ខេត្តបន្ទាយមានជ័យ ៖ នាងក្រមុំម្នាក់បានស្លាប់ពេលបញ្ជូនទៅសង្គ្រោះ នៅមន្ទីរពេទ្យហើយដោយសារ តែការស្លាប់របស់នាងទាន់ហន់ ហើយមានអាថ៌កំបាំងនោះ ទើបប្រភពនានាបានដាក់ការសង្ស័យថា មកពីការប្រើថ្នាំញៀនជ្រុលនៅក្នុងក្លិបមួយនៅក្រុងប៉ោយប៉ែត ទើបបណ្តាលឱ្យមានអាការធ្ងន់ធ្ងររួចក៏ត្រូវស្លាប់ ។…
ខេត្តបន្ទាយមានជ័យ ៖ នាងក្រមុំម្នាក់បានស្លាប់ពេលបញ្ជូនទៅសង្គ្រោះ នៅមន្ទីរពេទ្យហើយដោយសារ
តែការស្លាប់របស់នាងទាន់ហន់ ហើយមានអាថ៌កំបាំងនោះ ទើបប្រភពនានាបានដាក់ការសង្ស័យថា មកពីការប្រើថ្នាំញៀនជ្រុលនៅក្នុងក្លិបមួយនៅក្រុងប៉ោយប៉ែត ទើបបណ្តាលឱ្យមានអាការធ្ងន់ធ្ងររួចក៏ត្រូវស្លាប់ ។ ករណីអាថ៌កំបាំងនិងមិនបានរំខានដល់សមត្ថកិច្ចនេះ បានកើតឡើងកាលពីវេលាព្រឹកព្រលឹមថ្ងៃទី១៦ ខែ
សីហា ។
នាងក្រមុំដែលស្លាប់ មានអាយុ១៧ឆ្នាំ និងមានទីលំនៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ជាកូនស្រីពៅក្នុងចំណោមបងប្អូនស្រី៤នាក់នៃគ្រួសារមួយ ។ កាលពីវេលាម៉ោងជាង៥ភ្លឺ ថ្ងៃទី១៦ ខែសីហានោះ ក្មេងស្រីខាងលើត្រូវបានគេដឹកទៅកាន់មន្ទីរពេទ្យបង្អែកក្រុងប៉ោយប៉ែត ប៉ុន្តែពេលទៅដល់ក្រុមគ្រូពេទ្យធ្វើការត្រួតពិនិត្យតាមបច្ចេកទេសឃើញថា នាងបានស្លាប់ទៅហើយ ។ បន្ទាប់មក សពត្រូវបានគេដឹកត្រឡប់ទៅលំនៅឋានវិញភ្លាមៗ ដោយមិនបានរំខានដល់សមត្ថកិច្ចដើម្បីត្រួតពិនិត្យឬធ្វើកោសល្យវិច័យអ្វីឡើយ ។
ជុំវិញករណីនេះ លោកវេជ្ជបណ្ឌិត ហ៊ុលសុផល្លី ប្រធានមន្ទីរពេទ្យបង្អែកក្រុងប៉ោយប៉ែត បានប្រាប់តាមទូរស័ព្ទថា កាលពីវេលម៉ោង៥និង៤០នាទីព្រឹកព្រលឹមថ្ងៃទី១៦ ខែសីហា ពិតជាមាននារីម្នាក់ស្លាប់ពេលគេបញ្ជូនមកដល់មន្ទីរពេទ្យបង្អែកក្រុងប៉ោយប៉ែតមែន ។ ជនរងគ្រោះបានស្លាប់មុនមកដល់មន្ទីរពេទ្យ ហើយបើការសួរនាំមិត្តភក្តិនាងត្រូវបានប្រាប់ថា នាងមិនដឹងខ្លួន៣ម៉ោងមកហើយ មុនពេលបញ្ជូនទៅមន្ទីរពេទ្យហើយថា ការស្លាប់នេះអាចដោយសារប្រើថ្នាំប្រភេទ(ខេ)ឬថ្នាំគ្រវីជ្រុល ។
ប្រភពពីអ្នករត់ម៉ូតូឌុបម្នាក់និយាយថា មាននារីវ័យក្មេងម្នាក់បានហៅម៉ូតូគាត់ជិះកាលពីព្រឹកព្រលឹមថ្ងៃទី១៦ ខែសីហា ដោយនិយាយថា នាងទៅមើលមិត្តភក្តិម្នាក់ដែលបានចូលក្លិបហើយប្រើថ្នាំគ្រវីជ្រុល គេបញ្ជូនទៅមន្ទីរពេទ្យបង្អែកក្រុងប៉ោយប៉ែត ។ លុះពេលកំពុងជិះម៉ូតូដល់ពាក់កណ្តាលផ្លូវ មានទូរស័ព្ទចូលហើយប្រាប់នាងថា ជនរងគ្រោះស្លាប់បាត់ហើយ នាងក៏ឱ្យគាត់ដឹកត្រឡប់ទៅក្រោយវិញដោយមិនហ៊ានទៅមើលសពទេ ។
ដោយឡែក ប្រភពមួយទៀតនិយាយថា មាននារី២នាក់សង្ស័យជាមិត្តភក្តិ ឬទើបចេញពីក្លិបជាមួយជនរងគ្រោះ បានជួលរថយន្តឈ្នួលមួយគ្រឿងជិះចេញពីក្រុងប៉ោយប៉ែតទាំងព្រឹកព្រលឹមថ្ងៃកើតហេតុ ទៅចុះនៅចំណុចភ្លើងស្តុបមួយកន្លែងក្នុងស្រុកព្រះនេត្រព្រះ ។ ពេលកំពុងជិះរថយន្តមានទូរស័ព្ទឆ្លើយឆ្លងគ្នារវាងនាងៗដែលជិះក្នុងរថយន្ត ដោយឮថាមិត្តភក្តិម្នាក់ដែលចូលក្លិបជាមួយគ្នាកាលពីយស្លាប់ហើយ ហើយពួកនាងពេលនេះកំពុងធ្វើដំណើរទៅផ្ទះវិញ ។
ជុំវិញការស្លាប់ដ៏អាថ៌កំបាំងនេះ លោក ស សុភ័ក្ត្រា ប្រធានស្នាក់ការសន្តិសុខ៥៦៨អាវុធហត្ថក្រុងប៉ោយ
ប៉ែត ប្រាប់តាមទូរស័ព្ទថា លោកមិនទាន់បានដឹងរឿងនេះនៅឡើយទេ ។ ដោយឡែក លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែតប្រាប់ថា មិនបានដឹងរឿងរ៉ាវខាងលើដូចគ្នា ប៉ុន្តែលោកថានឹងឱ្យមន្ត្រីក្រោមឱវាទចុះស្រាវជ្រាវបញ្ហានេះ ។ គេមិនដឹងថា ប្រភពព័ត៌មានខាងលើជាការពិត ឬយ៉ាងណានោះទេ ដោយសារមកទល់ពេលនេះ ឪពុកម្តាយនិងសាច់ញាតិសពជនរងគ្រោះមិនអាចទាក់ទងសុំការបំភ្លឺបាន ៕
ចែករំលែកព័តមាននេះ