ខេត្តបន្ទាយមានជ័យ ៖ ជនសង្ស័យ6នាក់ត្រូវបានកម្លាំងនគរបាលប៉ុស្តិ៍រដ្ឋបាលសង្កាត់ប៉ោយប៉ែតឃាត់ខ្លួនជាបន្តបន្ទាប់ក្នុងថ្ងៃតែមួយ ប៉ុន្តែ២កន្លែងផ្សេងគ្នា ជាប់ពាក់ព័ន្ធករណីកាន់កាប់រក្សាទុក និងចែកចាយថ្នាំញៀនដោយខុសច្បាប់ ។
ករណីទី១បានកើតឡើងនៅម៉ោងជាង១ទាបភ្លឺ ព្រឹកថ្ងៃទី១៩ សីហា ២០១៨ ខណៈសមត្ថកិច្ចចុះល្បាតការពារសន្តិសុខនៅពេលយប់តាមដងផ្លូវបេតុងខាងជើងបុរីហ្គោដឡាក់ ក្នុងភូមិមិត្តភាព សង្កាត់ប៉ោយប៉ែត ប្រទះឃើញមុខសញ្ញាសង្ស័យ៣នាក់កំពុងជិះម៉ូតូ លុះឃាត់ត្រួតពិនិត្យរកឃើញថ្នាំញៀនម្សៅក្រាមពណ៌សថ្លាចំនួន៤កូនថង់តូចកិប ។
ជនសង្ស័យទាំង៣រួមមានទី១-ឈ្មោះ ប្រុស លី ភេទប្រុស អាយុ១៧ឆ្នាំ ស្នាក់នៅក្នុងភូមិកើតហេតុរកឃើញថ្នាំញៀនខាងលើ និងឧបករណ៌សេពគ្រឿងញៀនមួយចំនួន, ទី២-ឈ្មោះ អុក ដារ៉ូ ភេទប្រុស អាយុ១៨ឆ្នាំ មានទីលំនៅភូមិទំនប់អភិវឌ្ឍន៌ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ (បក្ខពួក) ស្នាក់នៅក្រុងប៉ោយប៉ែត និងទី៣-ឈ្មោះ សង ចាន់ថា ភេទប្រុស អាយុ១៨ឆ្នាំ ស្នាក់នៅក្នុងភូមិកើតហេតុ (បក្ខពួក) ។
សមត្ថកិច្ចបន្តថា យោងតាមចម្លើយសារភាពរបស់ជនសង្ស័យទី១ទើបឈានទៅឃាត់ខ្លួនជនសង្ស័យ៣នាក់បន្ថែមទៀតនៅម៉ោងជាង១រសៀលថ្ងៃដដែលនៅបន្ទប់ជួលមួយកន្លែងក្នុងភូមិក្បាលស្ពាន១ សង្កាត់ប៉ោយប៉ែត ។
ជនសង្ស័យទាំង៣នាក់បន្ថែមទៀតរួមមានទី១-ឈ្មោះ គឹម ស៊ីថា ហៅឌឹក ភេទប្រុស និងបក្ខពួក២នាក់ទៀតជាបក្ខពួក ។ ក្នុងការឆែកឆេរបន្ទប់ជនសង្ស័យរបស់ឈ្មោះ គឹម ស៊ីថា ហៅឌឹក សមត្ថកិច្ចរកឃើញម្សៅក្រាមពណ៌សថ្លាចំនួន៣កូនថង់តូច, ថ្នាំញៀនមេតំហ្វេតាមីនពណ៌ផ្កាឈូក WYចំនួន៣គ្រាប់កន្លះ, ជញ្ជីងថ្លឹងថ្នាំញៀនចំនួន២ និងឧបករសេព និងវេចខ្ចប់ថ្នាំញៀនមួយចំនួនធំផងដែរ ។
លោកវរសេនីយ៌ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់ថា ក្រោយសួរនាំនិងធ្វើកំណត់ហេតុ និងកសាងសំណុំរឿងបញ្ជូនជនសង្ស័យ និងវត្ថុតាងទៅការិយាល័យជំនាញនៃស្នងការដ្ឋាននគរបាលខេត្តដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ