ្វើការជួសជុលជាបណ្តោះអាសន្ននៅមុនការបោះឆ្នោតតំណាងរាស្ត្រអាណត្តិទី៦ នាពេលកន្លងមកផងដែរ ។
ជុំវិញការស្តារជាថ្មីផ្លូវជាតិលេខ៣នេះ លោកពេជ្រ រដ្ឋា អនុប្រធានមន្ទីរសារធារណៈការ និងដឹកជញ្ជូនខេត្តបានឲ្យដឹងថា ការស្តារ និងសាងសង់ថ្មីនូវផ្លូវជាតិលេខ៣នេះជាបន្ទុកទទួលខុសត្រូវរបស់ក្រសួងដែលត្រូវទទួលធ្វើ ។ លោកបានឲ្យដឹងទៀតថា ផ្លូវជាតិលេខ៣ ចាប់ពីផ្លូវបំបែកគូសមកដល់ក្រុងកំពតត្រូវបានក្រុមហ៊ុនចិនដេញថ្លៃធ្វើមួយចំណែក ។
រីឯមួយផ្នែកទៀតចាប់ពីក្រុងកំពតរហូតទៅដល់ផ្លូវបែកវាលរេញព្រំប្រទល់ខេត្តព្រះសីហនុក៏ក្រុមហ៊ុនចិនមួយក្រុមហ៊ុនផ្សេងទៀតជាអ្នកដេញថ្លៃធ្វើ ។ លោកបានបន្តថា ហើយការស្តារឡើងវិញផ្លូវជាតិលេខ៣ដែលក្រុមហ៊ុនចិនធានាធ្វើនេះ គឺធ្វើនៅខែតុលា ឆ្នាំ២០១៨ ខាងមុខនេះ ។
លោក ពេជ្រ រដ្ឋា ក៏បានបញ្ជាក់ផងដែរថា មុន និងស្តារផ្លូវនេះឡើងវិញក្រុមហ៊ុនចិនដែលដេញថ្លៃបាននោះត្រូវជួសជុលជាបណ្តោះអាសន្ន ដើម្បីបង្កការងាយស្រួលដល់យានយន្តគ្រប់ប្រភេទធ្វើចរាចរណ៍ផងដែរ ប៉ុន្តែដោយសារតែគ្រោះធម្មជាតិមិនអំណោយផល គឺភ្លៀងធ្លាក់ជាប់រហូតទើបក្រុមហ៊ុនដែលត្រូវធ្វើផ្លូវនោះត្រូវអាក់ខានមិនបានជួសជុលបណ្តាលឲ្យផ្លូវកាន់តែខូចខាតយ៉ាងធ្ងន់ធ្ងរយ៉ាងនេះ ៕
ចែករំលែកព័តមាននេះ